2 Samwele 2
2
Ndaviti vamupwisa mwene wa mu Yunda
1Munima yevi, Ndaviti wehwile Shukulu Kalunga ngwendi, “Njasa kuya ku nganda imo ili mu vinganda vya Yunda nakuyifungulula ndi?”
Co Shukulu Kalunga wamukumbulwile ngwendi, “Eyo.”
Ndaviti wehwile ngwendi, “Nganda ikajo?”
Co Shukulu Kalunga wamukumbulwile ngwendi, “Hevelone.” 2#1 Sam 25:42-43 Ngecivene, Ndaviti waile ku Hevelone, na vanakazi vendi vavali, Ahinowame, wa ku Njezelele, na Avingaile, fwile ya Navale, wa ku Kalemele. 3Waile na vanu vendi amolika na vinaanga vyavo, co vatungile ku membo aje alyatele na Hevelone. 4#1 Sam 31:11-13 Asinoni vanu va ku Yunda vezile ku Hevelone nakuvwavesa mazi Ndaviti kumupwisa mwene wa mu Yunda.
Omo Ndaviti wazivile ngeci vanu va ku Njambeshe mu Ngilyande vanatsindi Saulu, 5watumine vanu vamo ngwendi, “Shukulu Kalunga amivezikise omwo mwamwesa kalemeso keni kuli mwene yeni akumutsinda. 6Co ololo Shukulu Kalunga amwese cizemo cendi cije kucesi kutenguluka na kulongwa kuli yeni. Nange lalo njikamilinga mwamuvwa omwo a vyuma evi vimunalingi. 7Pweni vaka-nzili nakusimpa! Saulu mwene yeni natsi, co vanu va ku Yunda vananjivwavesa mazi kupwa mwene yavo.”
Ishemboshete vamupwisa mwene wa mu Isalele
8Avinele muna Nele muka-kushika mashwalale va Saulu, wambatele Ishemboshete muna Saulu, wamuteweselele ku Mahanaime. 9Co Avinele wapwisile Ishemboshete mwene wa lifuti lya Ngilyande, na Ashele, na Njezelele, na Efalime, na Mbenjemani, na lifuti lyoshe lya Isalele. 10Ishemboshete wakele na myaka makumi awana omwo vamupwisile mwene wa mu Isalele, washwanene myaka ivali.
Oloni muyati wa mu Yunda vakavele Ndaviti, 11Ndaviti washwanene mu Hevelone na mu Yunda myaka itanu na ivali na vingonde vitanu na imo.
Nzita akati ka Isalele na Yunda
12Avinele na vamyata va Ishemboshete vatundile ku Mahanaime vaile ku nganda ya Ngimbiyone. 13Co Yowave, muna Zeluya, na vamyata va Ndaviti vaile, valiwanene navo ku lishali lya Ngimbiyone, co voshe vatumbamene asi, vamo ku mutambela umo wa lishali, vakwavo ku mutambela ukwavo musambwa ya lishali. 14Co Avinele wendekele kuli Yowave ngwendi, “Kwanguke vakwenje vamo vakutunda ku mutambela umo na umo ngeci vakulwe kulutwe lwetu!”
Co Yowave wamukumbulwile ngwendi, “Mwamuvwa vaije.”
15Ngecivene, vakwenje likumi na vavali, vemanenene Ishemboshete na muyati wa Mbenjemani, valwile na vakwenje va Ndaviti likumi na vavali. 16Co munu na munu wakwatele ku mutwe wa uje yalwile nendi nakumutiva ku vimati vyendi, ngecivene, voshe makumi avali na vawana vatsile amolika. Co vatumbwile mutambela uje wa mu Ngimbiyone ngwavo, “Lihya lya Mikwale.”
17Co a litangwa lije kwakele nzita yakama manene, Avinele na vaIsalele vafungulukile kuli vanu va Ndaviti. 18Vana va Zeluya vatatu vakele kuje, Yowave, na Avishai, na Ashahele. Ashahele uje wakele na lumbisi ngwe mbambi, 19washangumukile kusheka Avinele. 20Avinele walikenukile anima, co wamwihwile ngwendi, “Yove Ashahele ndi?”
Ashahele wamukumbulwile ngwendi, “Eyo, yange vene.”
21Avinele wendekele ngwendi, “Kesi unjisheke! Sheka umo wa akati ka mashwalale umunyeke vitwa vyendi.” Oloni Ashahele wakele nakumusheka. 22Co lalo Avinele wendekele kuli Ashahele ngwendi, “Likele kunjisheka! Omwo vikajo ushaka ngeci njikutsiye? Vatijo njikalikenga na ndolome yove Yowave nga utsa?” 23Oloni Ashahele anga wakele nakumusheka, cooni Avinele, welwisile likunga vuseta-nima, co wativile Ashahele mwimo pulyasani na mu lishunja lya mwongo. Co Ashahele wawililile asi watsile, co munu woshe wezile a mwela aje atsililile Ashahele, wemaneneo kuluu.
24Oloni Yowave na Avishai vashekele Avinele, omo litangwa lyatokele vetele ku lilundu lya Ama, lije lyakele ku ngangela ya ku Ngiya ku ngila ya mu mambo ku Ngimbiyone. 25Co vaMbenjemani, vakungulukilile lalo kuli Avinele nakumuzengeleka, vemanene akamwa ya lilundu. 26Avinele watambekelele Yowave ngwendi, “Kuma nzita eyi inapu ya myaka yoshe ndi? Kuma kuuzivuka ngeci ku shongo kukukakala cuma ceka cai kuvanga vizindo lika ndi? Yetu tunapu tu vavushoko vweni. Simbu mukajo ukashika vanu vove ngeci valikele kutusheka?”
27Co Yowave wamukumbulwile ngwendi, “Njilisinga ali Njambi wakuyoya, nga kuwendekele, vanu vange nga anga vanamisheke noo imene mutondo.” 28Asinoni Yowave wembile lupembo lwa cimweso cakuleka vanu vendi ngeci valikele kusheka vaIsalele, co nzita yahwile.
29Co Avinele na vanu vendi vendele vutsiki vwoshe mu Cana ca Yondau, vajavukile Ndonga ya Yondau, vendele, co alikaki mutondo, vetele ku Mahanaime mutanya.
30Co omo Yowave walikelele kuvasheka, wakungulwile vanu vendi voshe, co wawanene ngeci likumi na vatanu na vawana vai, kupandakanako Ashahele. 31Vanu va Ndaviti vatsiile vanalume vakupwa 360 va ku vanu va Avinele va ku muyati wa Mbenjemani. 32Co Yowave na vanu vendi vambatele muvila wa Ashahele vautsindile mu mbumbo ya naanga yendi ku Mbetelehema. Co Yowave na vanu vendi vendele vutsiki vwoshe, vetele ku Hevelone muje njwa.
Currently Selected:
2 Samwele 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006