2 Vimyene 5
5
Namane vamukangwisa mbumba
1Namane wapwile muka-kushika mashwalale va Silya, mwene wa Silya wamusingimikile nakumuzema manene, omwo ali Namane Shukulu Kalunga waanene mashwalale va Silya nzili yakuhyana. Namane wapwile lishwalale wa nzili, oloni wakele na mushongo wa mbumba. 2Mu nzita imo yakulwisa Isalele, vaSilya vakwatele mwanike wa munakazi wa ku Isalele, co wapwile ngamba ya munakazi wa Namane. 3Co litangwa limo uje mwanike wa munakazi wendekele kuli shukulu yendi wa munakazi ngwendi, “Nga shukulu yange wa munalume naile kuli muka-kwimanena uje wakala mu Samaliya, nga namukangwisa ku mushongo wendi wa mbumba.” 4Omo Namane wazivile ngeci, co waile kuli mwene nakumuleka vije vyendekele uje mwanike wa munakazi. 5Co mwene wendekele ngwendi, “Ya utwale mukanda kuli ikeye.”
Ngecivene, Namane wakatukile, wambatele mavundungulu 30,000 a siliva, na mavundungulu 6,000 a ngolinde, na vyakuzala likumi vyavivwa manene. 6Uje mukanda wambatele vausonekele ngwavo, “Njatumu ngamba yange Namane nga citava umukangwise ku mushongo wendi wa mbumba.”
7Omo mwene wa mu Isalele walavele uje mukanda, co watavwile vuzalo vwendi mukuviilila, walikomokelele, co wendekele ngwendi, “Omwo vikajo mwene wa Silya nayongola ngwendi yange njasa kukangwisa ou munalume? Kuma ikeye nayongola ngwendi yange nji Njambi, uje ali na nzili yakutsiya nambe yakuyoyesa ndi? Eci casholoka mwa vushunga vene ngeci ashaka lika kulinga vimata nange!”
8Omo Elisha muka-kwimanena wazivile ngeci mwene wa mu Isalele natavula vuzalo vwendi, co watumine lijwi kuli mwene ngwendi, “Omwo vikajo unatavwila vuzalo vwove? Tuma munalume kuno kuli yange, co njikamumwesa ngeci mu Isalele muli muka-kwimanena!”
9Namane waile na tuvalu twendi na matemba endi, co wakemanene ku cikolo ca njuvo ya Elisha. 10Co Elisha watumine ngamba yendi nakuleka Namane ngeci aye ku Ndonga ya Yondau mukujwela visimbu vitanu na vivali, co mwa vushunga vene akakanguka ku mushongo wendi wa mbumba. 11Oloni Namane wateketele, co waile, wendekele ngwendi, “Yange njayongwele ngwange amo akaija kuli yange, nakulombela mu lizina lya Shukulu Kalunga Njambi yendi, nakwolwela livoko lyendi aje a cipapi ca mbumba nakunjikangwisa! 12Kuma vindonga vya Ambana na Falepale, vije twaseza mu Ndamasiku kuvyapwile vyavivwa kutuvakana vindonga vyoshe vya mu Isalele ndi? Nga njajwelelemo kuma nga kunjakangukile?” Co waile oku naluvala.
13Co vangamba vendi vashwenyele kuli ikeye vendekele ngwavo, “Mwane, nga muka-kwimanena nakuleka kulinga cuma cimo cacikalu, unapandele kucilinga. Vikajo vikwonwesa kukajwela ngwe muje mwendekele ngeci ukanguke?” 14#Luk 4:27 Ngecivene, Namane washelumukilile ku Ndonga ya Yondau, co wambwitamenemo visimbu vitanu na vivali, ngwe muje mwamulekele Elisha, co mwa vushunga vene wakangukile. Cikonde cendi capwile cacivwa lalo ngwe ca mwanike wamundondo. 15Co welukilile kuli Elisha amo na vanu vendi voshe wendekele ngwendi, “Ololo njazivuka ngwange mu kaye mwoshe kumwesi Njambi kuvanga lika Njambi ya Isalele, ngeci mwane, tambula vwana vwange ngamba yove.”
16Oloni Elisha wamukumbulwile ngwendi, “Njilisinga ali Shukulu Kalunga wakuyoya uje injapangela ngwange, kunjasa kutambula vwana embwe.”
Co Namane wamusindiiye ngeci atambule vuje vwana, oloni wavyanene. 17Ngecivene, Namane wendekele ngwendi, “Nga yove shove kutambula vwana vwange, cooni njitave njambate vitele vivali vya livu a vimulu njiye nalyo kwimbo lyange, omwo kutunda ku lelo na kulutwe kunjikakombelela nambe n̄ombelo ya kwenyeka kuli njambi weka kuvanga kuli Shukulu Kalunga lika. 18Ngecivene, njayongola ngwange Shukulu Kalunga akanjisambesa omo njikalipandakana na mwene yange kuya ku njuvo ya Limone, njambi ya Silya, nakumulemesa. Mwa vushunga vene Shukulu Kalunga anjisambese a cuma eci!”
19Elisha wamulekele ngwendi, “Ya mu kwoloka.” Co Namane wakatukile waile.
Wendele lika kanunda kakandondo, 20co Ngehazi ngamba ya Elisha walyendekesele mu mbunge yendi ngwendi, “Shukulu yange necelela Namane kuya ngoco kujeneka kufweta cuma cimo! Napandele kutambula vije vyanamwanene uje kaSilya. Ali Shukulu Kalunga wakuyoya, yange njimukava kangongo-nima ngeci njikatambule cuma cimo kuli ikeye!” 21Ngecivene, Ngehazi wakavele Namane kangongo-nima. Omo Namane wamwene munalume amukava kangongo-nima, co washulukile a litemba lyendi nakumushesha, co wehwile ngwendi, “Kuli cimo cuma caviya ndi?”
22Co Ngehazi wamukumbulwile ngwendi, “Embwe, oloni shukulu yange nanjitumu kukuleka ngwendi vanu vavali lika va ku munga ya vaka-kwimanena va Njambi va mu lifuti lya malundu lya Efalime ololo vene vanatulu, co ashaka yove uvane mavundungulu 3,000 a siliva na vuzalo vuvali vwavuvwa manene.”
23Namane wamukumbulwile ngwendi, “Mwamuvwa ambata mavundungulu 6,000 a siliva.” Co wamusindiiye, waakele siliva mu vinjeke vivali nakukutako, waanene vuzalo vuvali vwavuvwa manene kuli vangamba vendi vavali, nakuvatuma vaye kulutwe lwa Ngehazi. 24Omo vetele ku lilundu kuje wakele Elisha, Ngehazi wanonele vije vinjeke vivali wavitwalele mu njuvo. Asinoni walekele vangamba va Namane kwilukamo. 25Omo welukile mu njuvo, Elisha wamwihwile ngwendi, “Unaile kuli?”
Co ikeye wamukumbulwile ngwendi, “Shukulu, nakumo kwai kunjinaile.” 26Oloni Elisha wendekele ngwendi, “Njinakele nove mu munzinzime omo Namane washulukile mu litemba lyendi nakwendeka nove. Ngehazi, kuwesi na moko yakutambula vimbongo nambe vuzalo, na mahya a miti ya olive, nambe mikolovozi ya vushuka vwa vinyu, nambe vimanga, nambe vingombe, nambe vangamba embwe! 27Co ololo mushongo wa mbumba uje wakele kuli Namane ukaija kuli yove, co yove na vatekulwila vove mukakala na mbumba myaka yoshe!”
Omo Ngehazi watundile kuli Elisha, aje vene wakele na mushongo wa mbumba, co cikonde cendi catokolokele ngwe mbundu.
The Bible in Mbunda ©The Bible Society of Zambia, 2006