2 Vimyene 4
4
Elisha akwasa fwile wa kautu
1Fwile wa munakazi wa mu munga ya vaka-kwimanena waile kuli Elisha wendekele ngwendi, “Mwane, munalume wange natsi! Ngwe muwazivukila ikeye wapwile munalume muka-kukomoka Njambi, oloni munalume uje yatambwile vimbongo vyendi naija, co ashaka kwambata vana vange vavali va vanalume ngeci akavapwise vindungo ku likongo lije lyatambwile munalume wange kuli ikeye.”
2Co Elisha wamwihwile ngwendi, “Vatijo njasa kukukwasa? Njileke vikajo ulinavyo ku njuvo yove?”
Co wakumbulwile ngwendi, “Nacimo cai njilinaco, kuvanga lika kalilulu kakandondo ka mazi a olive.”
3Co Elisha wamulekele ngwendi, “Ya kuli vakweni ukakumuneko malulu amangi amupulungwa ngwe muunasela. 4Asinoni ukakovela mu njuvo na vana vove, co mukashoka lipito, co shangumuka kwitila mazi mu malulu. Tumbika kumukulo lilulu limo na limo lije linashulu.”
5Ngecivene, uje munakazi wakovelele mu njuvo amo na vana vendi, co vashokele lipito, wanonele kaje kalilulu kakandondo ka mazi a olive, wetilile mazi mu malulu aje vakele nakumwana vana vendi. 6Omo vashulisile malulu oshe, co wendekele kuli munendi ngwendi njineneleko lilulu likwavo. Co wamukumbulwile ngwendi, “Lyai, lije likelyo lyakumanesela.” Co mazi a olive alikelele kwita. 7Co waile kuli Elisha muka-kwimanena, co wamulekele ngwendi, “Landesa mazi a olive ufwete makongo ove oshe, co vije vimbongo vikasalao vikukwase na vana vove va vanalume.”
Elisha na munakazi wakufuka wa ku Shuneme
8Litangwa limo Elisha waile ku Shuneme, kuje kwakele munakazi wakufuka. Co uje munakazi wamulanyele kukulya, co tunde aje omo Elisha wakele nakuyayaya ku Shuneme, wakele nakulila-lila vyakulya ku njuvo ya uje munakazi na munalume wendi. 9Co uje munakazi wendekele kuli munalume wendi ngwendi, “Mwa vushunga uje munalume akaija-ija kuno kushwakumo wapwa munu wakujela wa Njambi. 10Tumutungile kamulili akamwa ya njuvo,#4:10 AKAMWA YA NJUVO: Vinjuvo vyalaja vyakele na viluli vyakusivama, co vanu valikwasesele vindendelo mukulonda nakukahwimina akamwa ya ciluli. twakemo vulili, na mesa, na citumbamo, na ndeya, co ase kukalamo oshe aje ezila nakutusikamesela.”
11Litangwa limo Elisha welukilile ku Shuneme, co walondele ku mulili wendi nakuhwima. 12Walekele ngamba yendi Ngehazi ngeci asane uje munakazi. Co omo uje munakazi wezile, 13Elisha walekele Ngehazi ngwendi, “Mwihule vinjinapande kumulingila akukwasa kwendi kuje kwakama kwanalingi ngacije akutwana vije vitwashakele ngwe kukujeneka kwetu. Amo ashaka njiye kuli mwene nambe kuli muka-kushika wa nzita mukumwimanenako.”
Uje munakazi wakumbulwile ngwendi, “Embwe, navimo vyai vinjinajeneka akati ka vavushoko vwange.”
14Elisha wehwile Ngehazi ngwendi, “Vikajo njasa kumukwasa ou munakazi?”
Co Ngehazi wakumbulwile ngwendi, “Mwa vushunga ou munakazi kesi na mwana, co lalo munalume wendi nakuluvala.”
15Elisha washikile ngwendi, “Muleke aije kuno.” Co uje munakazi wezile, co watsikamene mu cikolo, 16#Kus 18:14 co Elisha wamulekele ngwendi, “Mungolosika a simbu ino vene ukakala na mwana wa munalume.”
Co ikeye wakomokele ngwendi, “Embwe, shukulu, kesi unjikwise. Yove unapu u munu wa Njambi!”
17Oloni capwile ngacije vene ngwe mwendekele Elisha, akweta mungolosika a simbu ije vene, uje munakazi wakitile mwana wa munalume.
18Litangwa limo, uje mwanike wakavele ishe ku mahya kuje kuvakele vaka-kuteja. 19Acete ngacije vene, co walilile nakuleka ishe ngwendi, “Mutwe wange uvinja! Mutwe wange uvinja!”
Co ishe wendekele kuli ngamba ngwendi, “Ilwisa mwanike kwimbo kuli vaina.” 20Co uje ngamba welwisile mwanike kuli vaina, vaina vamukwatele nakumwaka a mendi noo ku mutanya, co kweta ku simbu ije vene watsile. 21Vaina vamutwalele ku mulili wa Elisha, co vamwakele a vulili vamusezele, co vashokele lipito. 22Asinoni munakazi wasanene munalume wendi wamulekele ngwendi, “Njitumineko ngamba amo na cimulu. Njishaka kuya kuli muka-kwimanena Elisha. Ololo njiilukamo.”
23Co munalume wendi wamwihwile ngwendi, “Omwo vikajo ushaka kuya lelo? Lelo kesi Litangwa Lyakuhwima nambe lya Ciwano ca Kutenama Ngonde.”
Co munakazi wamukumbulwile ngwendi, “Kukwesi mulonga.” 24Asinoni waakele sileyi a cimulu, washikile uje ngamba ngwendi, “Zambwisa vwasi cimulu, co kesi wendese cimulu kamandondo kuvanga yange njikuleke.” 25Ngecivene, wakatukile waile ku Munkinda wa Kalemele kuje kwakele Elisha.
Omo Elisha wamumwene acendela alyala kamandondo, wendekele kuli ngamba yendi Ngehazi ngwendi, “Kenga, uje munakazi wa ku Shuneme alinakwija! 26Zambwila kuli ikeye ukazive nga vanenduka amo na naanga yendi.”
Co uje munakazi walekele Ngehazi ngwendi, “Eyo, tunenduka mwamuvwa,” 27oloni omo wetele kuli Elisha a Munkinda, watsikamene a mavuli kulutwe lwendi, co wakwatele Elisha ku mendi. Ngehazi washakele kumunakula, oloni Elisha wendekele ngwendi, “Mwecele. Kuma yove kuwamwene ngeci ali na vusiwa vwakama manene ndi? Oloni Shukulu Kalunga kanjilekeleo cuma cimo.”
28Co munakazi wendekele kuli Elisha ngwendi, “Shukulu, kuma yange njakulombele mwana wa munalume ndi? Kuma yange kunjakulekele ngwange kesi unjikulaese ngoco ndi?”
29Co Elisha watengulukilile kuli Ngehazi wendekele ngwendi, “Zambula! Ambata mulamu wange uye. Co kesi wimane nakulikandelela na munu woshe-iwoshe uliwana nendi mu ngila, nga munu akukandelela kesi umukumbulule. Ya lika ku njuvo, co ukakambeka mulamu wange akamwa ya mwanike.”
30Uje munakazi wendekele kuli Elisha ngwendi, “Njilisinga ali Shukulu Kalunga wakuyoya na ali yove ngwange kunjikuseze!” Ngecivene, muvuvali vwavo vaile amo. 31Ngehazi watwamene kulutwe, co wakakambekele mulamu wa Elisha ali mwanike, oloni kukwakele lijwi nambe cimweso cimo ca mwonyo. Ngecivene, welukile nakuliwana na Elisha, co wamulekele ngwendi, “Mwanike kakasumukile.”
32Omo Elisha wetele, wakovelele ku mulili endi lika, wamwene mwanike nalala a vulili natsi. 33Co washokele lipito walombelele kuli Shukulu Kalunga. 34Washuluvalele ali mwanike, co waakele kanwa kendi a kanwa ka mwanike, na mesho endi a mesho a mwanike, na mavoko endi a mavoko a mwanike. Omo washuluvalele akamwa ya mwanike, co muvila wa mwanike washangumukile kukala na ntwima. 35Co Elisha wakatukile, wendanganene muje mu mulili, co welukilile lalo nakushuluvala akamwa ya mwanike. Co mwanike washamitile visimbu vitanu na vivali, asinoni washangumukile kutona. 36Co Elisha wasanene Ngehazi wamulekele asane vaina ya mwanike. Omo vaina vakovelelemo, Elisha wendekele kuli ikeye ngwendi, “Munove ou.” 37#1 Vim 17:21 Co uje munakazi wawililile ku mendi a Elisha, wakulamenene asi, asinoni wambatele munendi, co waile.
Vikomokeso vivali vikwavo lalo
38A simbu imo, omo kwakele njala ya lyangengela mu lifuti lyoshe, Elisha welukile ku Ngilingale. Omo wakele nakulongesa mbunga ya vaka-kwimanena, co walekele ngamba yendi kwaka ndeo yakama a liko ngeci avatelekele vyakulya. 39Co umo wavo waile mu shwata kukashaka vyemba. Co wawanene inwi imo ya mu shwata, wapotweleko matanda amangi, co waile nawo nakuwalengozwela muje mu vyakulya, oloni kazivukile ngeci akewo afwa vati. 40Co vaakele vyakulya a malonga ngeci vanu valye, oloni omo vamakeleleko, co valekele Elisha ngwavo, “Ou mwaze!” Co vavyanene kuulya. 41Elisha walombele vunga, wavuvuvungiiye mu ndeo, co wendekele ngwendi, “Vaaneni ngeci valye.” Co vije vyakulya vyapwile vyavivwa.
42Co a simbu ikwavo kwezile munu wa ku Mbale Shalisha, wanenelele Elisha mikasha ya makende makumi avali akulinga na vunga vwa mbale ya maumwa yakulivanga kuteja a mwaka uje vene, na tiliku yaiha. Co Elisha walekele ngamba yendi kwana vije vyakulya ku mbunga ya vaka-kwimanena, 43oloni ngamba yendi ikeye wamukumbulwile ngwendi, “Kuma unayongola ngwove vyakulya evi vinapumo ku vanalume vakupwa 100 ndi?”
Co Elisha wamulekele ngwendi, “Vaane valye, omwo Shukulu Kalunga nendeka ngwendi, ‘Vakalya, co vikasalao vimo lalo.’ ” 44Ngecivene, uje ngamba wavanene vyakulya, ngwe muje mwendekele Shukulu Kalunga, voshe valile, co kwasalele vimo.
The Bible in Mbunda ©The Bible Society of Zambia, 2006