2 Vimyene 25
25
Kuwa kwa Yelusalema
(2 Miz 36:13-21; Njele 52:3b-11)
1 #
Njele 21:1-10; 34:1-5; Ezek 24:2 Zendekiya watengulukilile Mwene Nevukaneza wa ku Mbambilone nakumulwisa, co Nevukaneza wezile na mashwalale vendi voshe, walwisile Yelusalema a litangwa lyamulikumi ku ngonde yamulikumi mu mwaka wamucitanu na iwana wakushwana kwa Zendekiya. Co vatungile cilombo cavo anja ya nganda, valingile mikinya noo vetele ku vivumbe vya nganda, 2co vazengelekele nganda noo mwaka wamulikumi na umo wakushwana kwa Zendekiya. 3A litangwa lyamucitanu na awana ku ngonde yamuciwana ku mwaka uje vene, omwo njala ya lyangengela yapwile yakama manene ngeci vanu kuvakele na vyakulya, 4#Ezek 33:21 vivumbe vya nganda vavituvile. Nameme vaMbambilone vazengelekele nganda, oloni mashwalale voshe vatewele a simbu ya vutsiki. Vatuukilile ku cikolo ca ku lihya lya vumwene, co vetilile mu ngila ya ku cikolo ca mukati ka vivumbe vivali, vatewelele ku mutambela wa ku Cana ca Yondau. 5Oloni mbunga ya mashwalale va Mbambilone vashekele Mwene Zendekiya, vakamukwatelele ku vyana vya Yeliko, co mashwalale vendi voshe vamusezele. 6Zendekiya vamutwalele kuli Mwene Nevukaneza, uje wakele mu nganda ya Limbela, co kuje vene Nevukaneza wamusompele, nakuwana ngeci ali na mulonga. 7#Ezek 12:13 Vana va Zendekiya vavatsiile oku ishavo Zendekiya nakengeko, asinoni Nevukaneza wativile Zendekiya mesho, wamukutile malyenge, co wamutwalele ku Mbambilone.
Kunyonga kwa Njuvo ya Shukulu Kalunga
(Njele 52:12-33)
8A litangwa lyamucitanu na avali ku ngonde yamucitanu mu mwaka wamulikumi na itanu na iwana wakushwana kwa Mwene Nevukaneza wa Mbambilone, Nevuzalandane muka-kunangula mwene na muka-kushika mbunga ya mashwalale vendi, vakovelele mu Yelusalema. 9Wenyekele Njuvo ya Shukulu Kalunga na lipela na vinjuvo vyoshe vya vanu va vulemu va mu Yelusalema, 10co mashwalale vendi vasiwile vivumbe vya nganda. 11Asinoni Nevuzalandane watwalele mbunga ya vanu ku Mbambilone, vaje vasalele mu nganda, vaka-vipangi vya vutongwe, na vanu vaje valiitile kuli vaMbambilone, 12oloni wasezele mu Yunda vanu vamo vakuutwa manene, co wavapwisile vaka-kupanga mu mahya a mikolovozi ya vushuka vwa vinyu na mu mahya.
13 #
1 Vim 7:15-26; 2 Miz 3:15-17 VaMbambilone vavatozwele vimanda vya vunengu na vwimaneno vije vyakele mu Njuvo ya Shukulu Kalunga, amolika na lizau lyakama lya vunengu, co vatwalele vunengu vwoshe ku Mbambilone. 14#1 Vim 7:45; 2 Miz 4:16 Co vatwalele lalo vifwosholo, na malonga akukombela lito vije vapangesele akukomba ku mutula, co vambatele vivala vyakuzimisa vindeya, na malonga aje avapangesele mukukwatelao maninga a vin̄ombelo, na malonga aje avapangesele mukwenyeka insense, na vivala vyoshe vya vunengu vije vapangesele mu Njuvo ya Shukulu Kalunga. 15Co vambatele tumalonga twatundondo na vikango vyakwambatela manungu a tuhya. 16Na vivala vya vunengu vije vyalingile Mwene Solomoni vya mu Njuvo ya Shukulu Kalunga, vimanda vivali na vwimaneno na lizau lyakama na vyuma vyoshe vije vivalingile na ngolinde na siliva, vije vyapwile vyakulema manene kuvasele kuvipeselesa. 17Vije vimanda vivali vyapwile vyakulifwa, imo na imo yapwile mamita 8 mu vulaja vwa akamwa, na mutwe wayo wa vunengu wapwile mamita 1.3 mu vulaja. Ku mutwe wa manda imo na imo kwazengelekele vunengu vwakushoveya na mapomingilanete akulinga na vunengu.
Vanu va mu Yunda vavatwala ku Mbambilone
(Njele 52:24-27)
18Co Nevuzalandane muka-kushika mashwalale, wakwatele Selaya Muka-kukombelela Wakama, na Zefaniya muka-kukombelela wakwata kuli Muka-kukombelela Wakama, na vamyata vatatu va vulemu va mu Njuvo ya Shukulu Kalunga. 19Co mu nganda wakwatelemo mwata muka-kushika mashwalale, na vaka-kunangula mwene vatanu vaje vakele mu nganda, na muka-kwata kuli muka-kushika mashwalale uje wapwile muka-kutulika livulu lya mazina a mashwalale, na vanalume va vulemu makumi atanu na limo. 20Co Nevuzalandane wavatwalele kuli mwene wa Mbambilone, uje wakele mu nganda ya Limbela 21mu lifuti lya Hamate. Co mwene wa Mbambilone wavapupile nakuvatsiya.
Ngecivene, vanu va mu Yunda vavatundisile mu lifuti lyavo nakuvatwala mu vunzinda.
Ngendaliya nguvulu wa mu Yunda
(Njele 40:7-9, 41:1-3)
22Mwene Nevukaneza wa Mbambilone waangwile Ngendaliya, muna Ahikame mutekulu wa Shafane, kupwa nguvulu wa mu Yunda, co wamwanene moko ya ali vanu voshe vaje kuvaile ku Mbambilone. 23Omo vamyata va vaYunda na mashwalale vaje kuvaliitile vazivile evi, co vakalikumbasanene na Ngendaliya ku Mizipa. Vamyata ava vapwile Ishimela muna Netaniya na Yohanane muna Kaleya na Selaya muna Tanehumete wa ku nganda ya Netofa na Njezaniya wa ku Maka. 24Ngendaliya wendekele kuli vakevo ngwendi, “Kesi muzive lyova lya vamyata va vaMbambilone. Tungeni mu lifuti lino, nakupangela mwene wa Mbambilone, co vyoshe vikapwa vyavivwa kuli yeni.”
25Oloni ku ngonde yamucitanu na vivali mu mwaka uje vene, Ishimela, muna Netaniya mutekulu wa Elishama, uje wapwile wa ku naanga ya vumwene, waile ku Mizipa amo na vanalume likumi, wakalwisile Ngendaliya, nakumutsiya. Co watsiile lalo vaIsalele na vaMbambilone vaje vakele amolika nendi kuje. 26#Njele 43:5-7 Asinoni vaIsalele voshe, vaka-kufuka na tuutu, amolika na vamyata va mbunga ya mashwalale, vakatukile vaile ku Ingito, omwo vakele na lyova lya vaMbambilone.
Yehoyakine vamutundisa mu kamenga
(Njele 52:31-34)
27Mu mwaka uje omo Evilemelondake wapwile mwene wa Mbambilone, co wamwesele ngozi kuli Mwene Yehoyakine wa mu Yunda akumutundisa mu kamenga. Eci calingiwile a litangwa lyamumakumi avali na atanu na avali ku ngonde yamulikumi na vivali mu mwaka wamumakumi atatu na myaka itanu na ivali kutunda aje vatwalelele Yehoyakine ku vunzinda. 28Evilemelondake wamuzivilile mema ku mbunge, co wamwanene mwela wakama wa kasingimiko kutuvakana myela ije yaanene kuli vimyene vakwavo vaje vakele navo mu vunzinda mu Mbambilone. 29Ngecivene, Yehoyakine vamutavesele kuzala vuzalo vwendi kutuvakana kuzala vuzalo vwa mu kamenga, co vamutavesele lalo kulyalyalya amo na mwene matangwa oshe akuyoya kwendi. 30A litangwa na litangwa, mukuyoya kwendi kwoshe, Yehoyakine vakele nakumwana vimbongo ngeci alande vije vyashakele.
The Bible in Mbunda ©The Bible Society of Zambia, 2006