2 Vimyene 13
13
Mwene Njehoahaze wa mu Isalele
1Mu mwaka wamumakumi avali na itatu wakushwana kwa Yowashe muna Ahaziya kupwa mwene wa mu Yunda, Njehoahaze muna Yehu wapwile mwene wa mu Isalele, co washwanene mu Samaliya myaka likumi na itanu na ivali. 2Ngwe mwalingile Mwene Yelovowame uje washwanene akulivanga, na ikeye lalo walingile vuvi ku mesho a Shukulu Kalunga, co watwamenenene Isalele mu vuvi, kecelele vingila vyendi vyavivi. 3Ngecivene, Shukulu Kalunga waluvalele na Isalele, co watavele Mwene Hazayele wa ku Silya na munendi Mbenehandande kufungulula Isalele simbu ku simbu. 4Asinoni Njehoahaze walombelele kuli Shukulu Kalunga, co Shukulu Kalunga, omwo wamwene vukalu vwa mwene wa ku Silya omo wakele nakuyandesa vaIsalele, co wakumbulwile lilombelo lyendi. 5Shukulu Kalunga watuminine Isalele ntwama uje wavapatwile kuli vaSilya, co vaIsalele vakele mu kwoloka, ngwe muje muvakele myaka ya kunima. 6Oloni nameme ngoco kuvecelele vuvi vuje Mwene Yelovowame watwamenenene navwo Isalele, oloni vatwaleleo kulinga vuvi, na kamponya ka Ashela njambi wa munakazi kasalele mu Samaliya.
7Njehoahaze kakele na mashwalale vasaleleo kuvanga lika vaka-kulonda a tuvalu makumi atanu, na matemba likumi, na vanalume 10,000 vaka-kwenda a mendi, omwo mwene wa Silya wanyongesele vakwavo voshe, wavalyatangelele ngwe likungu.
8Vyuma vyeka vije vyalingile Njehoahaze na vilinga vyendi vyakunyanyama vavisoneka mu Livulu lya Mizimbu ya Vimyene va mu Isalele. 9Ikeye watsile, co vamutsindile mu Samaliya, co munendi Yehowashe wamushwanene kupwa mwene.
Mwene Yehowashe wa mu Isalele
10Mu mwaka wamumakumi atatu na itanu na ivali wakushwana kwa Mwene Yowashe wa mu Yunda, Yehowashe muna Njehoahaze wapwile mwene wa mu Isalele, co washwanene mu Samaliya myaka likumi na itanu na umo. 11Na ikeye lalo walingile vuvi ku mesho a Shukulu Kalunga, wakavele cimweso cacivi ca Mwene Yelovowame, uje watwamenenene Isalele nakuvakovelesa mu vuvi. 12Vyuma vyeka vije vyalingile Yehowashe, amo na vilinga vyendi vyakusimpa mu nzita yakulwisa Mwene Amaziya wa mu Yunda, vavisoneka mu Livulu lya Mizimbu ya Vimyene va mu Isalele. 13Yehowashe watsile, co vamutsindile mu vimbumbo vya vumwene mu Samaliya, munendi Yelovowame Wamucivali wamushwanene kupwa mwene.
Kutsa kwa Elisha
14 #
2 Vim 2:12
Elisha muka-kwimanena wavinjile mushongo wakama, co omo wakele kuyehi na kutsa, Mwene Yehowashe wa mu Isalele wezile nakumumona. Walilile ngwendi, “Tate, tate! Yove wapwile muka-kwimanena wa nzili kutuvakana mashwalale voshe va Isalele!”
15Elisha wamushikile ngwendi, “Ambata vuta vwa lusipa na mikili.” Yehowashe wavinonele, 16co Elisha wamulekele kwasha mukili. Co mwene walingile ngacije, Elisha wakambekele mavoko endi a mavoko a mwene. 17Co Elisha wendekele ngwendi, “Shokolola njanena ije inakenge ku Silya,” co mwene washokolwele njanena ije yakengele ku Silya. Elisha washikile ngwendi, “Asha mukili.” Aje vene mwene washele mukili, co muka-kwimanena wendekele ngwendi, “Yove vene unapu mukili wa Shukulu Kalunga wakuhyana nawo Silya. Ukalwisa vaSilya ku Afeke noo unavafungulula.”
18Asinoni Elisha walekele mwene kwambata mikili ikwavo nakuyashanga mu livu. Co mwene wayashangele mu livu visimbu vitatu, co walikelele. 19Eci caluvalesele Elisha, co wendekele kuli mwene ngwendi, “Nga washele mikili mu livu visimbu vitanu nambe vitanu na imo, nga unahyana vaSilya, oloni ololo ukavahyana lika visimbu vitatu.”
20Elisha watsile, co vamutsindile. Co a mwaka na mwaka vimbunga vya vaMowavi vakele nakwija mukulwisa Isalele. 21A simbu imo omo vanu vaile nakutsinda mutsi, co vamwene mbunga imo ya vaMowavi, co vaje vanu vombilile cije mu mbumbo ya Elisha, co vatewele. Vwasi-vwasi cije civimbi omo cakambolele ku vitsiya vya Elisha, co uje munalume wendukile nakwimana.
Nzita akati ka Isalele na Silya
22Mwene Hazayele wa Silya wayandesele manene vaIsalele a simbu yoshe yakushwana kwa Njehoahaze, 23oloni Shukulu Kalunga wakele na ngozi na mema ku mbunge ali vakevo. Ikeye kavecelele ngeci vavanyongese embwe, oloni wavakwasele omwo ya cikumiiyo cendi kuli Avilahama na Isake na Yakomba. Ikeye kevalele vanu vendi embwe.
24A kutsa kwa Mwene Hazayele wa Silya, munendi Mbenehandande wamushwanene kupwa mwene. 25Mwene Yehowashe wa mu Isalele wafungulwile Mbenehandande visimbu vitatu, co watambwile lalo vinganda vije vyatambwile Mbenehandande a simbu yakushwana kwa Njehoahaze, ishe ya Yehowashe.
The Bible in Mbunda ©The Bible Society of Zambia, 2006