2 Vimyene 12
12
Mwene Yowashe wa mu Yunda
(2 Miz 24:1-16)
1Mu mwaka wamucitanu na ivali omo Mwene Yehu washwanene mu Isalele, Yowashe wapwile mwene wa mu Yunda, washwanene mu Yelusalema myaka makumi awana, vaina vapwile Zimbiya wa ku nganda ya Mbeleshemba. 2Co mukuyoya kwendi kwoshe walingile vije vyavwaelelesele Shukulu Kalunga, omwo muka-kukombelela Yehoyanda wamulongesele. 3Nameme ngoco, ije mitambela vakele nakulemesela vaje vaka-kujeneka kukulaela kuvainyongesele, co vanu vakele nakukombelelako vin̄ombelo nakwenyekelako insense.
4 #
Kut 30:11-16
Yowashe wasanene vaka-kwimanena, co wavashikile ngeci vatulike vimbongo vije vakele nakunena vanu mu Njuvo ya Shukulu Kalunga mukufweta akukombelela, amo na vimbongo vya n̄ombelo ya simbu yoshe na vimbongo vije vivaanene kupwa vwana vwa cizango. 5Muka-kukombelela woshe napande kukala na moko ya vimbongo vije vivanenele vaje vaapangelele, co vije vimbongo vavipangesele mukuvwaesesa Njuvo ya Shukulu Kalunga kwoshe kuje vashakele kuvwaesa.
6Oloni mu mwaka wamumakumi avali na itatu wakushwana kwa Yowashe, vaje vaka-kukombelela kuvavwaesele Njuvo ya Shukulu Kalunga embwe. 7Ngecivene, Yowashe wasanene Yehoyanda na vakwavo vaka-kukombelela, co wavehwile ngwendi, “Omwo vikajo kumwavwaeselele Njuvo ya Shukulu Kalunga? Kutunda ano kumukatulika lalo vimbongo vije mukatambula, oloni munapande kuvyeca, ngeci vase kulikwasa navyo mukuvwaesa Njuvo ya Shukulu Kalunga.” 8Co vaka-kukombelela vatavele ngeci kuvakatambula lalo vimbongo ku vanu nameme kuvwaesa Njuvo ya Shukulu Kalunga.
9Asinoni Yehoyanda wanonele cikasa, wativile mbengwa a cifwiko, co wacakele kumukulo wa mutula, ku livoko lya cilyo kwakukovelela mu Njuvo ya Shukulu Kalunga. Co vaka-kulombelela vaje vakele nakupanga ku cikolo vakele nakwakamo vimbongo vyoshe vije vakele nakunena vaka-kulemesa. 10Omo vamwene ngeci mu cikasa mwakele vimbongo vyavingi, co muka-kusoneka wa mwene na Muka-kukombelela Wakama vezile co valavele vije vimbongo nakuvyaka mu vinjeke. 11Omo vanalava nakuwana vungi vyavyo, co vaanene vije vimbongo kuli vanu vaje vakele na moko ya vipangi vya mu Njuvo ya Shukulu Kalunga, co vaje vanu vakavifwetele vaka-kushonga mavaya, na vaka-kutunga vinjuvo, 12na vaka-kujala mamanya, na vaka-kushonga mamanya, nakulanda mavaya na mamanya akuvwaesesa Njuvo ya Shukulu Kalunga, nakufweta vyoshe vyakuvwaesesa Njuvo ya Shukulu Kalunga. 13Oloni kuvapangesele vije vimbongo vivanenele mukufweta vaka-kupanga vinganja vya siliva na malonga na malupembo, nambe vivala vya citumbikilo ca vindeya, nambe cuma cimo ca siliva, nambe ca ngolinde. 14Vyoshe vavipangesele mukufweta vaka-kupanga na vaka-kulanda vivala vyakupangesa mu Njuvo ya Shukulu Kalunga. 15#2 Vim 22:7 Vantwama vaje va vipangi vapwile va kulongwa, ngecivene, naumo wai wavehwile vukaleo vwa mavulu muvasonekele vimbongo. 16#VaLe 7:7 Vimbongo vya vin̄ombelo vyakuliilwisila, na vin̄ombelo vya a vuvi kuvakele nakuvyaka mu cikasa embwe, oloni vyapwile vya vaka-kukombelela.
17A simbu ije Mwene Hazayele wa ku Silya walwisile nganda ya Ngate nakuyifungulula, asinoni wayongwele kukalwisa Yelusalema. 18Mwene Yowashe wa mu Yunda wambatele vyuma vyoshe vije Njosefati na Njeholame na Ahaziya vanu vaje vaingile, vavikundikile kuli Shukulu Kalunga, kuwezelelako na vyuma vyendi vavenya, na ngolinde yoshe ije yakele mu mbango ya Njuvo ya Shukulu Kalunga na mu lipela, co wavitumine vyoshe kupwa vwana kuli Mwene Hazayele, co ikeye watundisile mashwalale vendi mu Yelusalema.
19Vyuma vyeka vije vyalingile Mwene Yowashe vavisoneka mu Livulu lya Mizimbu ya Vimyene va mu Yunda. 20Vamyata vendi vamukatukilile nakumwenda vungungu, co vamutsiilile ku ngila yakushelumukila ku Sila. 21Njozakale muna Shimete na Yehozavande muna Shomele, vakevo vamyata vendi vamutsiile. Vamutsindile mu vimbumbo vya vumwene mu Nganda ya Ndaviti, co munendi Amaziya wamushwanene kupwa mwene.
The Bible in Mbunda ©The Bible Society of Zambia, 2006