2 Mizimbu 27
27
Yotame Mwene wa mu Yunda
(2 Vim 15:32-38)
1Yotame wakele na myaka makumi avali na itanu omo wapwile mwene, washwanene mu Yelusalema myaka likumi na itanu na umo. Vaina vapwile Yelusha, muna Zandoke. 2Ikeye walingile vije vyavwaelelesele Shukulu Kalunga, ngwe mwalingile ishe Uziya, oloni kalingile vuvi vwakwenyekela insense mu Njuvo ya Shukulu Kalunga. Oloni nameme ngoco, vanu anga vakele nakulinga vuvi.
3Yotame ikeye watungile Cikolo ca ku Kunto ca ku Njuvo ya Shukulu Kalunga, co watungilileko lalo cipango ca Ofele. 4Co watungile vinganda mu lifuti lya minkinda lya Yunda, co mu shwata watungililemo vimpaka na tuposhi. 5Walwile na mwene wa vaAmoni na mashwalale vendi, co wavafungulwile. Co wasindiiye vaAmoni vamulambwile a myaka itatu, makilo a siliva akupwa 3,400, na vulemu vwa tiliku vwakupwa 1,000, na mitonga ya mbale ya maumwa yakupwa 1,000. 6Ngecivene, Yotame wakele na nzili omwo wakulaelele nakwononoka Shukulu Kalunga Njambi yendi. 7Vilinga vikwavo vyakushwana kwa Yotame, na vinzita vyendi, na mashiko endi, vyoshe vavisoneka mu Livulu lya Mizimbu ya Vimyene va mu Isalele na mu Yunda. 8Yotame wakele na myaka makumi avali na itanu omo wapwile mwene, co washwanene mu Yelusalema myaka likumi na itanu na umo. 9Watsile, co vamutsindile mu Nganda ya Ndaviti, co munendi Ahaze wamushwanene kupwa mwene.
The Bible in Mbunda ©The Bible Society of Zambia, 2006