2 Mizimbu 26
26
Mwene Uziya wa mu Yunda
(2 Vim 14:21-22, 15:1-7)
1Vanu voshe va mu Yunda vaangwile Uziya muna Amaziya uje wakele na myaka likumi na itanu na umo omo wapwile mwene. 2(Omo ishe Amaziya watsile, Uziya wafungulwile nganda ya Elata, co wayitungulwile.)
3Uziya wapwile mwene omo wakele na myaka likumi na myaka itanu na umo, washwanene mu Yelusalema myaka makumi atanu na ivali. Lizina lya vaina lyapwile Yekoliya wa ku Yelusalema. 4Akukavangeya vilinga vya ishe, co ikeye walingile vije vyavwaelelesele Shukulu Kalunga. 5Uziya wapangelele Shukulu Kalunga na kulongwa a matangwa ayoyele Zekaliya uje wamulongesele vya vuNjambi, co Njambi wamuvezikisile.
6Uziya waile ku nzita nakulwisa vaFilisitiya. Wasiwile vivumbe vya vinganda vya Ngate na Njaminiya na Ashendonde, co watungile vinganda vya vimpaka kuyehi na Ashendonde na mu lifuti lyoshe lya Filisitiya. 7Co Njambi wamukwasele kufungulula vaFilisitiya, na vaAlavya vaje vakele ku Ngulembale na vaMeuni. 8VaAmoni valambwile mulambu kuli Uziya, co wakele na nzili manene, lutsimo lwendi lwetele ku Ingito.
9Uziya watungile vimpaka vyakukola mu Yelusalema, co watungile tuposhi ku Mbango ya Cikolo na ku Cikolo ca ku Cana, kuje kucatengulukilile civumbe. 10Watungile lalo vimpaka vya tuposhi mushandangala yangoco, wacokwele masima amangi, omwo wakele na matanga amangi a vimuna mu lifuti lya ku vushelumukilo vwa malundu mu kangombe ka yambi na mu vyana. Omwo wazemene kulima, co watakamesele vanu ngeci valime mahya a mikolovozi ya vushuka vwa vinyu mu lifuti lya malundu nakulima livu lya vwilo.
11Uziya wakele na mashwalale vavangi vakulwa nzita. Muzimbu wa vaka-kulwa vendi vautulikile kuli vaka-kusoneka vendi, Njeyele na Maseya vavatwamenenene kuli Hananiya, wa ku munga ya mwene. 12Co vamyata vaka-kushika nzita vapwile 2,600. 13Co mwisi yavo mwakele mashwalale vakupwa 307,500, vaje vasele kulwila mwamuvwa mwene ku vitozi vendi. 14Uziya waanene mashwalale vintelo, na makunga, na vitepa vya vikuvo vya nzita na tuzaku twa vikuvo twa nzita na mata a lusipa na mikili, na mamanya akwashesa mu cipapa ca kenya. 15Co mu Yelusalema vanu vendi vaka-vutongwe vafulile vikuvo vyakwashesa nakumbila mamanya akama kutunda ku tuposhi na ku vimbango vya civumbe ca nganda. Co lutsimo lwendi lwaile kulyala, wapwile muka-nzili manene omwo Njambi wamukwasele.
Uziya vamuhisa omwo kulyalesa kwendi
16Oloni omo Mwene Uziya wakele na nzili, co washangumukile kulyalesa, eci cikeco camunenesele kuwa kwendi. Washawile Shukulu Kalunga Njambi yendi akukovela mu Njuvo ya Shukulu Kalunga nakwenyekela insense a mutula wa insense. 17Co Azaliya muka-kukombelela, amo na vaka-kwimanena va nzili vakusimpa vakupwa makumi atanu na atatu vakavele mwene munima. 18Vamuvindikile, co vamulekele ngwavo, “Ove Uziya! Yove kuwesi na moko yakwenyekela insense Shukulu Kalunga. Kuvanga vaka-kukombelela lika vaje vakutunda kuli Alone vaje vavajelesa laja vakevo vanapande kulinga evi. Tunda mu mwela ou wakujela. Unavulumuna kuli Shukulu Kalunga Njambi, co kuukawana lalo vivezikiso vyendi.”
19Uziya wemanene mu Njuvo ya Shukulu Kalunga kumukulo wa mutula wa insense, oku nakwata cikango cakwenyekela insense. Waluvalele na vaka-kukombelela, co vwasi-vwasi mushongo wa mbumba watuukile ku cihanga cendi. 20Co Azaliya na vakwavo vaka-kukombelela vakengele a luholo lwa mwene, co valikomokelele manene, vamutuwisile vwasi mu Njuvo ya Shukulu Kalunga. Co nendi watuukilemo vwasi, omwo Shukulu Kalunga wamuhisile.
21Co kutunda aje vene Mwene Uziya wapwile muka-mbumba mukuyoya kwendi kwoshe. Co kasele lalo kukovela mu Njuvo ya Shukulu Kalunga, oloni wakele mu njuvo yendi endi lika, co wecelele vipangi vyoshe, oloni munendi Yotame washwanene lifuti.
22Co Isaya muka-kwimanena muna Amoze wasonekele vyuma vyoshe vikwavo vije vyalingile Mwene Uziya a simbu yakushwana kwendi. 23Uziya watsile, vamutsindile kuyehi na vakukulwila vendi, oloni omwo mushongo wendi, kuvamutsindile mu vimbumbo vya vumwene. Co munendi Yotame wamushwanene kupwa mwene.
The Bible in Mbunda ©The Bible Society of Zambia, 2006