2 Mizimbu 11
11
Vuka-kwimanena vwa Shemaya
(1 Vim 12:21-24)
1Omo Mwene Lehovowame wetele mu Yelusalema, wakungulwile mashwalale vakupwa 180,000 vakulwa mwamuvwa va ku miyati ya Mbenjemani na Yunda. Washakele kukalwa nzita ngeci elwise vumwene vwendi vwakushwana miyati ya Isalele ya ku kunto. 2Oloni Shukulu Kalunga walekele Shemaya muka-kwimanena, 3kwambulula lijwi eli kuli Mwene Lehovowame na kuli vanu voshe va ku miyati ya Yunda na Mbenjemani ngwendi, 4“Kesi mulwise vandolome veni, vanu va Isalele. Ilukeni kwimbo yeni voshe. Eci cinalingiwa cinapu cizango cange.” Voshe vononokele kushika kwa Shukulu Kalunga, co kuvaile nakulwisa Yelovowame.
Lehovowame aaka vinganda mu vimpaka
5Lehovowame wakele mu Yelusalema, co watungile vimpaka ku vinganda vya Yunda nevi vya Mbenjemani mazina avyo awa, 6Mbetelehema, na Etame, na Tekowa, 7na Mbetezule, na Soko, na Andulame, 8na Ngate, na Malesha, na Zife, 9na Andolaime, na Lakishe, na Azeka, 10na Zola, na Ainjalone, na Hevelone. 11Co waakele evi vinganda mu vimpaka vyakukola manene, wemikile vaka-kushika ku nganda imo na imo, co mu nganda imo na imo waakelemo njuvo yakutulikila vyakulya, na mazi a olive, na vinyu, 12na vintelo na makunga. Co mu ngila eyi Yunda na Mbenjemani vyapwile vyendi.
Vaka-kukombelela na vaLevi vaija ku Yunda
13Kutunda ku mitambela yoshe ya Isalele, vaka-kukombelela na vaLevi vezile ku Yunda kutunda ku mbwela. 14VaLevi vasezele vulilo vwa vimuna vavo na mitambela ikwavo, vezile ku Yunda na ku Yelusalema, omwo Mwene Yelovowame wa Isalele na vana vendi vavashekele ngwavo kesi vapange vipangi vya vuka-kukombelela kuli Shukulu Kalunga. 15#1 Vim 12:31 Co Yelovowame wemikile vaka-kukombelela vendi, vapange ku myela ije yakulemesela vinjambi va vaka-kujeneka kukulaela nakulemesa minzinzime yakujwala na tumponya vaje vaashongele mu cifwa ca vana va vingombe. 16Co miyati yoshe ya vanu va Isalele, vaje vashakele kulemesa mwamuvwa Shukulu Kalunga Njambi ya Isalele, vakavele vaLevi ku Yelusalema, ngeci vakakombelele vin̄ombelo kuli Shukulu Kalunga Njambi ya vakukulwila vavo. 17Eci cakolesele vumwene vwa Yunda, co a myaka itatu vakwasele Lehovowame muna Solomoni, co vayoyele ngwe muje muvakele mu vushwana vwa Mwene Ndaviti na Mwene Solomoni.
Naanga ya Lehovowame
18Lehovowame wambatele Mahalate, ishe wapwile Njelimote muna Ndaviti, vaina vapwile Avihaile, muna Elyave muna Njesi. 19Vakele na vana va vanalume vatatu, Njeushi, na Shemaliya, na Zahame. 20Co lalo wambatele Maka, muna Avisalome, vakele na vana vawana, mazina avo, Aviya, na Atai, na Ziza, na Shelomiti. 21Kupandakana voshe, Lehovowame wakele na vanakazi likumi na vatanu na vatatu, co mashano vendi va mbanja vapwile makumi atanu na limo, wakele na vana va vanalume makumi avali na vatanu na vatatu, na vana va vanakazi makumi atanu na limo. Oloni akati ka vanakazi vendi voshe, na mashano vendi va mbanja, wazemeneo manene Maka, 22co akati ka vana vendi voshe va vanalume wazemeneo Aviya kutuvakana vana vendi voshe, wamwangwile ngeci akamushwane a vumwene. 23Lehovowame walingile vya mana, washandwelele vana vendi mu mafuti a Yunda na Mbenjemani mu vinganda vya vimpaka. Co wavanene vyakulya vyavingi nakuvambatela vanakazi vavangi.
The Bible in Mbunda ©The Bible Society of Zambia, 2006