2 Mizimbu 10
10
Miyati ya ku kunto valyangunuka
(1 Vim 12:1-20)
1Lehovowame waile ku Shekeme, kuje vanu voshe va Isalele valikungulwile nakumupwisa mwene. 2Omo Yelovowame muna Nembate, uje waile ku Ingito kutewa Mwene Solomoni wazivile muzimbu ou, co welukile kwimbo kutunda ku Ingito. 3Ngecivene, vanu va ku kunto vamusanene, co voshe vaile amo kuli Lehovowame vendekele kuli ikeye ngwavo, 4“Isho Solomoni watuyandesele manene nakutulemuwisa na vitele vyavikalu. Nga ututepulula ku vulemu ovu nakutuyoyesa mwamuvwa, co tukakupangela na kulongwa.”
5Co Lehovowame wavakumbulwile ngwendi, “Njaneni tai matangwa atatu njicikayongole n̄anda eyi. Asinoni mwija.” Ngecivene, vanu vaile.
6Mwene Lehovowame wehwile vanalume va vakulunu vaje vakele nakunangula ishe Solomoni ngwendi, “Vati munjinangula ngeci njakukumbulule ava vanu?”
7Vamukumbulwile ngwavo, “Nga ushaka kupangela vanu ava mwamuvwa kumbulula mwamuvwa cihula cavo, co simbu yoshe vakakupangela na kulongwa.”
8Oloni Lehovowame walimbulwile kunangula kwa vakulunu, waile kuli vakwenje vaje muvakolelele amolika vakevo valizivasanene amo. 9Wavehwile ngwendi, “Mu ngila muka mumunjinangwila? Njikendeka vatijo kuli vanu ava valinakunjilomba ngeci njehwise vitele vyavo?”
10Co vaje vakwenje vamukumbulwile ngwavo, “Valeke ngwove, ‘Mulavo wa ku shongo ya livoko lyange unahimi manene kutuvakana nyonga ya tate!’ 11Valeke lalo ngwove, ‘Tate wamitwikile vitele vyakulema, oloni yange njikamilemuwisa manene. Tate wamipupisile civanzi, oloni yange njikamipupisa civanzi ca mambimbo!’ ”
12Co omo kwetile matangwa atatu, Yelovowame na vanu voshe velukile kuli Mwene Lehovowame ngwe muje mwavashikile. 13Mwene Lehovowame walimbulwile kunangula kwa vaje vakulunu va vanalume, co wendekele na vukalu manene kuli vaje vanu, 14ngwe muje muvamunangwile vaje vakwenje. Wendekele ngwendi, “Tate wamitwikile vitele vyakulema, yange njikamilemuwisa manene. Tate wamipupisile civanzi, oloni yange njikamipupisa civanzi ca mambimbo!” 15Eci capwile cizango ca Shukulu Kalunga Njambi ngeci ashulise vije wendekele kuli Yelovowame muna Nembate muli Ahiya muka-kwimanena wa ku Shilo. Eci cikeco calingisile mwene ngeci kesi atolilile kuli vanu.
16 #
2 Sam 20:1
Omo vanu vamwene ngeci mwene kavatolilila, vatambekele ngwavo, “Ndaviti na naanga yendi vatunde! Vikajo vanatulingila? Yetu kutwesi na vushwana mu naanga ya Njesi. Yetu vanu va Isalele, tuyeni ku membo etu! Mweceleni Lehovowame alimwene!”
Ngecivene, vanu va Isalele vamutengulukilile, 17co vasezele Lehovowame kupwa lika mwene wa vanu vaje vakele mu lifuti lya Yunda.
18Asinoni Mwene Lehovowame watumine Andonilame, uje wapwile mukulunu wa vipangi, aye kuli vaIsalele, oloni vakamwashele mamanya nakumutsiya. Co a cuma eci, Lehovowame wazambwile vwasi kulonda mu litemba lyendi, co watewelele ku Yelusalema. 19Kutunda a simbu ije vene vanu va ku kunto ya Isalele vatengulukilile vumwene vwa Ndaviti.
The Bible in Mbunda ©The Bible Society of Zambia, 2006