1 Samwele 20
20
Yonatana akwasa Ndaviti
1Ndaviti watewele kutunda ku Nayote mu Lama, waile kuli Yonatana. Ndaviti wamwihwile ngwendi, “Vikajo njalingi? Mulonga ukajo unjinalingi? Vuvi vuka vunjinalingi kuli isho vwashaka kunjitsiila?”
2Yonatana wamukumbulwile ngwendi, “Njambi kesi atave ngeci yove utse! Tate akanjileke vyuma vyoshe vyakalingi, vyakama nambe vyavindondo, co ikeye kasa kunjishwekela vyuma evi. Kesi mukemwo embwe!”
3Oloni Ndaviti wakumbulwile ngwendi, “Isho nazivuka mwamuvwa ngeci yove wanjizema manene, evi nayongola kasa kukulekavyo ngeci uvizivuke, omwo vikuzivisa ku mbunge longoto. Njilinakulisinga kuli yove a lizina lya Shukulu Kalunga wakuyoya ngwange yange kunjesi kulyala na kutsa!”
4Yonatana wendekele ngwendi, “Njikakulingila vyoshe viwushaka.”
5 #
Kul 28:11
Ndaviti wamukumbulwile ngwendi, “Imene kuli Ciwano ca Kutenama kwa Ngonde, njinapandele kukalya na mwene. Oloni nga utava, co njikaya nakuvanda mu shwata noo indele cingwezi. 6Nga isho akananguka ngeci njiwaiko ku vyakulya, muleke ngwove, ‘Ndaviti nanjilombele ngeci ashatukile ku Mbetelehema, omwo ikeyo simbu yakukombelela n̄ombelo ya a mwaka na mwaka ku naanga yoshe.’ 7Nga endeka ngwendi, ‘Mwamuvwa,’ co njikakala mwamuvwa, oloni nga aluvala, co yove ukazivuka ngeci ikeye ashaka kunjivulumuna. 8Ngecivene, njizivileko ngozi, omwo yange nove tunalikumiiya cikumiiyo cakujela. Oloni nga yange njinaviisa, co njitsiye vene yove! Omwo vikajo unjitwala kuli isho nakunjitsiya?”
9Yonatana wamukumbulwile ngwendi, “Kesi weseke nambe kamandondo kuyongola ngacije! Nga njazivukile ngeci tate ashaka kukutsiya, nga kunjakulekele ndi?”
10Ndaviti wehwile ngwendi, “Iyajo akanjileka nga isho akakukumbulula na vukalu?”
11Co Yonatana wendekele kuli Ndaviti ngwendi, “Tuye mu shwata.” Co vaile, 12Yonatana wendekele kuli Ndaviti ngwendi, “Shukulu Kalunga, Njambi ya Isalele, apwe mukaleo wetu! A simbu ino vene imene, nambe indele, njikamwihula tate. Nga viyongola vyendi ali yove vinapu vyavivwa, co njikakuleka. 13Nga ikeye nayongola kukuvulumuna, Shukulu Kalunga anjitsiye nga kunjikuleka nakukwamena ngeci utewe. Shukulu Kalunga akale amo nove ngwe mwakele amo na tate! 14Co nga njiciyoya, mukwetu, nyunga cikumiiyo cove cakujela, co njikulaele, oloni nga njitsa, 15#2 Sam 9:1 kala nakutetela kwangacije ku naanga yange ku myaka yoshe. Omwo Shukulu Kalunga akanyongesa vitozi vove voshe, 16co cikulaeso cetu kuli umo na mukwavo kesi cikapokoke. Nga cikapokoka, co Shukulu Kalunga akakuhisa.”
17Co Yonatana wasingisile Ndaviti cikulaeso cakumuzema. Omwo Yonatana wazemene manene Ndaviti ngwe mwalizemene ikeye vavenya. 18Co Yonatana wendekele kuli Ndaviti ngwendi, “Imene linapu litangwa lya Ciwano ca Kutenama kwa Ngonde, co nga kuukakalako kukulya, vakakutonda. 19Indele vakakutonda manene, ngecivene, ya ku mutambela kuje kuwakavandele simbu ya kunima, ya ukavande kunima ya mutumbo wa mamanya. 20Co njikashao mikili itatu, ngwe njasha cuma. 21Njikatuma ngamba yange ngeci akainone. Co nga njimuleka ngwange, ‘Kenga, mikili ili ku mutambela wove oku, inone,’ eci cinanunguluka ngeci kukwesi vushonde, co wasa kwija. Njilisinga ali Shukulu Kalunga wakuyoya ngwange kuukakala mu vukalu. 22Oloni nga njimuleka kwange, ‘Mikili ili ku mutambela wove ukwavo,’ co ya, omwo Shukulu Kalunga nakutumu kuya kulyala. 23Ngwe ku cikulaeso eci tunalingi kuli umo na mukwavo, mwa vushunga Shukulu Kalunga akacikolesa myaka yoshe.”
24Ngecivene, Ndaviti wakavandele mu shwata. Co ku Ciwano ca Kutenama kwa Ngonde, Mwene Saulu wezile kukulya, 25co watumbamene mu mwela wendi wakatumbama simbu yoshe ku civumbe. Avinele watumbamene kuyehi nendi, co Yonatana watumbamene musambwa lije lya mesa walikengele nendi. Mu mwela wa Ndaviti mwakele mwangoco, 26oloni Saulu kendekele cuma cimo ku litangwa lije, omwo wayongwele ngwendi, “Amo cuma cimo cinalingiwa kuli ikeye, co amo kajelele ku mashiko.” 27Co alikaki, omo litangwa lya Ciwano ca Kutenama kwa Ngonde cineti, mu mwela wa Ndaviti lalo mwakele mwangoco, co Saulu wehwile Yonatana ngwendi, “Omwo vika Ndaviti kezile kukulya izau na lelo?”
28Yonatana wamukumbulwile ngwendi, “Nanjilombele njimutave aye ku Mbetelehema. 29Omwo naanga yendi valinakulisamba a ciwano cakukombelela mu nganda, co ndolome yendi namushikile ngeci akakaleko. Ngecivene, nga yange njinapu nji musamba wendi, njinapande kumutava aye akamone vavushoko vwendi. Eci cikeco camujenekesa kukala mu mwela wendi kukulya.”
30Saulu waluvalele manene na Yonatana, wendekele kuli ikeye ngwendi, “U mwana wamuvi manene yove! Ololo njazivuka ngeci yove unawila kumo na Ndaviti, co ulinakulishawisa yove vavenya, nakushawisako lalo vanyoko! 31Kuma yove kuwanangukile ngeci nga Ndaviti ayoya, co kuukasa kupwa mwene mu lifuti lino ndi? Ololo ya ukamushake, napande kutsa!”
32Yonatana wakumbulwile ishe ngwendi, “Vikajo vyanalingi vyatsila?”
33Co aje vene, Saulu washele likunga ngeci atsiye Yonatana, co Yonatana wanangukile ngeci ishe mwa vushunga nalishiki kutsiya Ndaviti. 34Co Yonatana wakatukile ku mesa nakuluvala, kalile cuma cimo ku litangwa lije, lyapwile litangwa lyamucivali lya Ciwano ca Kutenama kwa Ngonde. Walinyengele ali Ndaviti, omwo ishe wamushawile. 35Co alikaki mutondo, Yonatana waile mu shwata nakuliwana na Ndaviti, ngwe muvalizivasanene. Waile na mukwenje, 36co wendekele kuli ikeye ngwendi, “Shatuka ukashake mikili injasha.” Co mukwenje washatukile, Yonatana washele mukili kulutwe lwendi. 37Omo mukwenje wetele ku mwela uje wawililile mukili, Yonatana watambekele manene kuli ikeye ngwendi, “Mukili unawila kulutwe! 38Kesi wimane lika oko! Zambulako!” Co mukwenje wanonele mukili welukile kuli shukulu yendi, 39ikeye kazivukile cije calingiwile, kuvanga Yonatana na Ndaviti vakevo lika vazivukile. 40Yonatana waanene vitwa vyendi kuli mukwenje, co wamulekele aviilwise ku nganda.
41Omo mukwenje nai laja, Ndaviti watundile kuje ku mutumbo wa mamanya, co watsikamene asi visimbu vitatu nakulemesa. Co ikeye na Yonatana muvuvali vwavo, valilile omo valitsembele, co Ndaviti wazivile vusiwa manene kutuvakana Yonatana. 42Asinoni Yonatana wendekele kuli Ndaviti ngwendi, “Njambi akale amo nove. Mwa vushunga Shukulu Kalunga akale amo netu, vatekulwila vove na vatekulwila vange, vakanyunge nakukolesa cikumiiyo cakujela eci tunalikumiiya.” Asinoni Ndaviti waile, co Yonatana welukile ku nganda.
The Bible in Mbunda ©The Bible Society of Zambia, 2006