1 Samwele 19
19
Ndaviti vamuyandesa kuli Saulu
1Saulu walekele munendi Yonatana na vamyata vendi voshe vutumbe vwendi vwakutsiya Ndaviti. Oloni Yonatana wazemene Ndaviti, 2co Yonatana walekele Ndaviti ngwendi, “Tate ashaka kukutsiya. Ngecivene, nyanyama imene mutondo-tondo, vanda ku mutambela umo, co ukakala kuje vene. 3Njikemana kuyehi na tate mu lihya muje muukavanda, njikamuleka vyove. Co nga kuli cuma cimo, co njikakuleka.”
4Yonatana washangazalele Ndaviti kuli ishe Saulu wendekele ngwendi, “Mwane, kesi ulinge cuma cacivi kuli ngamba yove Ndaviti. Ikeye kalingile mwamuvi kuli yove embwe, vyoshe vyanalingi vyakukwasa manene yove. 5Ikeye wecelele mwonyo wendi omo watsiile Ngolyata, co Shukulu Kalunga wahyanesele manene vaIsalele. Omo wamwene vyuma evi, co wavwaelelele. Omwo vikajo ushaka kulinga mwamuvi kuli munu wakujeneka mulonga akutsiya Ndaviti omwo kesi na mulonga?”
6Saulu watolililile vyendekele Yonatana, co walisingile mu lizina lya Shukulu Kalunga ngwendi Ndaviti kakamutsii. 7Ngecivene, Yonatana wasanene Ndaviti, co wamulekele vyuma vyoshe. Asinoni wamutwalele kuli Saulu, co Ndaviti wapangelele mwene ngwe mwalingile akulivanga.
8Nzita na vaFilisitiya yashangumukile lalo, Ndaviti walwile navo, wavafungulwile, co vatewele.
9A litangwa limo, munzinzime wauvi wakutunda kuli Shukulu Kalunga wakovelele muli Saulu. Ikeye watumbamene mu njuvo yendi na likunga lyendi mu livoko, co na Ndaviti mwakele, wakele nakwimba kalyalya kendi. 10Saulu washakele kupulyasanena Ndaviti na likunga a civumbe, oloni lyamulojele, likunga lyakwatele mu civumbe, co Ndaviti watewele wakavandele.
11 #
Mya 59 (Mutwe wa n̄anda) A vutsiki vuje vene, Saulu watumine vanalume vamo vakanyunge njuvo ya Ndaviti ngeci mutondo vamutsiye. Co Mikale, munakazi wa Ndaviti, wamunangwile ngwendi, “Nga kuuvomboloka vutsiki vuno vene, imene vakakutsiya.” 12Co Mikale watuwisilile Ndaviti a njanena, co watewele nakukavanda. 13Ngecivene, Mikale wanonele kamponya kaakele mu njuvo, wakalangekele a vulili, wakele musato wa maka a vimembe ku mutwe wako, co wakafwikile. 14Omo vanu va Saulu vezilile Ndaviti, Mikale wavalekele ngwendi, “Ndaviti alinakuvinja.” 15Oloni Saulu wavelwisilileko lalo ngeci vakalimweneye vakevo vavenya. Ikeye wavashikile ngwendi, “Mwambateni na vulili vwendi mumunene kuno njakumutsiye.” 16Co vakovelele mukati, vawanene kamponya a vulili, na musato wa maka a vimembe ku mutwe wako. 17Co Saulu wehwile Mikale ngwendi, “Omwo vikajo unanjikwisila ngeci, watava citozi cange avomboloke?”
Co Mikale wamukumbulwile ngwendi, “Ikeye nendekele kuli yange ngwendi njikutsiya nga kuunjikwasa ngeci njivomboloke.”
18Ndaviti wavombolokele, waile kuli Samwele ku Lama, co wakamulekele vyoshe vije vyalingile Saulu kuli ikeye. Asinoni Ndaviti na Samwele vaile ku Nayote vakakele kuje. 19Asinoni valekele Saulu ngwavo, “Ndaviti ali ku Nayote ku Lama.” 20Ngecivene, watumineko vamo vanalume vakamukwate. Co vamwene mbunga ya vaka-kwimanena valinakwambulula vuka-kwimanena, amo na Samwele ntwama yavo. Co Munzinzime wa Njambi wakovelele muli vanu va Saulu, co na vakevo lalo vashangumukile kwambulula vuka-kwimanena. 21Omo Saulu wazivileko, watumineko tunganda lalo, co na vakevo lalo vashangumukile kwambulula vuka-kwimanena. Co lalo watumine tunganda vamucitatu, anga cuma cimo vene calingiwile kuli vakevo. 22Co ikeye vavenya Saulu waile ku Lama. Omo wetele ku lisima lyakama ku Seku, wehwile ngwendi, “Kuli vali va Samwele na Ndaviti?” Vamulekele ngwavo, “Vali ku Nayote mu Lama.” 23Omo waile kuje, Munzinzime wa Njambi wakovelele muli ikeye lalo, co washangumukile kwambulula vuka-kwimanena mu ngila yoshe yakuya ku Nayote. 24#1 Sam 10:11-12 Co washulwile vuzalo vwendi wakinine nakwambulula vuka-kwimanena ku mesho a Samwele, co wakele ngacije vene mushelengwa litangwa lyoshe lije, na vutsiki vwoshe vuje. (Omu mukemwo yashangumukilile n̄anda yakwendeka ngwavo, “Kuma na Saulu napu muka-kwimanena ndi?”)
The Bible in Mbunda ©The Bible Society of Zambia, 2006