1 Samwele 16
16
Ndaviti vamuvwavesa mazi kupwa mwene
1Shukulu Kalunga wendekele kuli Samwele ngwendi, “Visimbu vingai ukalinyenga ali Saulu? Yange njinamuvyana kupwa mwene wa mu Isalele. Oloni ambata mazi a olive uye ku Mbetelehema, ku munalume umo lizina lyendi Njesi, omwo njinalyangwila umo akati ka vana vendi kupwa mwene.”
2Samwele wakumbulwile ngwendi, “Njiyako vati? Nga Saulu akaciziva, co akanjitsiya!”
Shukulu Kalunga wamukumbulwile ngwendi, “Ambata muna ngombe uye nendi, ukendeka ngwove njinaija kuno nakukombelela n̄ombelo kuli Shukulu Kalunga. 3Co lanyako Njesi kukukombelela, co yange njikakuleka viwunapande kulinga. Ukavwavesa mazi munu uje injikakuleka apwe mwene.” 4Samwele walingile vije vyamulekele Shukulu Kalunga, waile ku Mbetelehema, co vantwama va mu nganda vazivile lyova akuliwana nendi, co vamwihwile ngwavo, “Unaija mu kwoloka ndi?”
5Ikeye wavakumbulwile ngwendi, “Eyo, njinaija mu kwoloka, njinaija nakukombelela kuli Shukulu Kalunga. Lijeleseni ngeci tuye amo nange nakukombelela.” Walekele lalo Njesi na vana vendi ngeci valijelese, co wavalanyele kukukombelela.
6Omo vetele, Samwele wamwene Elyave muna Njesi, co wayongwele ngwendi, “Mwa vushunga ou ikeye yanaangula Shukulu Kalunga.” 7Oloni Shukulu Kalunga wendekele kuli Samwele ngwendi, “Kesi ukenge ku vuvwa vwendi, nambe kukutunuka kwendi embwe, Yange njinamuvyana, omwo yange kunjimono ngwe muvakamono vanu embwe. Omwo munu akakenge cifwa ca anja, oloni yange njikamono mu mbunge.”
8Co Njesi wasanene munendi Avinandave wamunenele kuli Samwele. Oloni Samwele wendekele ngwendi, “Embwe, Shukulu Kalunga kaangwile ou.” 9Asinoni Njesi wanenele Shama. Co Samwele ngwendi, “Embwe, Shukulu Kalunga kaangwile ou.” 10Mu ngila eyi Njesi wanenele vana vendi vatanu na vavali kuli Samwele. Co Samwele wendekele kuli ikeye ngwendi, “Embwe, Shukulu Kalunga kaangwile ava.” 11Co Samwele wehwile Njesi ngwendi, “Kukwesi vana vove veka lalo ndi?”
Co Njesi wamukumbulwile ngwendi, “Kwali shongo yavo, oloni ikeye muka-kunyunga vimanga.”
Samwele wendekele ngwendi, “Tumako munu akamushake. Kutwasa kukombelela kuvanga ikeye naija.” 12Ngecivene, Njesi watumineko munu kukamushaka. Ikeye wapwile wamuvwa, mukwenje wakuvenga, mesho endi apwile amavwa. Co Shukulu Kalunga wendekele kuli Samwele ngwendi, “Katuka umuvwavese mazi, omwo ikeye vene ou!” 13Co Samwele wambatele lilulu lya mazi a olive, wavwavesele Ndaviti ku mesho a vandolome vendi. Co aje vene Munzinzime wa Shukulu Kalunga wezile na nzili ali Ndaviti, wakele amo nendi kutunda ku litangwa lije. Asinoni Samwele welukile ku Lama.
Ndaviti aimba kalyalya ku mesho a Saulu
14Co Munzinzime wa Shukulu Kalunga watundile muli Saulu, ngecivene, Shukulu Kalunga watumine munzinzime wauvi, co wamuyandesele. 15Co vangamba va Saulu vendekele kuli ikeye ngwavo, “Tunazivuka ngeci Njambi natumu munzinzime wauvi ukewo ulinakukuyandesa. 16Ngecivene, twane lishiko, tutonde munu uje azivuka kwimba kalyalya. Omo aimba kalyalya kendi, co munzinzime wauvi ukatunda muli yove, co ukakala mwamuvwa lalo.”
17Co Saulu wavashikile ngwendi, “Njishakezekeleni munu uje azivuka kwimba mwamuvwa, mumunene kuli yange.”
18Co umo wavo wendekele ngwendi, “Njesi wa mu limbo lya Mbetelehema, ali na mwana wa munalume azivuka kwimba mwamuvwa. Ikeye wapwa lalo wakusimpa, munalume wamuvwa manene, lishwalale wamuvwa, muka-lwashu lwa kwendeka. Co lalo Shukulu Kalunga ali amo nendi.”
19Ngecivene, Saulu watumine miluwa kuli Njesi wamulekele ngwendi, “Njitumineko munove Ndaviti, uje muka-kunyunga vimanga.” 20Co Njesi walemekele cimulu, waakeleo makende, na njeke ya cilambu ya vinyu, na muna membe, wavitumine amo na munendi Ndaviti kuli Saulu. 21Ngecivene, Ndaviti wetele kuli Saulu, co wakovelele ku vipangi vyendi. Saulu wazemene manene Ndaviti, co wamwangwile kupwa muka-kwambata vitwa vyendi vya nzita. 22Asinoni Saulu watumine majwi kuli Njesi ngwendi, “Njimuzema Ndaviti. Akale ku vipangi vyange.” 23Kutunda aje, omo munzinzime wauvi uje watumine Njambi wezile ali Saulu, co Ndaviti wanonele kalyalya kendi nakukemba. Co munzinzime wauvi watundile ali Saulu, Co Saulu wakele mwamuvwa.
The Bible in Mbunda ©The Bible Society of Zambia, 2006