Zacarías 13
13
1Jaꞌ yet jun cꞌual tuꞌ, oj jajcha jun snukꞌ jaꞌ, yet watxꞌ oj skeꞌ xꞌale el spenail, cꞌal spenail ebꞌ yicꞌaal David, yetoj cꞌal ebꞌ caan bꞌey Jerusalén. 2Jain Jehová jin tiꞌ chi walaꞌ, tol jaꞌ bꞌey yul masanil jun nación tiꞌ oj wakꞌ lawoj el masanil tzet chi al-le oc diosal, yet watxꞌ cꞌamxa chi naꞌletej sbꞌi ebꞌ. Oj wiꞌon cꞌal pax el masanil ebꞌ chi yaloc sbꞌa jin chejabꞌoj bꞌey yul jun conobꞌ tiꞌ, cꞌal masanil ebꞌ eyoc snaꞌbꞌal yin ebꞌ demonio.
3Yu jun tuꞌ, ta ey junoj mac chi xij yalel jin kꞌane, jaꞌ smam cꞌal xutx oj alon tet jaxca tiꞌ: Jaach tiꞌ, oj jaach camoj, ¿tzet yu, yuxan cha tecꞌbꞌa ja bꞌa ja walon el lekꞌtiꞌal kꞌane yin tol jaxca tol yet Jehová? ẍi ebꞌ tet. Jacꞌal oc smam cꞌal xutx tuꞌ, oj tejon camoj, yutol jix xij yaloc sbꞌa jin chejabꞌoj. 4Jaꞌ yet jun cꞌual tuꞌ, jaꞌ masanil ebꞌ chi yaloc sbꞌa jin chejabꞌoj, oj qꞌuixwoj a ebꞌ yu tzet jix txꞌoxle yilaꞌ. Manxa oj yaoc an eel pichile ebꞌ jaxca yet ebꞌ jin chejabꞌ, yu yiꞌon eytej sat ánima; 5yutol junjun cꞌal oj yal jaxca tiꞌ: Jain tiꞌ, man ẍejabꞌoj Dios jin; asan tol mulnawom jin. Yet tax cꞌal yaliẍ jin to, jix jin qꞌueytzele yin mulnail, ẍi, oj yaloni. 6Ta ey junoj mactxequel chi kꞌanlen tet jaxca tiꞌ: ¿Tzet yeoc wan yasil eyoc yechel ja win tuꞌ xin?#13:6 Jaꞌ ebꞌ chi yaloc sbꞌa ẍejabꞌoj Dios, chi smakꞌ yasoj smimanil ebꞌ, jatacꞌalaꞌ yalon scuybꞌanil ebꞌ. ta ẍi. Oj spajtzen jaxca tiꞌ: Jaꞌ bꞌey sna ebꞌ jin watxꞌil ánima jix jin makꞌle yasoj, ẍi, oj yaloni, ẍi Jehová.
Oj Makꞌle Cam Naj Steynemal Sconobꞌ Dios
7Jaꞌ Jehová, Naj Miman Yeoc Yipalil, jaꞌ chi alon jaxca tiꞌ:
Iꞌle ojabꞌ a chꞌen espada yu stejle cam jun Naj jaxca ilom meꞌ, jaꞌton Naj junne cꞌal ey wetoj. Oj makꞌle camoj, catuꞌ oj sajlem cantoj ebꞌ jaxca jin meꞌ yeocoj. Jal ebꞌ tol cꞌam yip jaxca noꞌ yuneꞌ meꞌ, jain oj wakꞌ lawoj ey ebꞌ.
8Jain Jehová jin chi walaꞌ, tol jaꞌ ebꞌ caan bꞌey jun nación tiꞌ, ecꞌbꞌan nan ebꞌ oj camoj. Jaywanxane ebꞌ oj iquisbꞌoj can ecꞌoj.
9Jaꞌ ebꞌ chito cancan tuꞌ, oj waoc syaꞌilal ebꞌ, yet chi elcan spenail ebꞌ, jaxca chi yun sajbꞌanele el chꞌen plata xol kꞌakꞌ, cꞌal jaxca chi yun swaꞌxi el chꞌen oro. Oj lawoj tuꞌ xin, oj jin yawte ebꞌ yetoj, catuꞌ oj jin takꞌwoj tet ebꞌ. Oj waloni tol jin conobꞌ ebꞌ; jaxa ebꞌ oj alon jaxca tiꞌ: Jaꞌton Jehová cu Diosal, ẍi ebꞌ, oj yalon ebꞌ, ẍi Dios.
Currently Selected:
Zacarías 13: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
