Zacarías 14
14
Watxꞌ Oj Eloc Jerusalén Yet Slawubꞌal
1Tuxa wal chi jul scꞌual sjowal scꞌul Jehová, yutol jaꞌ ebꞌ chi jowi oc yin ebꞌ caan bꞌey Jerusalén, jaꞌ yul conobꞌ tuꞌ oj spoꞌoecꞌ jantaj tzettaj yetal oj yiꞌecꞌ ebꞌ tet ebꞌ. 2Jaꞌ yet jun cꞌual tuꞌ, oj yambꞌale oc masanil nacionlaj yu Jehová, oj yakꞌon jowal ebꞌ yin Jerusalén. Catuꞌ oj eyqꞌuey jun conobꞌ tuꞌ yu ebꞌ. Oj uchle eltej ebꞌ caan bꞌey Jerusalén tuꞌ yul-laj sna, cꞌal yetnele ebꞌ ix ix yu wan scajat ebꞌ tuꞌ, catuꞌ oj iꞌletoj nanoj ebꞌ yin jaxca presowomal. Jaywanxane ebꞌ oj cancanoj. 3Yin cꞌal eymanil oj eltej Jehová yakꞌon jowal yetoj wan nación tuꞌ, jaxca cꞌal jix yun yakꞌon jowal yet peyxa. 4Jaꞌ yet jun cꞌual tuꞌ, oj ey bꞌatxna yajan Naj bꞌey wonan Olivo bꞌey sattaj Jerusalén, yetcꞌulal bꞌey chi aol cꞌu. Oj poꞌocha ey snan jun wonan Olivo tuꞌ, panan xacꞌal oj yun cantoj, catuꞌ oj jajcha jun miman jobꞌe, chi tit yetcꞌulal bꞌey chi aol cꞌu, chi ecꞌtoj yetcꞌulal bꞌey chi too cꞌu. Jaꞌ nanoj jun wonan tuꞌ, oj tojcan bꞌey yetcꞌulal norte; jal nanxa, oj tojcan bꞌey yetcꞌulal sur. 5Jaꞌ tituꞌ oj jex ela bꞌey yul jun jobꞌe snan xol caabꞌ wonan tuꞌ, yutol oj apnoj tacꞌal oc bꞌey Asal, catuꞌ oj jex ela jaex tiꞌ, jaxca jix yun yela ebꞌ je mam icham yu jun quixcabꞌ jix ecꞌ yet eyoc naj Uzías yin reyal bꞌey Judá, jaxa sjul Jehová cu Diosal yetoj masanil ebꞌ yet xa.
6Jaꞌ yet tuꞌ, sajkꞌinal xacꞌal eloj, man oj txeclo yajan cꞌu, man pax oj kꞌejbꞌoj eyoj, catuꞌ cꞌamxa pax siic. 7Cꞌam junojxa cꞌual jaxca yet jun cꞌual tuꞌ, sajkꞌinal xacꞌal; cꞌam cꞌualil, tam wal ey akꞌbꞌalil, yuxan jaꞌ yet oj ey cꞌu, ey cꞌal sajkꞌinal. Jaꞌ yet jun cꞌual tuꞌ, asan Jehová yotaj tzet oj yunne. 8Jaꞌ yet tuꞌ, oj aol jun snukꞌ jaꞌ bꞌey Jerusalén, tol jacꞌalaꞌ yel sne yet naꞌbꞌil kꞌinal, cꞌal yet waresma, jaꞌ nanoj jun jaꞌ tuꞌ oj tojcan bꞌey jaꞌ Camnaj Mar; jal nanxa xin, oj tojcan bꞌey jaꞌ mar Mediterráneo. 9Jaꞌ yet jun cꞌual tuꞌ, asanne Jehová oj yakꞌ yaawil bꞌey masanil yul yibꞌankꞌinal tiꞌ. Asanxane sbꞌi Jehová oj akꞌle bꞌinaoj. 10Panan xacꞌal oj yun cantoj jun tujan txꞌotxꞌ oj toj tacꞌal bꞌey Guebá masantaꞌcꞌal bꞌey Rimón, bꞌey sur yet Jerusalén. Jal Jerusalén xin, naat oj yun can jaxca junoj wonan. Jaꞌ bꞌey oj caey ebꞌ ánima bꞌey conobꞌ Jerusalén, oj toj tacꞌal bꞌey spuertail yet Benjamín, masantaꞌcꞌal bꞌey spuertail yet xiquin ecꞌtoj bꞌey ey jun bꞌabꞌel puerta yet peyxa. Oj toj tacꞌal bꞌey storreal yet Hananel, masantaꞌcꞌal bꞌey chi tecꞌle el yal an yuva naj rey. 11Oj caey pax ánima bꞌey Jerusalén tuꞌ; cꞌamxa cꞌal tzet oj snaꞌ ebꞌ ánima yet tuꞌ, yutol manxa oj uchchatoj.
12Jal pax wan nación oj yakꞌ jowal yetoj Jerusalén xin, caw miman oj yun yale oc syaꞌilal ebꞌ yu Jehová. Jaꞌ ebꞌ ánima tuꞌ, yin wal yiquisal ebꞌ catuꞌ oj kꞌaꞌtoj ẍiꞌbꞌeal ebꞌ, oj kꞌaꞌtoj sbꞌakꞌ sat ebꞌ yul sbꞌajil, cꞌal yakꞌ ebꞌ yul stiꞌ. 13Jaꞌ yet jun cꞌual tuꞌ, caw oj a can xiwcꞌulal xol ebꞌ yu Jehová. Junjun xacꞌal oj smitxꞌle oc sbꞌa yetoj mac jaꞌjun yetoj, catuꞌ oj smakꞌlen cam sbꞌa ebꞌ. 14Jaꞌ yet tuꞌ, oj tit ebꞌ a Judá colwa yetoj ebꞌ a Jerusalén. Catuꞌ oj stokꞌon ecꞌ sbꞌeomal masanil nacionlaj ebꞌ ey bꞌey scawilal; miman chꞌen oro, chꞌen plata, cꞌal an pichile oj syambꞌa oc ebꞌ. 15Jacꞌal oc jun syaꞌilal oj eyqꞌuey yibꞌan ebꞌ ánima tuꞌ, jacꞌalaꞌ oj jul cꞌal pax yibꞌan noꞌ caballo, noꞌ mula, noꞌ camello, noꞌ bꞌuru, cꞌal yibꞌan masanil sjobꞌbꞌeal snoꞌ ebꞌ scajat ebꞌ eyecꞌ bꞌey bꞌulan ey ebꞌ tuꞌ.
16Jaꞌ yet oj lawoj wan tuꞌ xin, jaꞌ ebꞌ ánima oj to cancan bꞌey wan conobꞌ jix yakꞌ jowal yin Jerusalén tuꞌ, junjun cꞌal abꞌil oj jul yaon oc kꞌin ebꞌ yet wan pat na waꞌnebꞌil a yetoj xaj teꞌ, cꞌal yoc ebꞌ yin eyilal tet Naj Rey, jaꞌton Jehová, Naj Ey Yipalil. 17Ta ey junoj nación bꞌey yul yibꞌankꞌinal tiꞌ, tol cꞌam chi jul bꞌey Jerusalén tiꞌ, yu yoc yin eyilal tet Naj Rey, manxa oj eyqꞌuey nabꞌ bꞌey xꞌotxꞌal. 18Ta jaꞌ ebꞌ a Egipto cꞌam chi jul yaoc skꞌinal wan pat na waꞌnebꞌil a yetoj xaj teꞌ, oj jul syaꞌilal yibꞌan ebꞌ yu Jehová, jaxca cꞌal syaꞌilal oj jul yibꞌan wanxa nacionlaj, ta tol cꞌam chi jul ebꞌ tituꞌ. 19Jaꞌton jun syaꞌilal tuꞌ sowalil oj jul yibꞌan txꞌotxꞌ Egipto, cꞌal yibꞌan wanxa nación tol cꞌam chi jul chaꞌon skꞌinal wan pat na waꞌnebꞌil a yetoj xaj teꞌ.
20Jaꞌ yet jun cꞌual tuꞌ, jaꞌ yin chꞌen campana iꞌbꞌil oc yu noꞌ che, tzꞌibꞌebꞌil oc wan kꞌane jaxca tiꞌ: Yet cꞌal Jehová yeocoj, ẍi. Yetoj cꞌal txꞌotxꞌ xi oj kꞌanle bꞌey stemplo Jehová bꞌey oj ta noꞌ chiꞌbꞌe, yet xacꞌal Jehová yeocoj, jaxca wal yeoc mimej secꞌ chi kꞌanle bꞌey jun yet xaambꞌal. 21Masanil wan xi bꞌey Jerusalén cꞌal bꞌey Judá, yet Jehová, Naj Miman Yeoc Yipalil, yeocoj. Jaꞌ mac chi too yakꞌ junoj xaambꞌal tituꞌ, chi skeꞌ skꞌanon wan tuꞌ, catuꞌ chi yakꞌon ta noꞌ chiꞌbꞌe chi akꞌle yin xaambꞌal tuꞌ. Jaꞌ yet jun cꞌual tuꞌ, cꞌamxa ebꞌ txonwom oj il-le yin bꞌey stemplo Jehová, Naj Miman Yeoc Yipalil.
Currently Selected:
Zacarías 14: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
