Proverbios 3
3
Naꞌbꞌale Chi Al-lei Tzet Chi Yun Kiꞌon Cu Jelanil
1Jaach wuninal, cꞌam ojabꞌ chi too qꞌueycꞌulal wan cuybꞌanile tiꞌ ja wu,
cꞌubꞌa jin chejbꞌanil yin ja naꞌbꞌal,
2yet watxꞌ oj naatbꞌoj ja kꞌinal; catuꞌ tzalacꞌulal cꞌal oj jaach caey ecꞌoj.
3Cꞌam ojabꞌ cha bꞌejcan ja bꞌeybꞌalnen camcꞌulal cꞌal sjichanil, naꞌan ojabꞌ cꞌal ja wu, ey ojabꞌ cꞌal ecꞌ yin ja naꞌbꞌal jaxca cꞌal yeoc chꞌen yu ix ix yin snukꞌ.
4Ta jaxca tuꞌ oj ja wute ja bꞌeybꞌal, caw watxꞌ jaach yul sat Dios, cꞌal yul sat ebꞌ ja wet animail.
5Aoc ja naꞌbꞌal yin Jehová yin masanil ja cꞌul; cꞌam ojabꞌ cha waoc ja jelanil yipoj ja cꞌul.
6Naꞌcꞌaltej Jehová yin masanil tzet cha wunne, jaꞌ Naj oj jaach iꞌontoj yin watxꞌ bꞌeybꞌale.
7Cꞌam ojabꞌ cha naꞌ tol jelan jaach yul ja wet; ey ojabꞌ yeloc apnoj Jehová yul ja sat, catuꞌ cha poꞌon el ja bꞌa xol spenail.
8Ta jaxca tuꞌ oj ja wute ja bꞌeybꞌal, jaꞌ Jehová oj akꞌon ja cawil, catuꞌ ey cꞌal yip ja mimanil.
9Akꞌ yofrendail masanil tzet ey yul ja kꞌabꞌ, yu ja wiꞌon a can sbꞌi Jehová, cha wakꞌon yofrendail ja bꞌabꞌel sat awo.
10Ta jaxca tuꞌ oj ja wunne, caw oj no ja cꞌunaꞌ yu sat ja wawo, ey cꞌal ja loꞌbꞌe ey cꞌal pax tzet oj ja wucꞌ yin masanil tiempo.
11Jaach wuninal, cꞌam ojabꞌ cha wintajne el stenchebꞌal Jehová, cꞌam ojabꞌ cha wakꞌ caabꞌcꞌulal yet chach yakꞌon cuenta.
12Yutol jaꞌ ebꞌ camcꞌulnebꞌil yu Jehová, chi akꞌle cuenta ebꞌ yu jaxca chi yun yakꞌon cuenta yuninal junoj mame, yutol chi tzala yetoj yuninal.
13Caw tzalacꞌulal yet mactxequel chi yiꞌ sjelanil, yutol caw ey snaꞌbꞌal chi elocoj.
14Yel xacꞌal watxꞌ jun jelanil tuꞌ yintaj chꞌen plata, ecꞌbꞌanxa swatxꞌil yintaj chꞌen oro.
15Jaꞌ jelanil tuꞌ, yel xacꞌal ecꞌbꞌan swatxꞌil yintaj chꞌen chꞌen chi oc yelawiloj chꞌen kolkꞌabꞌe. Cꞌam cꞌaltaꞌ bꞌakꞌin chi skeꞌ cu laanbꞌane jun jelanil tuꞌ yetoj wanojxa tzetyetal caw ochebꞌil.
16Yu jelanil chi naatbꞌi cu kꞌinal, chi cu oc bꞌeomal yu, catuꞌ chi cu bꞌinale cꞌal pax ecꞌ yu.
17Ta tol chi cu bꞌeybꞌalne jelanil, caw tzalacꞌulal cꞌal chi ecꞌ tiempo ku, cꞌam cꞌal tzet chi cu naꞌ.
18Ta tol chi cu bꞌeybꞌalne jelanil, caw ey cꞌal cu kꞌinal, caw tzalacꞌulal ket ta chi cu cꞌubꞌa jun jelanil tuꞌ yin cu naꞌbꞌal.
19Jaꞌ yetoj sjelanil Jehová, jix swaꞌne satcan, cꞌal txꞌotxꞌ txꞌotxꞌ tiꞌ.
20Yu sjelanil tuꞌ yuxan chi aol jaꞌ snukꞌ jaꞌ, catuꞌ chi tit nabꞌ xol asun, catuꞌ jix poꞌole can el jaꞌ mar yu.
21Jaach wuninal, cꞌam ojabꞌ chi too qꞌueycꞌulal jelanil cꞌal watxꞌ naꞌbꞌale ja wu; cꞌam ojabꞌ cha wiꞌel ja sat yin.
22Queyton tuꞌ oj yun snaatbꞌoj ja kꞌinal yul yibꞌankꞌinal tiꞌ, catuꞌ watxꞌ oj jaach eloc sattaj ebꞌ ja wet animail, jaxca wal swatxꞌil yili chꞌen ue eyoc yin snukꞌ ix ix.
23Yin cꞌal tzalacꞌulal oj yun ja wecꞌabꞌi, cꞌam cꞌal tzet oj jaach ionoj.
24Jaꞌ yet oj jaach xewoj, cꞌam cꞌal bꞌey oj jaach xiwoj, yin cꞌal tzalacꞌulal oj jaach weyoj.
25Cꞌam cꞌal bꞌey oj jaach xiwoj, caxcꞌal mi cha naꞌ ta ey tzet chi jul ja wibꞌan, jaxca chi yun sjul yibꞌan ebꞌ pena sbꞌeybꞌal.
26Yutol cha waoc Jehová yipoj ja cꞌul, yuxan man oj jaach eyqꞌuey yul junoj yaal.
27Bꞌejan ojabꞌ ja cꞌul ja colwa tet mactxequel chi skꞌan ja colwal, ta tol chi skeꞌ ja colwa yetoj tinaniꞌ.
28Ta chi skeꞌ ja colwa tinaniꞌ, cꞌam ojabꞌ cha walaꞌ tol jato yet yecal chach colwa yetoj.
29Cꞌam ojabꞌ chach jowi oc yin masanil ja wet animail cꞌal ebꞌ caan ja cawilal, yutol cꞌam chi yakꞌ caabꞌcꞌulal ebꞌ ja win.
30Cꞌam ojabꞌ cha wakꞌ jowal yetoj junoj mactxequel, ta tol cꞌam tzet chach yute ebꞌ.
31Cꞌam ojabꞌ cha woche oc bꞌeomal jaxca chi yute sbꞌa ebꞌ cꞌam chi okꞌ scꞌul yin yet animail, cꞌam ojabꞌ chach oc tzajan yintaj sbꞌeybꞌal ebꞌ.
32Yutol cꞌam chi ẍaꞌ scꞌul Jehová ebꞌ pena snaꞌbꞌal; jal pax ebꞌ watxꞌ sbꞌeybꞌal xin, caw chi tzala yetoj ebꞌ.
33Jaꞌ Jehová chi aontej syaꞌtajilal yibꞌan stzetyetal ebꞌ penawom; jal pax ebꞌ watxꞌ sbꞌeybꞌal xin, chi yakꞌ syaaxilal yibꞌan tzet ey yul skꞌabꞌ ebꞌ.
34Caw chi tit sjowal scꞌul Jehová yin ebꞌ bꞌuchwawom; jal pax ebꞌ yeynajil chi yute sbꞌa, caw ey scamcꞌulal yin ebꞌ.
35Jaꞌ ebꞌ chi bꞌeybꞌalne jelanil, caw oj iꞌle a can ebꞌ, jal pax ebꞌ pena snaꞌbꞌal xin, oj el sqꞌuixwil ebꞌ.
© 2016, Wycliffe Bible Translators, Inc. All rights reserved.