Proverbios 2
2
Jaꞌ Tzetyetal Chi Kiꞌ Yin Jelanilal
1Jaach wuninal, aoc wan jin kꞌane tiꞌ yin ja cꞌul;
cꞌubꞌa wan jin chejbꞌanil tiꞌ yin ja naꞌbꞌal.
2Aoc ja txiquin yin naꞌbꞌale chi wakꞌa, catuꞌ cha waon oc ja naꞌbꞌal yin jelanilal.
3Kꞌan ja jelanil, cꞌal ja naꞌbꞌal yin masanil ja cꞌul.
4Akꞌ ja wip ja seyon ecꞌoj, jaxca wal chi yun seyle ecꞌ chꞌen plata, ma junojxa bꞌeomal tol ewan eloj.
5Queytuꞌ oj yun snaꞌcha el ja wu, tol ey yeloc apnoj Jehová yul ja sat, cꞌal ja wotajne el Naj.
6Yutol jaꞌ Jehová chi akꞌon jelanil; jaꞌ skꞌane chi akꞌon jelanbꞌoj cu naꞌbꞌal.
7Jaꞌ Jehová chi akꞌon sjelanil ebꞌ watxꞌ snaꞌbꞌal, cꞌal ebꞌ watxꞌ sbꞌeybꞌal.
8Chi teynele ebꞌ watxꞌ chi yute sbꞌa, catuꞌ chi col-le el ebꞌ jijem chi yute sbꞌa.
9Yuxan, ta cha chaꞌ ja wabꞌ jin chejbꞌanil, oj ja wotajne el sjichanil cꞌal swatxꞌilal, catuꞌ oj naꞌcha el masanil tzetyetal watxꞌ ja wu.
10Jaꞌ yet oj ja wiꞌon ja naꞌbꞌal, caw tzalacꞌulal cꞌal oj yun ja bꞌeytoj.
11Jaꞌ jelanil cꞌal watxꞌ naꞌbꞌale, jaꞌ wan tuꞌ oj colwa ja win.
12Jaꞌ oj jaach colon el tet pena bꞌeybꞌale, cꞌal yul skꞌabꞌ ebꞌ ánima pena snaꞌbꞌal,
13jaꞌ ebꞌ chi bꞌejon can watxꞌ bꞌeybꞌale, chi too can ebꞌ xol spenail.
14Jaꞌton ebꞌ ánima chi tzala yunen spenail, catuꞌ chi tzala ebꞌ yet chi etextoj junoj yin spenail.
15Asanne yin pena bꞌeybꞌale eyoc snaꞌbꞌal ebꞌ, chi sbꞌejoncan watxꞌ bꞌeybꞌale ebꞌ.
16Ta tol cha bꞌeybꞌalne jelanil, cꞌal watxꞌ naꞌbꞌale, oj jaach colcha el yul skꞌabꞌ ebꞌ ix ix tol chi yiꞌeytej sat winaj, jaꞌton ix ix chach monten yetoj kꞌane txꞌojxa swatxꞌil yal-lei.
17Jaꞌton ix ix tol bꞌejbꞌil can yichamil yu yin tax skꞌopoal, tol jix too qꞌueycꞌulal yu bꞌey jix yakꞌ can stiꞌ sattaj Dios yet jix nupi yetoj yichamil.
18Ta tol chach too yul sbꞌeal sna ix ix tuꞌ, jaxca tol lalan ja too yul sbꞌeal camich.
19Jaꞌ ebꞌ chi octoj yul sna ix ix tuꞌ, cꞌamxa chi eltej ebꞌ junelxa, cꞌamxa chi meltzo ebꞌ junelxa yul jun bꞌe yet kꞌinale.
20Bꞌeybꞌalne cꞌal jun bꞌeybꞌale tiꞌ xin, yet watxꞌ oj ja bꞌeybꞌalne sbꞌeybꞌal ebꞌ jichan snaꞌbꞌal.
21Jaꞌ ebꞌ watxꞌ sbꞌeybꞌal, ebꞌ cꞌam chi yatoj sbꞌa xol spenail, caw naatil oj kaey ecꞌ ebꞌ bꞌey sat txꞌotxꞌ txꞌotxꞌ tiꞌ.
22Jal ebꞌ pena sbꞌeybꞌal xin cꞌal ebꞌ chi yetne junojxa mactxequel, oj iꞌle el ebꞌ catuꞌ oj qꞌueyle el ebꞌ bꞌey sat txꞌotxꞌ txꞌotxꞌ tiꞌ, jaxca chi yun stokꞌle atej xeꞌ junoj teꞌ teꞌ.
© 2016, Wycliffe Bible Translators, Inc. All rights reserved.