Mateo 3
3
Chi Yalel Skꞌane Dios Naj Juan Bautista
(Marcos 1:1-8; Lucas 3:1-9, 15-17; Juan 1:19-28)
1Jacꞌal ton yet jun tiempoal tuꞌ, ey jun naj chi yij Juan Bautista, jix too naj bꞌey jun cusiltaj txꞌotxꞌ yul yet Judea. Jix cꞌoli yalon skꞌane Dios naj tet ebꞌ ánima jix apni ebꞌ yabꞌ tzet chi yalaꞌ. 2Jix yalon tet ebꞌ jaxca tiꞌ:
—Naꞌwej je bꞌa yin je penail, yutol jaꞌ Naj Yaaw bꞌey satcan, tuxa chi oc can Yaawil titiꞌ, ẍi naj. 3Jaꞌton naj Juan tiꞌ jix al-le yin naj yin eyojtoj yu naj ẍejabꞌ Dios chi yij Isaías, yet jix yalon can jaxca tiꞌ yul An Juun Tzꞌibꞌebꞌilcanoj:
Ey jun mactxequel bꞌey cusiltaj txꞌotxꞌ oj yal yin ipal jaxca tiꞌ: “Jaxca chi yun swaꞌnele junoj bꞌe yet chi jul junoj yaaw, queytuꞌ che yute je waꞌnen je bꞌeybꞌal, yutol oj jul Naj Kaawil” queytuꞌ oj yute yaloni, ẍi yul An Juun Tzꞌibꞌebꞌilcanoj.#Isaías 40:3.
4Jaꞌ spichil naj Juan tuꞌ eyocoj, jaꞌton xil noꞌ camello chembꞌil, catuꞌ tzꞌuum eyoc scꞌaliloj naj. Jaꞌ jun tujan noꞌ kꞌuxbꞌeal kochiꞌ noꞌ chi ẍiꞌ naj, cꞌal yetoj yaal awcabꞌ chi yuqꞌueꞌ. 5Jaꞌ ebꞌ a Jerusalén yetoj ebꞌ a Judea cꞌal jantaj ebꞌ ey stiꞌlaj jaꞌ Jordán, chi bꞌet ebꞌ yabꞌ tzet chi yal naj. 6Jix yalatej spenail ebꞌ tet Dios, catuꞌ jix akꞌle can bautizar ebꞌ yu naj Juan bꞌey yul jaꞌ Jordán tuꞌ. 7Ey cꞌal ebꞌ Fariseo* yetoj ebꞌ Saduceo* jix apni scꞌatan naj yu yakꞌle bautizar ebꞌ yu naj. Jix yal naj tet ebꞌ jaxca tiꞌ:
—Jaex tiꞌ, caw jelan jex yin iꞌo eytej sate jaxca noꞌ labꞌa. ¿Tumi che naꞌ tol chi skeꞌ je colon el je bꞌa tet jun miman syaꞌilal oj jul je yibꞌan yu sjowal scꞌul Dios? 8Ta yel chi snaꞌ sbꞌa je cꞌul yin je penail, sowalil watxꞌ che yute je bꞌeybꞌal, yet watxꞌ chi txeclo eloj tol yel jix je naꞌ je bꞌa. 9Manche je yal jaxca tiꞌ: “Cꞌam tzet chi cu naꞌ, yicꞌaal jon naj Abraham jon,” man je chioj. Yutol chi wal ey jex an, kꞌinaloj ta chi yal scꞌul Dios, chi skeꞌ yuten oc wan chꞌen tiꞌ animail, catuꞌ chi oc yicꞌaaloj naj Abraham je qꞌuexeloj. 10Jaꞌ jun miman syaꞌtajil oj jul je yibꞌan, laan jaxca junoj winaj listo xa yeoc yetoj yeche yich junoj teꞌ. Masanil teꞌ cꞌam swatxꞌil sat chi yakꞌa, chi stzokꞌaoj, catuꞌ chi skꞌojon cantoj yibꞌan kꞌakꞌ. 11Jain tiꞌ, yel chex wakꞌ bautizar yetoj jaꞌ, ey pax junxa mactxequel tol to oj juloj. Jaꞌ jaxca tol oj jex yakꞌ bautizar yetoj Santo Espíritu, ma yetoj kꞌakꞌ. Jaꞌ jun mactxequel oj jul tuꞌ, yel xacꞌal miman yeloc apnoj wintaj an. Yuxan man jin moo oj wakꞌon servil, caxcꞌal asan yu wiꞌon el xanabꞌ, man jin moo oj. 12Jaꞌ jun mactxequel chi wal tuꞌ, laan jaxca junoj mactxequel chi xeye stiriw, yu yiꞌon can el skꞌail ixim xol sbꞌakꞌ ixim. Chi lawi xeyeni, catuꞌ chi yiꞌontoj stiriw tuꞌ bꞌey scꞌuanbꞌal, jal skꞌail ixim chi elcan tuꞌ, chi secle cantoj yibꞌan jun kꞌakꞌ cꞌam chi tani, ẍi naj Juan tet ebꞌ.
Sbautismoal Naj Jesús
(Marcos 1:9-11; Lucas 3:21-22)
13Jaꞌ yet jun tiempoal tuꞌ, jix tit Jesús bꞌey jun lugar chi yij Galilea, catuꞌ jix apni scꞌatan naj Juan yet eyecꞌ naj bꞌey jaꞌ Jordán, yu yapni skꞌanon sbautismo tet.
14Yin sbꞌabꞌelal ma yal scꞌul naj Juan chi yakꞌ bautizar Naj. Jaꞌ tiꞌ yet, jix yal tet Jesús jaxca tiꞌ:
—Jin moo jain tiꞌ, tol chin ja wakꞌ bautizar, ilaꞌ pax tol cha woche tol chach wakꞌ bautizar, ẍi Juan tuꞌ tet Naj. 15Jix yalon Jesús tuꞌ tet jaxca tiꞌ:
—Sowalil chin ja wakꞌ bautizar, yutol smoo jin jijen masanil tzet chi yal Dios, ẍi Jesús tet naj.
Catuꞌ jix sjijen naj Juan tuꞌ. 16Jix cꞌal lawi yakꞌle bautizar Jesús tuꞌ, catuꞌ jix atej yul jaꞌ. Jaꞌ yet jun txolan tuꞌ jix jajcha satcan, catuꞌ jix yiloni, tol jix eyol Yespíritu Dios yibꞌan Jesús jaxca chi yun yecꞌ junoj noꞌ uch. 17Catuꞌ jix yabꞌen jayebꞌ kꞌane ebꞌ jix tit bꞌey satcan. Tol jix yal jaxca tiꞌ:
—Jaꞌton jun jin Cꞌaal tiꞌ, camcꞌulnebꞌil wu an. Caw chin tzala yetoj, ẍi jayebꞌ kꞌane tuꞌ.
Currently Selected:
Mateo 3: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.