Mateo 4
4
Jaꞌ Yet Jix Akꞌle Ijbꞌale Jesús Yin Spenail
(Marcos 1:12-13; Lucas 4:1-13)
1Catuꞌ jix iꞌletoj Jesús yu Yespíritu Dios bꞌey jun cusiltaj txꞌotxꞌ, yutol oj akꞌle ijbꞌale naj yin spenail yu naj diablo. 2Cꞌam tzet jix sloꞌ naj yin cawinaj cꞌual, cawinaj akꞌbꞌal. Catuꞌ jix tit swail Jesús. 3Jix apni naj diablo tuꞌ scꞌatan Naj, yu yakꞌlen yijbꞌan Naj yin spenail, catuꞌ jix yaloni:
—Tutun tol Scꞌaal jaach Dios, al tet wan chꞌen tiꞌ tol chi oc chꞌen yin panil, ẍi naj tet Jesús. 4Jix yalon Jesús tet naj diablo tuꞌ jaxca tiꞌ:
—Jaꞌ yul An Juun Tzꞌibꞌebꞌilcanoj, chi alon jaxca tiꞌ: “Man asanne oj yu loꞌbꞌe yuxan iquis jon. Chi cu iquisbꞌi pax ecꞌ yu skꞌane Dios,” queytuꞌ yalon yul An Juun, ẍi Jesús tet naj diablo.#Deuteronomio 8:3. 5Jix lawi jun tuꞌ xin, catuꞌ jix iꞌletoj Naj Jesús yu naj diablo bꞌey jun conobꞌ asan Dios ey yet, jaꞌton conobꞌ Jerusalén. Catuꞌ jix iꞌle atoj yu bꞌey ẍumuc templo. 6Jix yalon naj diablo tet Naj jaxca tiꞌ:
—Ta caw yel, tol Scꞌaal jaach Dios, kꞌojeytoj ja bꞌa sat txꞌotxꞌ tuꞌ, yutol chi yal can yul An Juun Tzꞌibꞌebꞌilcan jaxca tiꞌ:
Oj ẍejtej ebꞌ yángel Dios yu ja teynelei. Catuꞌ oj jaach yiꞌa ebꞌ yetoj skꞌabꞌ, yet watxꞌ man oj yasitoj ja wajan yin chꞌen, ẍi yul An Juun tuꞌ, ẍi naj diablo tuꞌ.#Salmos 91:11, 12.
7Jix yalon pax Jesús tuꞌ jaxca tiꞌ:
—Asan xin, chi yal pax yul An Juun Tzꞌibꞌebꞌilcan tuꞌ jaxca tiꞌ: “Manche ja wakꞌle ja wijbꞌan ja Diosal Kaawil yin spenail,” ẍi yul An Juun tuꞌ, ẍi Jesús tet naj.#Deuteronomio 6:16. 8Catuꞌ jix iꞌletoj Jesús yu naj bꞌey jun miman wonan. Catuꞌ jix cꞌoli xꞌoxle masanil wan mimej conobꞌlaj yul yibꞌankꞌinal tiꞌ yu naj, cꞌal tzettaj mimej yeloc apnoj bꞌey junjun conobꞌ tuꞌ. 9Jix lawi tuꞌ xin, catuꞌ jix yalon naj diablo tet Naj jaxca tiꞌ:
—Masanil wan chin txꞌoxtoj ey jaach tiꞌ, oj wakꞌ ey jaach, ta chach ey kaan ey jin an, catuꞌ cha walon ja bꞌa ey jin an, ẍi naj diablo tuꞌ tet Naj. 10Catuꞌ jix yalon Naj Jesús tuꞌ tet naj jaxca tiꞌ:
—Jaach Satanás, elan jin cꞌatan an. Yutol chi yal yul An Juun Tzꞌibꞌebꞌilcan jaxca tiꞌ: “Chex ey kaan sattaj Dios Kaawil. Asan Dios che yakꞌ servil,” ẍi yul An Juun, ẍi Jesús tet naj diablo.#Deuteronomio 6:13. 11Jaxa yet tuꞌ jix el naj scꞌatan Jesús tuꞌ, jix toi, catuꞌ jix jul ebꞌ ángel. Jix jul akꞌle servil Naj yu ebꞌ.
Jaꞌ Bꞌey Galilea, Jix El Yich Xꞌoxon El Yopiso Naj Jesús
(Marcos 1:14-15; Lucas 4:14-15)
12Jaꞌ yet jix yabꞌen Naj Jesús tol eyoc naj Juan yul preso, catuꞌ jix too Naj bꞌey Galilea. 13Ma eecꞌ Naj bꞌey Nazaret, jaxa bꞌey Capernaúm jix eeyi. Jaꞌ jun conobꞌ tuꞌ, jaꞌ stiꞌ jaꞌ mar ey. Bꞌey yul-laj txꞌotxꞌ yet Zabulón cꞌal txꞌotxꞌ yet Neftalí, jatuꞌ ey. 14Jaxca ton tiꞌ jix yunne, yu yunen el tzet jix yal naj ẍejabꞌ Dios* chi yij Isaías yet peyxa, tol chi yal jaxca tiꞌ:
15Jaꞌ stiꞌ jaꞌ mar ey txꞌotxꞌ yet Zabulón cꞌal txꞌotxꞌ yet Neftalí,#4:15 Zabulón cꞌal Neftalí, jaꞌton caabꞌ bꞌulan ebꞌ Israel caan stiꞌ jaꞌ mar Galilea. Jaꞌton ebꞌ jix etex yin sbꞌabꞌelal yet jix apni wan conobꞌ ey bꞌey norte yakꞌlen jowal yetoj ebꞌ. Yu jun tuꞌ, yuxan chi yalaꞌ, tol “jaxca tol camnaj el spixan ebꞌ”. bꞌey skꞌaxepal ecꞌ jaꞌ miman Jordán. Jaꞌ tituꞌ ey jun lugar chi yij Galilea, bꞌey ecꞌal ebꞌ man Israeloj caan ecꞌ tituꞌ.
16Jaꞌ ebꞌ ánima kꞌejkꞌinal to ey spixan. Tol oj yil pax jun sajkꞌinal ebꞌ tol miman yeloc apnoj. Jaꞌ ebꞌ ey bꞌey jun lugar tuꞌ, jaxca tol camnaj el spixan ebꞌ. Tol oj jul pax sajkꞌinal bꞌey spixan ebꞌ tuꞌ, ẍi yul An Juun Tzꞌibꞌebꞌilcanoj.#Isaías 9:1, 2.
17Jaꞌ yet jix apni Jesús bꞌey jun lugar tuꞌ xin, catuꞌ jix cꞌoli yalon el skꞌane Dios tet ebꞌ ánima, jix yalon tet ebꞌ jaxca tiꞌ:
—Naꞌwej je bꞌa yin je penail, yutol jaꞌ Naj Yaaw bꞌey satcan, Tuxa chi oc can yin Yaawil titiꞌ, ẍi Jesús tet ebꞌ.
Jaꞌ Yet Jix Yawtentej Canwan Mitxꞌom Pescado Naj Jesús
(Marcos 1:16-20; Lucas 5:1-11)
18Jaꞌ yet jun cꞌu, yet lalan yecꞌ Naj Jesús bꞌey stiꞌ jaꞌ mar Galilea, jix yilon yin naj Simón, naj chi yij Pedro, yetoj jun yuẍtaj chi yij Andrés. Lalan smitxꞌwi pescado ebꞌ tituꞌ, yutol mitxꞌom pescado ebꞌ. 19Catuꞌ jix yalon Jesús tuꞌ tet ebꞌ jaxca tiꞌ:
—Ocanwej tzajan wintaj an, cuywanwej, oj wakꞌ je yopiso. Jaxca che yute je mitxꞌon noꞌ pescado tiꞌ, queytuꞌ oj je yute je yiꞌontej ebꞌ ánima ey jin an, ẍi Naj Jesús tuꞌ tet ebꞌ. 20Jix sbꞌej xacꞌal can xim ebꞌ tuꞌ yet jun txolan tuꞌ. Catuꞌ jix oc tzajan ebꞌ yintaj Jesús yu scuywi ebꞌ. 21Jix bꞌeytoj ebꞌ janicꞌ xa, catuꞌ jix yilon yin cawanxa yuẍtaj pax sbꞌa, jaꞌton naj Jacobo, yetoj naj Juan, ebꞌ scꞌaal naj Zebedeo. Eyoc ebꞌ yul sbarco yetoj smam. Lalan snipen xim ebꞌ, yet jix awtele ebꞌ yu Jesús. 22Yet xacꞌal jun txolan tuꞌ, jix sbꞌejcan sbarco ebꞌ cꞌal smam ebꞌ tuꞌ, catuꞌ jix oc tzajan ebꞌ yintaj Naj Jesús, jix oc ebꞌ yin scuywomoj Naj.
Jix Cuywa Jesús Xol Ebꞌ Ánima
(Lucas 6:17-19)
23Jix ecꞌ ebꞌ yetoj Jesús bꞌey masanil yul-laj yet Galilea tuꞌ. Jix ecꞌ Naj cuywa yul-laj snail bꞌey chi syambꞌa sbꞌa ebꞌ Israel yin culto. Catuꞌ jix yalon can el watxꞌ kꞌane, tzet utbꞌil chi yun yoc Dios Yaawiloj ebꞌ. Catuꞌ jix yakꞌon can waꞌxoj scꞌul masanil mactxequel yaꞌey yu yal cꞌal tzet yaꞌilal. 24Masanil ebꞌ ánima yul yet Siria jix yabꞌ skꞌumal Jesús ebꞌ, yuxan jix yiꞌtej syaꞌey ebꞌ. Yal cꞌal tzet yaꞌilal eyoc yin ebꞌ jix yiꞌtej ebꞌ scꞌatan Naj Jesús, yetoj ebꞌ eyoc pena espíritu yin,* yetoj ebꞌ chaꞌbꞌil joybꞌinaj sat yu, cꞌal ebꞌ sicbꞌinaj el smimanil, jix iꞌletej masanil ebꞌ scꞌatan Jesús, catuꞌ jix waꞌxi can scꞌul masanil ebꞌ yu Naj. 25Ecꞌal ebꞌ ánima a Galilea tuꞌ, jix tzajlo yintaj Naj, cꞌal ebꞌ a Decápolis,#4:25 Decápolis, chi yal yeloc apnoj, “Laonebꞌ conobꞌ”. cꞌal ebꞌ a Jerusalén, cꞌal ebꞌ a Judea, yetoj ebꞌ ey skꞌaxepal ecꞌtoj jaꞌ Jordán.
Currently Selected:
Mateo 4: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.