YouVersion Logo
Search Icon

Mateo 2

2
Yet Jix Bꞌet Il-le Jesús Yu Ebꞌ Ilom Weycan
1Jaꞌ bꞌey jun conobꞌ chi yij Belén yul yet Judea, jatuꞌ jix ali Jesús. Jaꞌ yet jun tiempoal tuꞌ, jaꞌ naj Herodes* eyoc reyal bꞌey Judea tuꞌ.
Ey wan winaj chi yij ilom weycan.#2:1 Jaꞌ ebꞌ chi ijon ilom weycan chi yij pax ebꞌ yin mago, jaꞌton ebꞌ chi ilon weycan yu yotajnen el tzet oj jul yin eyojtoj. Jaꞌ yet jix ali Jesús, jix tit taꞌcꞌal ebꞌ bꞌey chi aol cꞌu. Jix apni ebꞌ bꞌey Jerusalén. 2Jix skꞌanlen ebꞌ jaxca tiꞌ:
—¿Bꞌeytuꞌ eyoc jun winaj unin jix ali, jun tol oj oc sreyaloj ebꞌ Israel? Jaꞌ bꞌey chi aol cꞌu, jaꞌ taꞌ tuꞌ jix kil jun weycan, jun jix txꞌoxon yalubꞌal jun unin tuꞌ ey jon. Yuxan jix cu tit kilaꞌ, catuꞌ chi kiꞌon ey cu bꞌa tet, ẍi ebꞌ. 3Jaꞌ yet jix yabꞌen naj rey Herodes jun tiꞌ, tuxa cꞌal jix qꞌueycan a scꞌul naj yetoj masanil ebꞌ a Jerusalén tuꞌ. 4Catuꞌ jix yawten oc masanil ebꞌ yaawil yakꞌomal xaambꞌal ebꞌ Israel tet Dios,* cꞌal ebꞌ cuywam yin sley Moisés,* catuꞌ jix skꞌanlen el tet ebꞌ, bꞌeytuꞌ tꞌinan chi ali Naj Cristo.* 5Jix takꞌwi ebꞌ tet naj jaxca tiꞌ:
—Jaꞌ bꞌey conobꞌ Belén yul yet Judea, jatuꞌ oj aloj. Yutol ey jun ẍejabꞌ Dios* queytuꞌ jix yute stzꞌibꞌen can jaxca tiꞌ:
6Jaꞌ jun conobꞌ Belén yul yet Judea, caxcꞌal yaliẍ conobꞌ chꞌan yintaj wanxa conobꞌ yul yet Judea tuꞌ, caw miman pax yeloc apnoj yintaj wanxa tuꞌ, yutol jaꞌ bꞌey jun yaliẍ conobꞌ tuꞌ oj pitzcꞌu a jun yaaw. Catuꞌ jaꞌ oj akꞌon cuenta jin conobꞌ Israel, ẍi yul An Juun Tzꞌibꞌebꞌilcan tuꞌ, ẍi ebꞌ.#Miqueas 5:2.
7Catuꞌ jix awtele ebꞌ ilom weycan, ebꞌ chi yij pax yin mago yu naj Herodes tuꞌ yin ewantajil, catuꞌ jix skꞌanlen naj tet ebꞌ:
—¿Bꞌakꞌini tax jix xꞌoxa sbꞌa jun weycan tuꞌ? ẍi naj tet ebꞌ. 8Jix lawi yabꞌen naj xin, catuꞌ jix chejletoj ebꞌ bꞌey conobꞌ Belén tuꞌ yu naj. Jix yalon tet ebꞌ jaxca tiꞌ:
—Asiꞌwej tituꞌ. Chi cam je kꞌanlen je yabꞌ yu jun unin tuꞌ. Catuꞌ jaꞌ yet chi ilcha je yu xin, catuꞌ chex ecꞌ je yalon wabꞌ an, bꞌeytuꞌ eyocoj, yet watxꞌ chin too pax wiꞌey jin bꞌa tet, ẍi naj tet ebꞌ. 9Jix lawi yabꞌen ebꞌ wan kꞌane tuꞌ xin, catuꞌ jix too ebꞌ. Jaꞌ jun weycan jix yilatoj ebꞌ yet eyecꞌ ebꞌ bꞌey chi aol cꞌu tuꞌ, jix bꞌabꞌi cꞌal sattaj ebꞌ, masantaꞌcꞌal jix apni bꞌatxna yibꞌan bꞌey eyecꞌ jun unin tuꞌ.
10Jaꞌ yet jix yilon jun weycan ebꞌ tuꞌ caw jix tzala a scꞌul ebꞌ. 11Jix apni ebꞌ bꞌey jun na bꞌey eyecꞌ naj unin tuꞌ. Jix yilon oc yin naj ebꞌ yetoj xutx, jaꞌton ix María. Catuꞌ jix ey kaan ebꞌ tet jun unin tuꞌ, jix yiꞌon ey sbꞌa ebꞌ tet. Jix lawi tuꞌ xin, catuꞌ jix sjajon scꞌuanbꞌal saꞌbꞌeal ebꞌ tuꞌ. Jix saꞌon can oro ebꞌ tet jun unin tuꞌ. Catuꞌ jix saꞌle pax can jun tujan teꞌ sukꞌukꞌi xacꞌal yel sabꞌ yet chi tzꞌaꞌi,#2:11 Jaꞌ jun tzetyetal sukꞌukꞌi sabꞌ tuꞌ, yal junoj tujan teꞌ, catuꞌ chi yakꞌon tzꞌaꞌ ebꞌ bꞌey templo. cꞌal jun tujan yal teꞌ sukꞌukꞌi pax sabꞌ chi yij mirra yu ebꞌ.#2:11 Mirra, yal jun tujan teꞌ. Chi iꞌle eloj, catuꞌ chi akꞌle tajoj, catuꞌ chi kꞌanbꞌalne yin perfumeal. 12Jix lawi cꞌal jun tuꞌ xin, catuꞌ jix al-le tet ebꞌ yu Dios yin weyicheal tol manche ecꞌ yal ebꞌ tet Herodes bꞌeytuꞌ eyoc ecꞌ naj unin tuꞌ, yuxan txꞌojxa bꞌeal jix yiꞌ ebꞌ yet jix meltzo ebꞌ bꞌey sconobꞌ.
Yet Jix Too Ebꞌale El Naj Unin Jesús Bꞌey Egipto
13Jix cꞌal paxtoj ebꞌ ilom weycan xin, catuꞌ jix xꞌoxon a sbꞌa jun yángel Naj Kaawil tet José yin weyicheal, catuꞌ jix yalon tet naj jaxca tiꞌ:
—Eyman, aan waanoj. Ijbꞌatoj naj unin yetoj xutx, catuꞌ chex too bꞌey conobꞌ Egipto. Eyanwej ecꞌ tituꞌ masantaꞌcꞌal oj wal ey jaach, catuꞌ chex meltzo pax tej. Yutol jaꞌ naj Herodes, oj akꞌon seyle jun unin tiꞌ yutol chi yoche chi yakꞌ camoj, ẍi jun ángel tuꞌ tet naj. 14Yuxan jix a waan José tuꞌ, catuꞌ jix yiꞌon bꞌey naj unin tuꞌ yetoj cꞌal xutx yet akꞌbꞌalil tuꞌ. Catuꞌ jix too ebꞌ bꞌey Egipto. 15Jix eecꞌ ebꞌ tituꞌ masantaꞌcꞌal jix cam naj Herodes, catuꞌ jix meltzo ebꞌ junelxa. Jaxca ton tiꞌ jix yunne, yu yunen el tzet jix yal Naj Kaawil, yet jix yakꞌbꞌalnen stiꞌ jun ẍejabꞌ yalon jaxca tiꞌ: “Jix wawte pax tej jin Cꞌaal bꞌey Egipto,” ẍi yul An Juun.#Oseas 11:1.
Jix Chej Makꞌle Cam Ebꞌ Unin Yu Herodes
16Jaꞌ yet jix yilon naj Herodes tol ma xa ecꞌ ebꞌ mago tuꞌ scꞌatan naj. Tucꞌal jix etnele yu ebꞌ, yuxan caw jix tit sjowal scꞌul naj, yuxan jix chej makꞌle cam masanil ebꞌ winaj unin, ebꞌ unin masantaꞌ caabꞌ abꞌil xa skꞌinal ebꞌ, yutol jaxca tuꞌ stiempoal yal-le tet naj yu ebꞌ mago. Bꞌey conobꞌ Belén yetoj cꞌal bꞌey masanil scawilal jix makꞌle cam ebꞌ unin tuꞌ. 17Jaxca ton tiꞌ jix yun tzet jix stzꞌibꞌe can naj ẍejabꞌ Dios,* chi yij Jeremías yet jix yalon naj jaxca tiꞌ:
18Ey aw jix abꞌle yoc bꞌey conobꞌ Ramá. Ey mimej okꞌil, yetoj mimej cuscꞌulal. Jaꞌ ix Raquel, caw jix michꞌcha scꞌul yokꞌ yu ebꞌ yuneꞌ. Cꞌamxa chi tzꞌini ix yu ebꞌ yuneꞌ tuꞌ yu jix cam ebꞌ, ẍi naj Jeremías.#Jeremías 31:15.
19Jaꞌ yet jix cam naj Herodes tuꞌ xin, jix xꞌoxon a sbꞌa jun yángel Naj Kaawil tet naj José yin weyicheal yet eyecꞌ naj bꞌey Egipto tuꞌ, catuꞌ jix yalon tet naj jaxca tiꞌ:
20—Aan waanoj. Iꞌtoj naj unin tiꞌ yetoj xutx. Meltzaanwej bꞌey je conobꞌ Israel. Yutol jaꞌ ebꞌ jix ochen jix makꞌon cam naj unin tiꞌ, camnajxa ebꞌ, ẍi jun ángel tuꞌ tet naj José. 21Catuꞌ jix a waan naj José tuꞌ, catuꞌ jix yiꞌon meltzo naj unin naj tuꞌ yetoj xutx junelxa bꞌey slugar ebꞌ yet Israelal tuꞌ. 22Catuꞌ jix yabꞌen oc naj José tol jaꞌ naj Arquelao eyoc yaawil bꞌey Judea sqꞌuexeloj smam naj Herodes. Yuxan jix xiw naj smeltzo tituꞌ junelxa. Jix yalon Dios tuꞌ yin weyicheal tet naj tzet watxꞌ chi yunne, yuxan jix toocan ebꞌ bꞌey yul-laj yet Galilea. 23Jix apni ebꞌ tituꞌ xin. Jix caey ebꞌ bꞌey jun conobꞌ chi yij Nazaret. Jaxca ton tuꞌ jix yunne, yu yunen tzet albꞌilcan yu ebꞌ ẍejabꞌ Dios yet peyxa, yet jix stzꞌibꞌen can ebꞌ tol tꞌinan chi yij sbꞌi, Jesús a Nazaret.

Currently Selected:

Mateo 2: knj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy