Mateo 17

Jix Qꞌuexmo Yili Jesús

(Marcos 9:2-13; Lucas 9:28-36)

1Wajebꞌ xa cꞌual tuꞌ, jaꞌ naj Pedro yetoj Jacobo cꞌal jun yuẍtaj Jacobo tuꞌ chi yij Juan jix iꞌletoj ebꞌ yu Jesús. Asan ebꞌ jix iꞌletoj yu Naj. Jix too ebꞌ bꞌey jun miman wonan. 2Jaꞌ tituꞌ jix qꞌuexmo yili Jesús jix yil ebꞌ. Jix tzejeji a sat Naj jaxca cꞌu. Jaꞌ spichil Naj, caw saj jix yuneloj. 3Eyman jix xꞌoxa sbꞌa naj Moisés yetoj naj Elías. Jix kꞌanabꞌ ebꞌ yetoj Jesús. 4Catuꞌ jix yalon naj Pedro tuꞌ tet Jesús jaxca tiꞌ:

—Jaach cuywam, caw watxꞌ ket yutol ey jon ecꞌ titiꞌ. Ta chi yal ja cꞌul, chi cu waꞌne oxebꞌoj pat titiꞌ, junoj ja wet, junoj yet naj Moisés, yetoj junoj yet naj Elías, ẍi naj tet Jesús. 5Lalanto skꞌanabꞌ naj Pedro tuꞌ, catuꞌ jix ey jotna jun asun yibꞌan ebꞌ. Ey junoj mac jix alon xol jun asun tuꞌ, jix yal jaxca tiꞌ:

—Jaꞌton jun jin Cꞌaal tiꞌ bꞌey caw chi camel jin cꞌul an. Caw chin tzala yetoj an. Abꞌwej tzet chi yal Naj, ẍi. 6Jaꞌ yet jix yabꞌen ebꞌ cuywom tuꞌ wan kꞌane tuꞌ, jix ey pajna ebꞌ sat txꞌotxꞌ. Caw jix xiwa ebꞌ sicꞌlebꞌil. 7Yuxan jix apni Jesús scꞌatan ebꞌ, catuꞌ jix sbꞌatxbꞌan oc skꞌabꞌ yibꞌan ebꞌ. Jix yalon tet ebꞌ jaxca tiꞌ:

—Aanwej waanoj, manche jex xiwi, ẍi Jesús tet ebꞌ. 8Jaꞌ yet jix yilontej ebꞌ, cꞌamxa mactxequel eyecꞌoj, asanxane Jesús eyecꞌ xꞌojli. 9Jaꞌ yet lalan spaxeytej ebꞌ bꞌey jun wonan tuꞌ, jix yalon Jesús tet ebꞌ jaxca tiꞌ:

—Manche je yal yin jun jix je yil tiꞌ. Jato yet oj jin pitzcꞌu a xol ebꞌ camnaj, jain Akꞌbꞌil Wopiso yu Dios xol ebꞌ ket animail tiꞌ an, jaꞌ yet tuꞌ che yalon eloj, ẍi Jesús tet ebꞌ. 10Catuꞌ jix skꞌanlen ebꞌ scuywom tuꞌ tet Naj jaxca tiꞌ:

—Jaꞌ ebꞌ cuywam yin sley Moisés,* chi yal ebꞌ jaxca tiꞌ: “Jaꞌ naj Elías, sowalil oj bꞌabꞌoj juloj,” ẍi ebꞌ. ¿Tzet yuxan chi yal ebꞌ jaxca tuꞌ? ẍi ebꞌ tet Naj. 11Catuꞌ jix yalon Naj tet ebꞌ tuꞌ jaxca tiꞌ:

—Yel ton chi yal ebꞌ, tol sowalil chi jul naj Elías tuꞌ, yet watxꞌ chi snaꞌ sbꞌa ebꞌ ánima. 12Yuxan chi wal ey jex, tol julnajxa ecꞌoj. Ma pax naꞌcha el yu ebꞌ ánima ta tol jaꞌ Elías tuꞌ. Yuxan jix yun ebꞌ jaxca chi yoche scꞌul ebꞌ yin naj. Queytuꞌ oj wute pax wabꞌen syaꞌil yu ebꞌ, jain Akꞌbꞌil Wopiso yu Dios xol ebꞌ ket animail tiꞌ an, ẍi Jesús tet ebꞌ scuywom tuꞌ. 13Catuꞌ jix naꞌcha el yu ebꞌ tol jaꞌ yin naj Juan Bautista chi yal Jesús.

Jun Unin Jix Elcan Jun Pena Espíritu Yin Yu Jesús

(Marcos 9:14-29; Lucas 9:37-43)

14Jaꞌ yet jix apni ebꞌ bꞌey bꞌulan ecꞌ ánima tuꞌ, jix apni jun winaj scꞌatan Jesús. Jix ey kaan bꞌey yajantaj Naj. Catuꞌ jix yalon tet Jesús jaxca tiꞌ:

15—Mamin, okꞌ ojabꞌ ja cꞌul yin jun jin cꞌaal tiꞌ an. Chi tit snumsat yin. Caw chi yetne scꞌul naj yu. Ey bꞌey ian chi too yibꞌan kꞌakꞌ ma yul-laj jaꞌ yu. 16Jix wiꞌtej tet ebꞌ ja cuywom tiꞌ, ma pax waꞌxoj yu ebꞌ, ẍi naj tet Jesús. 17Yuxan jix yal Jesús jaxca tiꞌ:

—Jaex tiꞌ, caw cꞌam che yaoc je cꞌul yin Dios. Caw caw je naꞌbꞌal. Ilaꞌla, eyxa tiempo cꞌal wee ecꞌ je yetoj. ¿Bꞌakꞌin oj naꞌcha el je yu xin? Chi yabꞌ syaꞌil jin cꞌul je yu. Asiꞌ, iꞌtej naj unin tuꞌ ey jin an, ẍi Jesús tet ebꞌ. 18Jaꞌ yet jix apni naj unin tuꞌ scꞌatan Jesús, jix tzuwa Naj yin jun pena espíritu eyoc yin naj unin tuꞌ. Catuꞌ jix yujten el yin naj. Yet jun txolan tuꞌ jix waꞌxi can scꞌul naj unin tuꞌ yu Naj. 19Jaꞌ yet jix can Jesús xꞌojli yetoj ebꞌ scuywom tuꞌ jix skꞌanlen ebꞌ tet Naj jaxca tiꞌ:

—¿Tzet yuxan ma el jun pena espíritu tuꞌ yin naj ku jon? ẍi ebꞌ tet Jesús.

20—Yutol cꞌam che yaoc je cꞌul yin Dios. Caw yel chi wal ey jex, ta tol che yaoc je cꞌul yin, caxcꞌal asan jaxca junoj sbꞌakꞌ mostaza, oj skeꞌ je yalon tet junoj wonan jaxca tiꞌ: “Elan titiꞌ, asiꞌ bꞌey junojxa lugar,” ta je chi tet, oj el je yu. Masanil cꞌal tzetyetal oj skeꞌ je yu, ta tol yel che yaoc je cꞌul yin Dios. 21/Jal pax jun tujan pena espíritu tiꞌ, man comonoj chi eli. Asantane chex txali catuꞌ che yijlen nocha je bꞌa, catuꞌ oj skeꞌ je yiꞌon el yin ebꞌ, ẍi Jesús tet ebꞌ./

Yin Eyojto Chi Yaltej Jesús Yu Scamichal Junelxa

(Marcos 9:30-32; Lucas 9:43-45)

22Jaꞌ yet lalan yecꞌabꞌ Jesús yetoj ebꞌ scuywom bꞌey jun lugar chi yij Galilea, jix yalon tet ebꞌ jaxca tiꞌ:

—Jain tiꞌ, caxcꞌal Akꞌbꞌil Wopiso yu Dios xol ebꞌ ket animail tiꞌ an, oj jin ale cꞌaltaꞌ oc yul skꞌabꞌ wan winaj. 23Oj jin yakꞌ cam ebꞌ an, jaꞌ yet yox cꞌual tuꞌ, catuꞌ oj jin pitzcꞌu aoj, ẍi Jesús tet ebꞌ. Jaꞌ yet jix yabꞌen wan tiꞌ ebꞌ, caw jix cusa scꞌul ebꞌ.

Chꞌen Tumin Chi Tejle El Yu Stemplo Dios

24Jaꞌ yet jix apni ebꞌ bꞌey conobꞌ Capernaúm, jix apni ebꞌ tejom el tumin yul stemplo Dios scꞌatan Pedro, catuꞌ jix skꞌanlen ebꞌ jaxca tiꞌ:

—¿Chim yakꞌ jun ja cuywam tuꞌ wan chꞌen tumin chi kꞌanle yu stemplo Dios, ma cꞌam chi yakꞌa? ẍi ebꞌ tet naj.

25—Chi yakꞌa, ẍi Pedro tet ebꞌ.

Jaꞌ yet jix octoj naj Pedro yul na tuꞌ, jaꞌ Jesús jix bꞌabꞌi kꞌanlen tet naj jaxca tiꞌ:

—Simón, ¿tzet ẍi ja cꞌul? ¿Mac tet chi stejel chꞌen tumin ebꞌ rey yul yibꞌankꞌinal tiꞌ? ¿Jam tet ebꞌ yuninal ebꞌ, ma jaꞌ tet ebꞌ txꞌoj conobꞌal? ẍi Jesús tet naj.

26—Jaꞌ ebꞌ txꞌoj conobꞌal chi akꞌoni, ẍi naj Pedro.

Yuxan jix yal Naj Jesús tet naj jaxca tiꞌ:

—Ta queytuꞌ xin, jaꞌ ebꞌ cꞌaale, man sowalil oj chi yakꞌ yet ebꞌ. 27Yet watxꞌ cꞌam chi koche chi tit sjowal ebꞌ kin. Yuxan, asiꞌ stiꞌ jaꞌ mar. Asiꞌ, aeytoj chꞌen anzuelo yul jaꞌ, jaꞌ noꞌ bꞌabꞌel pescado chi michꞌchai, cha wiꞌatej. Jaꞌ yul stiꞌ jun noꞌ tuꞌ oj ilcha jun tumin. Iꞌatej jun tumin tuꞌ, catuꞌ cha wakꞌon jin toolabꞌal yetoj cꞌal ja toolabꞌal tet mac chi tejon el chꞌen tuꞌ.

Currently Selected:

Mateo 17: knj

Highlight

Compare

Copy