Mateo 18

¿Mac Junoj Yel Miman Yeloc Apnoj?

(Marcos 9:33-37; Lucas 9:46-48)

1Jaꞌ yet jun tiempoal tuꞌ jix skꞌanle el ebꞌ scuywom Jesús tet naj jaxca tiꞌ:

—¿Mactxequel yel miman yeloc apnoj xol ebꞌ yalan Yaawil Naj a satcan? ẍi ebꞌ tet Jesús. 2Catuꞌ jix awteletej jun unin yu Jesús tuꞌ, catuꞌ jix yaon oc snan xol ebꞌ. 3Jix yalon naj jaxca tiꞌ:

—Caw yel chi wal ey jex, ta cꞌam chi snaꞌ sbꞌa je cꞌul, ta cꞌam che yute je naꞌbꞌal jaxca ebꞌ unin tiꞌ, ma skeꞌ yoc Naj a satcan je Yaawiloj. 4Yuxan, jaꞌ ebꞌ yeynajil chi yute sbꞌa jaxca jun unin tiꞌ, jaꞌton ebꞌ tuꞌ, caw miman yeloc apnoj yalan jun Yaawil Naj a satcan. 5Yal cꞌal mac chi chaꞌon sjul junoj unin jaxca jun tiꞌ, yutol wet an, jaxca tol jain chin ẍaꞌ ebꞌ an.

Caw Ey Smey Ta Chi Kakꞌ Eyqꞌuey Junojxa Mactxequel

(Marcos 9:42-48; Lucas 17:1-2)

6Ta ey mactxequel chi akꞌon etex el snaꞌbꞌal junoj unin chi yaoc scꞌul win an, caw okꞌbꞌalcꞌule ebꞌ. Yutol caw miman syaꞌilal oj ẍaꞌ yu jun tuꞌ. Yel watxꞌ yet ta chi pixle oc tꞌunan junoj chꞌen chꞌen yet molino yin snukꞌ, catuꞌ chi kꞌojletoj xol jaꞌ mar, yet watxꞌ cꞌam chi yetne el snaꞌbꞌal jun unin tuꞌ.#18:6 Jaꞌ jun chꞌen ẍꞌenal molino, caw miman, jaꞌ noꞌ che chi tokꞌon ecꞌ suyuyoj. 7Caw okꞌbꞌalcꞌule ebꞌ ánima yu wan tzet chi akꞌon etex el snaꞌbꞌal ebꞌ tuꞌ. Tobꞌalkꞌinal ey cꞌaltaꞌ wan tuꞌ, jaꞌ ebꞌ chi etnen el snaꞌbꞌal ebꞌ tuꞌ, yel xacꞌal okꞌbꞌalcꞌule ebꞌ. 8Yuxan, ta jaꞌ junoj je kꞌabꞌ ma junoj je yajan chi akꞌon etex el je naꞌbꞌal, yel watxꞌ che tzokꞌeloj, catuꞌ che kꞌojon eloj, yet watxꞌ cꞌam chi etex el je naꞌbꞌal yu yin junelne. Yutol caxcꞌal man tzꞌajanoj je mimanil, ta oj je chaꞌ je kꞌinal tol ey cꞌal yin tobꞌalkꞌinal, caw watxꞌ je yet. Jal pax ta tzꞌajan je kꞌabꞌ cꞌal je yajan, catuꞌ chex too pax can xol kꞌakꞌ cꞌam chi tani, man watxꞌoj je yet. 9Ta jaꞌ junoj sbꞌakꞌ je sat chi akꞌon etex el je naꞌbꞌal xin, yel pax watxꞌ che yiꞌeltej, che kꞌojon eloj, yet watxꞌ cꞌam chi etex el je naꞌbꞌal yu yin junelne. Yutol caxcꞌal jun chꞌan sbꞌakꞌ je sat, ta oj je chaꞌ kꞌinale tol ey cꞌal yin tobꞌalkꞌinal, caw watxꞌ je yet. Jal ta tzꞌajan cꞌal sbꞌakꞌ je sat, catuꞌ chex too pax can xol kꞌakꞌ bꞌey infierno,* caw man watxꞌoj je yet.

Skꞌaneal Jun Noꞌ Meꞌ Jix Qꞌueytoj

(Lucas 15:3-7)

10Caw ma skeꞌ je yintajnen el junoj ebꞌ unin tiꞌ. Chi wal ey jex, jaꞌ ebꞌ ángel chi teynen junjun unin, eyecꞌ ebꞌ yetoj cu Mam Dios tobꞌalkꞌinal bꞌey satcan. 11/Jain Akꞌbꞌil Wopiso yu Dios xol ebꞌ ket animail tiꞌ an, jix jin jul yu jin colon el ebꞌ qꞌueynajtoj an./ 12Kꞌinaloj ta ey junoj mactxequel ey junoj cien smeꞌ, catuꞌ chi qꞌueytoj junoj noꞌ, ¿cꞌam mi chi sbꞌejcan noꞌ 99 yetbꞌi tuꞌ low bꞌey junoj wonan, catuꞌ chi too seyon ecꞌ noꞌ jix qꞌueytoj tuꞌ? 13Ta chi ilcha noꞌ yu naj, caw chi tzala oc naj yin noꞌ yintaj pax noꞌ 99 ma cꞌal qꞌueytoj tuꞌ. 14Queyton tuꞌ cu Mam eyecꞌ bꞌey satcan xin, man yochwan oj tol ey junoj xol ebꞌ unin tiꞌ chi qꞌueycan eloj.

Sowalil Ey Cu Mimancꞌulal Yin Ket Animail

(Lucas 17:3)

15Ta ey junoj ja wuẍtaj chi oc spenail ey jaach, chach too ja txꞌojli bꞌey scꞌatan, catuꞌ cha walon tet tzet utbꞌil tol jix oc spenail ey jaach. Ta chi ẍaꞌ yabꞌ ey jaach, tol jix ja wakꞌ ganar jun ja wuẍtaj tuꞌ junelxa, chi yal tuꞌ. 16Ta cꞌam pax chi ẍaꞌ yabꞌ ey jaach, yel watxꞌ cha wiꞌtoj jun cawanojxa mac chi too alon ja wetoj tet. “Ey ojabꞌ cawanoj ma oxwanoj testigo, yet watxꞌ ey yip masanil tzet chi al-lei,” jaxca yalon yul An Juun Tzꞌibꞌebꞌilcanoj.*#Deuteronomio 19:15. 17Ta cꞌam pax cꞌal chi ẍaꞌ yabꞌ tet ebꞌ xin, yel watxꞌ cha wal xol jun yambꞌabꞌail tuꞌ. Ta cꞌam cꞌaltaꞌ chi ẍaꞌ yabꞌ ebꞌ xol jun yambꞌabꞌail tuꞌ, can ojabꞌ jaxca junoj txꞌoj conobꞌal, ma jaxca junoj tejom el toolabꞌal* yul ja sat. 18Caw yel chi wal ey jex, jaꞌ tzet oj je yakꞌ sleyal yul yibꞌankꞌinal tiꞌ, ey pax sleyal yu Naj a satcan. Jaꞌ tzet cꞌam sleyal je yu yul yibꞌankꞌinal tiꞌ, cꞌam pax sleyal yu Naj a satcan. 19Chi wal pax can ey jex an, ta ey cawanoj jex jun laan cꞌal ẍaꞌon je cꞌul junoj tzetyetal catuꞌ che kꞌanon yin txail, oj akꞌle ey jex yu cu Mam eyecꞌ bꞌey satcan. 20Yutol yal cꞌal bꞌey eyecꞌ cawanoj ma oxwanoj catuꞌ chi syambꞌan sbꞌa yu yiꞌon ey sbꞌa ebꞌ ey jin an, ey jin ecꞌ yetoj ebꞌ, ẍi Jesucristo. 21Catuꞌ jix sjitzontoj sbꞌa naj Pedro tuꞌ scꞌatan Naj, catuꞌ jix skꞌanlen tet jaxca tiꞌ:

—Jaach cuywam, ta ey junoj wuẍtaj jaxca cꞌal tiꞌ chi oc spenail ey jin an, ¿jayel chi wakꞌ mimancꞌulal yin an? ¿Sowalil mi jujel chi wakꞌ mimancꞌulal yin an? ẍi naj Pedro, jix skꞌanleni.

22—Man cꞌal jujelne oj, caxcꞌal mi jujel setenta el, chi oc spenail ey jaach, akꞌ cꞌal mimancꞌulal yin,#18:22 Jaꞌ jun número 7 tuꞌ, caw tzꞌajan yeoc yul sat ebꞌ Israel. Yu jun tuꞌ, yuxan jaꞌ yet jix yal Jesús; “7 veces 70”, chi yal yeloc apnoj, tol cꞌam chi skeꞌ sbꞌischa jayel chi oc smul ey jon, catuꞌ sowalil chi kakꞌ mimancꞌulal yin. ẍi naj tet.

Skꞌaneal Naj Cꞌam Smimancꞌulal

23Oj waltej ey jex tzet oj yun yeloc ebꞌ eyoc Naj a satcan Yaawiloj. Oj eloc ebꞌ jaxca ebꞌ smooso jun naj rey chi yiꞌ scuenta yin sjec ebꞌ. 24Lalanto ẍaꞌon el yich yiꞌon scuenta tuꞌ, catuꞌ chi iꞌle sjul junoj naj caw ecꞌal mil quetzal#18:24 Jix yal Jesús; “laonebꞌ mil talento”. Jaꞌ jun talento, ecꞌbꞌan mil quetzal sbꞌisil junjun. sjec tet naj rey tuꞌ. 25Cꞌam cꞌal niꞌoj chꞌen yu naj. Cꞌamxa tzet utbꞌil chi yun yakꞌon pax sjec naj tuꞌ. Yuxan jix yal naj rey tuꞌ tol sowalil chi txonle el naj yetoj cꞌal yistil cꞌal yuninal,#18:25 Jaꞌ yet peyxa tuꞌ chi skeꞌ xonle ánima yin yakꞌomal servil yin junelne, yet watxꞌ chi stoolane el sjec ebꞌ. cꞌal jantaj tzet ey tet naj, catuꞌ chi pax sjec naj tuꞌ. 26Catuꞌ jix ey kaan naj sattaj naj rey tuꞌ, catuꞌ jix yalon sbꞌa naj tet naj rey jaxca tiꞌ: “Mamin, caw miman cha wute ja cꞌul win an. Oj wakꞌ pax jin jec tuꞌ ey jaach an,” ẍi naj. 27Catuꞌ jix okꞌ scꞌul naj rey tuꞌ yin naj. Chi joꞌole qꞌuey sjec naj yu naj rey yibꞌan masanil, catuꞌ jix jajle el naj yu naj rey tuꞌ. 28Jaꞌ yet jix eltej naj tuꞌ, catuꞌ jix ilcha el junoj yet moosoal naj yu. Ey mi jayebꞌoj quetzal sjec naj tet naj.#18:28 Jix yal Jesús; “cien denario”. Jun denario stool cꞌu yet jun tiempoal tuꞌ. Yuxan jix oc mitxꞌan naj yin, catuꞌ jix oc pitzꞌan naj yin snukꞌ jun winaj tuꞌ. Jix yalon naj tet jaxca tiꞌ: “Iꞌtej chꞌen ja maan tumin ey jin tinaniꞌ an,” ẍi naj tet naj. 29Catuꞌ jix ey kaan naj ey smaan tuꞌ sattaj naj. Jix yalon jaxca tiꞌ: “Caw miman cha wute ja cꞌul win an. Oj wakꞌ pax jin maan tuꞌ ey jaach an,” ẍi naj. 30Caw ma cꞌal yal scꞌul naj chi yakꞌ mimancꞌulal, jaꞌ tiꞌ yet tol jix too ya can oc preso, masantaꞌcꞌal chi yakꞌ pax smaan tumin naj tuꞌ. 31Ey pax wanxa yet moosoal naj jix ilon tzet jix yun naj, caw chi cus scꞌul ebꞌ yu. Yuxan jix too yal ebꞌ tet naj patrón tuꞌ yu tzet jix yun naj tuꞌ. 32Catuꞌ jix awtele naj cꞌam smimancꞌulal tuꞌ yu naj patrón tuꞌ, jix yalon naj tet naj jaxca tiꞌ: “Caw pena ja cꞌul jaach mooso. Jix jin joꞌole qꞌuey masanil ja jec, yu jix jaach oc tean win an. 33Yu jix wakꞌ mimancꞌulal ja win, smoo jix ja wakꞌ mimancꞌulal pax yin naj ja wet moosoal,” ẍi naj rey tuꞌ tet naj. 34Caw jix tit sjowal naj rey tuꞌ sicꞌlebꞌil. Jix aletoj naj preso yu naj rey tuꞌ. Jix yalon naj rey tol chi ale oc syaꞌtajilal yibꞌan naj masantaꞌcꞌal chi yakꞌ pax masanil sjec naj tet naj rey tuꞌ. 35Ta cꞌam che yakꞌ mimancꞌulal yin masanil je cꞌul yin spenail je yuẍtaj, je yanabꞌ chi oc ey jex, cꞌam pax chi yakꞌ mimancꞌulal cu Mam eyecꞌ satcan je yin, ẍi Jesús tet ebꞌ.

Currently Selected:

Mateo 18: knj

Highlight

Compare

Copy