Éxodo 31

Ebꞌ Swaꞌnemal A Scalubꞌal Jehová

(Éxodo 35:30; 36:1)

1Jix kꞌanabꞌ pax Jehová tet naj Moisés, jix yalon tet jaxca tiꞌ:

2Jaꞌ xol jun bꞌulan ebꞌ yicꞌaal Judá chin sicꞌ can el Besalel, scꞌaal Urí, yitxiquin Hur. 3Caan xa oc Wespíritu yin snaꞌbꞌal, yet watxꞌ ey sjelanil, cꞌal snaꞌbꞌal, yu swaꞌnen a yal cꞌal tzetyetal. 4Ey snaꞌbꞌal yin swaꞌnen yechel jantaj mulnail oj ocoj, jaxca yin chꞌen oro, yin chꞌen plata cꞌal yin chꞌen bronce; 5oj skeꞌ smulna oc yin wan chꞌen chꞌen watxꞌ yili, jacꞌalaꞌ yotaj pax chi swaꞌne ey teꞌ teꞌ, cꞌal yin jantaj mulnail. 6Jaxa naj Oholiab, scꞌaal Ahisamac jix waoc yu scolwa oc yetoj, jaꞌton naj titnaj yin yicꞌaal naj Dan. Jaꞌ masanil ebꞌ jelan snaꞌbꞌal jix wakꞌcan jelanilal tet ebꞌ. Jaꞌ ebꞌ tuꞌ oj waꞌnen masanil tzetyetal jix wal can ey jaach: 7Jaꞌton bꞌey snail jin calubꞌal, cꞌal bꞌey teꞌ Scaẍail Jin Wa Kꞌane, cꞌal smajil teꞌ caẍa bꞌey chi akꞌle tan spenail, yetoj cꞌal masanil mitxꞌkꞌabꞌe ey bꞌey jin calubꞌal, 8yetoj teꞌ meẍa, cꞌal jantaj mitxꞌkꞌabꞌe, yetoj cꞌal jun sbꞌatxlubꞌal tzejtebꞌal tol oro cꞌal eloj, cꞌal smitxꞌkꞌabꞌil; yetoj pax bꞌey chi akꞌle xaambꞌal yetoj incienso, 9cꞌal bꞌey chi tzꞌaꞌ xaambꞌal cꞌal smitxꞌkꞌabꞌil, yetoj pax jun miman palangana, yetoj cꞌal sbꞌatxlubꞌal yalan, 10cꞌal an pichile tol chembꞌil, chi yal yeloc apnoj jaꞌton spichil naj Aarón tol miman yeloc apnoj; yetoj cꞌal yet ebꞌ scꞌaal, jaꞌton wan chi skꞌan ebꞌ yin yopiso, 11yetoj aceite olivo chi kꞌanle yet chi oc can junoj mactxequel wetoj, cꞌal incienso tol caw sakꞌal chi kꞌanle bꞌey jin calubꞌal. Jaꞌ wan tuꞌ, sowalil chi swaꞌne ebꞌ jaxca jix yun walon ey jaach, ẍi Jehová tet naj Moisés.

Scꞌual Xewilal

(Éxodo 35:1-3)

12Jix yalon pax Jehová tet naj Moisés:

13Al tet masanil ebꞌ ja wet Israelal tol sowalil chi sjije scꞌual xewilal ebꞌ, yutol jaꞌ yet jun cꞌu tuꞌ wet chi yun can ocoj. Jaꞌ jun tuꞌ xꞌoxbꞌanil jin wa kꞌane je yetoj, yet watxꞌ che yotajne eloj tol jain jix jex jin sicꞌ can oc wetoj.

14Jaꞌ jun scꞌual xewilal tuꞌ, miman ojabꞌ yeloc apnoj yul je sat, sowalil che jije. Jaꞌ mac cꞌam chi jijen jun cꞌual tuꞌ, sowalil chi cami, yetoj cꞌal pax oj, ta ey mac chi mulna yet jun cꞌual tuꞌ, tol chi cami. 15Asan yin wajebꞌ cꞌu chex mulnai; jaxa yet sjuj cꞌual xin, chex xewi, yutol wet yeoc jun cꞌu tuꞌ. Yal cꞌal mac chi mulna yet scꞌual xewilal, tol chi cami. 16Yu tuꞌ xin, sowalil che jije jun scꞌual xewilal tuꞌ je masanil, yutol jaꞌ jun tuꞌ, xꞌoxbꞌanil jin wa kꞌane je yetoj yin junelne. 17Junelne chi can jun txꞌoxbꞌanile tiꞌ je xol jaex Israel jex tiꞌ, ẍi Dios. Yutol yin wajebꞌ cꞌu jix mulna Jehová, jix swaꞌne satcan cꞌal txꞌotxꞌ txꞌotxꞌ tiꞌ, jaxa yet sjuj cꞌual, tol jix xewi.

18Jaꞌ yet jix lawi skꞌanabꞌ Jehová yetoj naj Moisés bꞌey sjolom wonan Sinaí, jix yakꞌon caabꞌ patxan chꞌen chꞌen tet naj Moisés, bꞌey tzꞌibꞌebꞌil oc wan chejbꞌanile tol jaꞌcaw Dios jix tzꞌibꞌencanoj.

Currently Selected:

Éxodo 31: knj

Highlight

Copy

Compare