Éxodo 32
32
Jun Yechel Wacax Tol Oro Cꞌal Eloj
(Deuteronomio 9:6-29)
1Jaxa yet jix yilon ebꞌ conobꞌ Israel, tol jaꞌ naj Moisés chi ecꞌ tiempo yu naj, yutol cꞌam cꞌal chi eyol naj bꞌey wonan Sinaí, masanil ebꞌ jix syambꞌa oc joyan sbꞌa yin naj Aarón, jix yalon ebꞌ tet naj:
—Jaꞌ tinaniꞌ, chi koche tol cha waꞌne junoj cu diosal chi cu ijbꞌani, yutol man kotajoj tzet chi iꞌon naj Moisés, naj jix cu iꞌon eltej bꞌey Egipto, ẍi ebꞌ conobꞌ tuꞌ.
2Catuꞌ jix takꞌwi Aarón tet ebꞌ conobꞌ jaxca tiꞌ:
—Jaꞌ tinaniꞌ xin, yambꞌawej oc masanil chꞌen ome tol oro cꞌal eloj eyoc yin xiquin je yistil cꞌal yet ebꞌ je yuninal, catuꞌ che yiꞌontej ey jin.
3Masanil ebꞌ jix yiꞌel yom eyoc yin xiquin, tol oro cꞌal eloj, catuꞌ jix yiꞌontej ebꞌ tet naj Aarón. 4Catuꞌ jix ẍaꞌon ecꞌ naj, jix yakꞌon uloj chꞌen naj xol kꞌakꞌ, catuꞌ jix swaꞌnen ey jun yechel wacax naj yetoj chꞌen. Jix yilon masanil ebꞌ ánima tol jix waꞌxi eyoj, jix yalon ebꞌ jaxca tiꞌ:
—Jex wet Israelal, jaꞌton wal jun cu diosalwej tiꞌ, jun jix cu iꞌon eltej bꞌey Egipto, ẍi ebꞌ.
5Jaꞌ yet jix yilon naj Aarón tol jix waꞌxi ey jun yechel wacax tuꞌ, catuꞌ jix swaꞌnen jun yet xaambꞌal sattaj jun yechel wacax tuꞌ. Jix lawi tuꞌ, jix yalon yin ipal jaxca tiꞌ:
—Jaꞌ yet yecal chi kawej oc junoj miman kꞌin sattaj Jehová, ẍi naj.
6Jaxa yet jix sajbꞌi el yet junxa cꞌu, jix syambꞌa oc sbꞌa masanil ebꞌ ánima, jix yakꞌon xaambꞌal ebꞌ tol chi tzꞌaꞌi, cꞌal xaambꞌal yet watxꞌcꞌulal. Jix lawi tuꞌ, jix ey chotan ebꞌ, catuꞌ jix low ebꞌ, cꞌal yuqꞌuen ebꞌ tzet chi ucꞌlei. Jix lawi tuꞌ xin, jix a bꞌulna ebꞌ yakꞌon canal, catuꞌ jix yunen spenail ebꞌ sattaj jun sdiosal tuꞌ. 7Yu tuꞌ xin, jix yalon Jehová tet Moisés jaxca tiꞌ:
—Jaꞌ tinaniꞌ paxan eytoj yin eymanil, yutol jaꞌ ebꞌ conobꞌ jix ja wiꞌeltej bꞌey Egipto, caw jix etex el snaꞌbꞌal ebꞌ. 8Yin eymanil, jix yiꞌel sbꞌa ebꞌ yin tzet jix walaꞌ, yin xacꞌal eymanil jix swaꞌne jun yechel wacax ebꞌ, lalan yoc ebꞌ yin eyilal tet, cꞌal yakꞌon xaambꞌal ebꞌ tet, chi yalon ebꞌ jaxca tiꞌ: Jex ket Israelal, jaꞌton wal cu diosal jix cu iꞌon eltej bꞌey txꞌotxꞌ Egipto, ẍi ebꞌ. 9Jix yalon Jehová tet Moisés:
—Jix wilaꞌ tol caw pit snaꞌbꞌal jun tujan ánima tiꞌ. 10Jaꞌ tinaniꞌ xin, man chin ja tenoc tucanoj, jitzel ja bꞌa jin cꞌatan, yutol jix tit jin jowal yin wan ánima tiꞌ, tol oj jin qꞌueyel masanil ebꞌ. Yuxan jaxa yetoj ebꞌ ja wicꞌaal oj jin waꞌne junoj miman nación, ẍi Dios tet naj Moisés.
11Jaxa naj Moisés jix oc cꞌal ian skꞌanon mimancꞌulal tet Jehová, yu ebꞌ conobꞌ tuꞌ, catuꞌ jix yaloni:
—Jaach Jehová jin Diosal, ¿tzet wal yuxan chi tit sjowal ja cꞌul yibꞌan ja conobꞌ, tol jaach jix ja wiꞌeltej ebꞌ bꞌey Egipto yetoj ja wipal? 12¿Tzet yuxan oj ja chaꞌ yal ebꞌ ánima a Egipto jaxca tiꞌ: Ilaꞌ tol pena snaꞌbꞌal Dios yin ebꞌ, yuxan jix iꞌle eltoj ebꞌ titiꞌ, catuꞌ chi too yakꞌon cam ebꞌ bꞌey satlaj acꞌal, chi qꞌueyle el ebꞌ yu Naj bꞌey sat txꞌotxꞌ txꞌotxꞌ tiꞌ? Yu tuꞌ xin, tol oj wal cꞌam chi tit ja jowal yibꞌan ebꞌ; cꞌam ojabꞌ cha waoc syaꞌilal yibꞌan ebꞌ ja conobꞌ tiꞌ. 13Toloj wal cha naꞌtej ebꞌ ja chejabꞌ, jaꞌton: Abraham, Isaac cꞌal Jacob. Jaꞌ tet ebꞌ jix ja wakꞌcan ja tiꞌ, catuꞌ jix ja walon tet ebꞌ jaxca tiꞌ: Tol miman oj yun je bꞌisil jaxca sbꞌisil weycan bꞌey satcan. Jacꞌalaꞌ jun txꞌotxꞌ txꞌotxꞌ, tol jix ja walaꞌ tol oj ja wakꞌcan tet ebꞌ, ẍi Moisés, tet Dios.
14Yu tuꞌ xin, jix sqꞌuexon snaꞌbꞌal Jehová yin tol cꞌam chi sqꞌueyel conobꞌ tuꞌ. 15Catuꞌ jix meltzo eytej naj Moisés bꞌey sjolom wonan Sinaí, lacbꞌil oc caabꞌ chꞌen chꞌen bꞌey tzꞌibꞌebꞌil oc wan ẍejbꞌanil Jehová yin scaabꞌ paqꞌuil chꞌen. 16Jaꞌcaw Dios jix waꞌnen wan chꞌen tuꞌ scaabꞌil, catuꞌ jix stzꞌibꞌen oc ẍejbꞌanil tuꞌ yin chꞌen.
17Jaxa yet jix yabꞌen naj Josué yel yaw ebꞌ ánima tuꞌ, jix yalon tet naj Moisés jaxca tiꞌ:
—Jaxca wal tol jowal eyocoj yet chi kabꞌen yel yaw ebꞌ conobꞌ bꞌey bꞌulan ey ebꞌ tuꞌ, ẍi Josué tet Moisés.
18Catuꞌ jix takꞌwi Moisés jaxca tiꞌ:
—Man bꞌitoj yet tzalacꞌulal, tam wal bꞌit yet akꞌo ganar jowal, man pax bꞌitoj yet ánima chi cam yu jowal, yutol comon bꞌit wan chi oc tuꞌ chi wabꞌe, ẍi Moisés.
19Jaxa yet lalanxa yeyol naj Moisés bꞌey scawilal bꞌey bꞌulan ecꞌ ebꞌ tuꞌ, jix yilon oc naj jun yechel wacax, cꞌal canal chi yun ebꞌ ánima. Caw jix tit sjowal naj sicꞌlebꞌil, catuꞌ jix skꞌojon ey chꞌen chꞌen naj bꞌey tzꞌibꞌebꞌil oc wan chejbꞌanile tuꞌ, catuꞌ jix poꞌotoj chꞌen bꞌey yich jun wonan tuꞌ. 20Yin eymanil jix bꞌet yiꞌon eltej jun yechel wacax tuꞌ naj, catuꞌ jix skꞌojon atoj yul jun jorna xol kꞌakꞌ. Catuꞌ jix sjutxꞌon poꞌo naj, kocꞌ xacꞌal jix yutetoj, catuꞌ jix yaon eytoj spojojal naj tuꞌ xol jaꞌ, catuꞌ jix yalon naj tet ebꞌ Israel, jaꞌ tinaniꞌ ucꞌwej eytoj. 21Jix yalon Moisés tet naj Aarón:
—¿Tzet wal jix jaach yute wan ánima tiꞌ, yet jix ja chaꞌon yun jun miman spenail tiꞌ ebꞌ? ẍi Moisés.
22Catuꞌ jix takꞌwi Aarón jaxca tiꞌ:
—Chi wal ey jaach, cꞌam ojabꞌ chi tit ja jowal win. Caw ja wotaj sicꞌlebꞌil tol jaꞌ snaꞌbꞌal ebꞌ ánima tiꞌ, spenail cꞌal chi yoche ebꞌ. 23Jaꞌ ebꞌ jix alon ey jin, tol chin waꞌne junoj sdiosal ebꞌ chi ijbꞌani, cꞌal scol-le ebꞌ yu, yutol jaꞌ Moisés, naj jix cu iꞌon eltej bꞌey Egipto, man kotajoj tzet chi iꞌon naj, tejan manxa oj eyol naj, ẍi ebꞌ ey jin. 24Yu tuꞌ xin, jix walon tet ebꞌ jaxca tiꞌ: Jaꞌ mac eyoc chꞌen ome oro yin xiquin, iꞌwejtej chꞌen ey jin, jin chi tet ebꞌ. Jix lawi yiꞌontej ebꞌ wan tuꞌ ey jin, jix wakꞌon uloj chꞌen xol kꞌakꞌ. Queytuꞌ jix yun swaꞌxi ey jun yechel wacax tiꞌ, ẍi naj Aarón tuꞌ.
25Jix naꞌcha el yu naj Moisés, tol jaꞌ ebꞌ ánima tuꞌ, jix ẍaꞌ scꞌul ebꞌ yakꞌon sqꞌuixwiloj sattaj ebꞌ chi jowi oc yin ebꞌ, jaxa Aarón xin, ma tenchanele niꞌoj ebꞌ conobꞌ tuꞌ yu. 26Jaxa Moisés jix oc linan stiꞌel bꞌey bꞌulan ecꞌ ebꞌ tuꞌ, jix yalon jaxca tiꞌ:
—Jaꞌ tinaniꞌ xin, jaꞌ mac chi yal scꞌul chi yaoc sbꞌa yul skꞌabꞌ Jehová, tit ojabꞌ ebꞌ jin cꞌatan tiꞌ, ẍi naj.
Masanil ebꞌ naj Levita, jix sjitztej sbꞌa ebꞌ naj.
27Jix yalon Moisés tet ebꞌ jaxca tiꞌ:
—Jaꞌ Jehová cu Diosal chi chejon wal ey jex, tol junjun jex cꞌal, che yiꞌtoj je yespada, catuꞌ chex too bꞌey bꞌulan jex ey tuꞌ, chex ecꞌ xol-laj na che makꞌon cam ebꞌ je yuẍtaj, cꞌal ebꞌ je watxꞌil ánima, cꞌal ebꞌ eyecꞌ je cawilal, ẍi Jehová, ẍi naj Moisés.
28Jix sjije ebꞌ naj Levita jun chejbꞌanile tuꞌ, ey mi 3,000 ebꞌ winaj jix cam yet jun cꞌu tuꞌ. 29Jix lawi tuꞌ xin, jix yalon Moisés tet ebꞌ Levita jaxca tiꞌ:
—Jaꞌ tinaniꞌ jix je yaoc je bꞌa yul skꞌabꞌ Jehová, ilaꞌ tol ey jex jix je makꞌ cam je cꞌaal cꞌal je yuẍtaj. Yu tuꞌ xin, chi yakꞌ Jehová syaaxilal je yibꞌan, ẍi Moisés tet ebꞌ.
30Jaxa yet junxa cꞌual, jix yalon Moisés tet ebꞌ ánima:
—Caw miman je penail jix je yaocoj. Jaꞌ tinaniꞌ, chin to junelxa bꞌey sjolom wonan Sinaí bꞌey eyecꞌ Jehová. Jaꞌ tituꞌ oj jin kꞌanabꞌ yetoj Naj, jaxta wal oj yakꞌ mimancꞌulal yibꞌan je penail tuꞌ, ẍi naj Moisés.
31Jix lawi tuꞌ xin, jix too naj bꞌey sjolom wonan Sinaí bꞌey eyecꞌ Jehová, jix yaloni:
—Yel ton jaach Jehová, caw miman spenail jun conobꞌ tiꞌ jix oc ja sattaj, yutol jix swaꞌne jun sdiosal ebꞌ tol oro cꞌal eloj, catuꞌ jix oc ebꞌ yin eyilal tet. 32Yu tuꞌ xin, chi wal ey jaach, akꞌ mimancꞌulal yin spenail ebꞌ. Ta cꞌam cha wakꞌ mimancꞌulal xin, catuꞌ cha joꞌon eltej jin bꞌi yul an libro bꞌey tzꞌibꞌebꞌil ey sbꞌi ebꞌ tol ja wet xa yeocoj, ẍi naj Moisés tet Jehová.
33Catuꞌ jix takꞌwi Jehová jaxca tiꞌ:
—Jaꞌ mac chi oc spenail ey jin, jaꞌton ebꞌ tuꞌ chin joꞌqꞌuey sbꞌi yul an libro. 34Yu tuꞌ xin, asiꞌ, catuꞌ cha chejontoj ebꞌ conobꞌ bꞌey jun conobꞌ jix wal ey jaach. Jaꞌ jun wángel oj jex ijbꞌanoj, oj jul scꞌual yet oj waon oc syaꞌilal ebꞌ ánima tiꞌ yu spenail ebꞌ, ẍi Jehová.
35Jix lawi tuꞌ xin, jaꞌ Jehová jix aontej jun miman syaꞌilal yibꞌan ebꞌ conobꞌ Israel, yu cꞌal tol jix oc ebꞌ yin eyilal tet jun yechel wacax jix swaꞌne naj Aarón.
Currently Selected:
Éxodo 32: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
