Sekaraea 4
4
Mekfaev spesol drim: Wanfala frem long gol fo putum olketa lam an tufala oliv tri
1Mi lukim narafala spesol drim moa, an long spesol drim ya mi lukim disfala enjel hu hemi bin gohed fo tok wetem mi. Hemi kam sekem mi, olsem hemi laek fo wekapem mi. 2Hemi askem mi olsem, ??Wanem nao yu lukim??
An mi tok olsem long hem, ?Mi lukim wanfala spesol frem fo putum olketa lam wea olketa bin wakem long nambawan gol. Antap long frem ya hemi garem wanfala baol fo putum oel an sevenfala lam. An evri lam ya hemi garem sevenfala ples fo putum wik. 3Tufala oliv tri tu i stanap kolsap long lam ya, wanfala long raetsaet long hem, an narawan long lefsaet.?#Revelesin 11:4.
4Nao mi askem enjel ya olsem, ??Bikman, wanem nao mining blong olketa samting ya??
5Hemi tok olsem long mi, ??Waswe, yu no save long mining blong olketa samting ya??
An mi tok olsem long hem, ?Nomoa, bikman. Mi no save.?
6Oraet, enjel ya hemi tok olsem long mi, ?Hem ya nao Mesij blong Yawe long Serababel:#Esra 5:2.
I no long strong blong yufala.
An i no long paoa blong yufala.
Bat i long spirit blong mi nomoa.
?Hem nao toktok blong Yawe hu hemi garem evri paoa.
7?Long spirit ya, Serababel save winim evri had samting wea hemi save stopem hem fo no finisim Tambuhaos blong Yawe. Ya, hemi olsem wea hemi save mekem wanfala bikfala maonten fo kamap flat ples. An taem hemi putum las ston long haos ya, bae olketa evriwan i singaot bikfala olsem, ?!Hemi gud tumas! !Hemi gud tumas!??
8Den enjel ya hemi talemaot Mesij blong Yawe long mi olsem, 9-10?Serababel hem seleva nao hemi putum faondesin blong Tambuhaos ya, an bae hem seleva nao hemi finisim tu waka long haos ya. Distaem samfala pipol i tingdaonem olketa smolfala samting wea olketa wakaman i duim, bikos waka ya hemi gohed slou nomoa. Bat taem olketa lukim dat Serababel nao hemi mekem las ston blong Tambuhaos ya fo hemi stret, bae olketa hapi tumas.?
Den mi gohed fo tok olsem, ?Serababel, taem olketa samting ya i hapen, bae yu save dat Yawe hu hemi garem evri paoa hemi sendem mi long yufala.?
Nao enjel ya hemi ansarem kuestin blong mi olsem, ?Sevenfala lam ya i olsem sevenfala ae blong Yawe, wea i save lukluk long evri ples long disfala wol.?#Revelesin 1:4; 3:1; 4:5; 5:6.
11Den mi askem hem olsem, ??Bat wanem nao mining blong tufala oliv tri ya wea i stanap long tufala saet blong disfala spesol frem??
12An mi tok moa long hem olsem, ?Tufala paep wea olketa wakem long gol i stap andanit long tufala oliv Brans, an oliv oel hemi gohed fo ran kamaot long tufala. ?Wanem nao mining blong olketa samting ya??
13Hemi ansarem mi olsem, ??Waswe, yu no save long mining blong olketa samting ya??
An mi tok olsem long hem, ?Nomoa, bikman. Mi no save.?
14So hemi tok olsem, ?Yawe hemi rul ovarem evrisamting long disfala wol, an tufala samting ya, hem nao tufala man wea bae hemi siusimaot fo duim waka blong hem.?
Currently Selected:
Sekaraea 4: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.