Sekaraea 14
14
Bae Yawe hemi rul ovarem disfala wol
1-2Wanfala de bae hemi kam wea Yawe hemi kam fo duim samting. Long datfala de, bae hemi tekem kam pipol blong evri narafala kantri fo hipap tugeta fo faet agensim Jerusalem. Bae olketa winim taon ya, an tekova long hem. Bae olketa go insaet long olketa haos, an tekemaot evrisamting blong pipol long taon, an divaedem olketa samting ya barava long ae blong olketa. An bae olketa reipem olketa woman, an bae olketa fosim haf long olketa man an woman fo lusim lan blong olketa fo go stap long kantri blong olketa. Bat narafala haf bae i save stap nomoa long taon ya.
3Den Yawe bae hemi goaot fo faet agensim olketa kantri ya long wei wea oltaem hemi mekem long taem fo faet. 4Long datfala de, bae hemi stanap antap long Hil blong Oliv Tri aotsaet long Jerusalem long ist, an bae hil ya hemi divaed long midol long hem. Bae haf hemi muv go long not, an nara haf hemi muv go long saot, an bikfala vali bae hemi stap long midol, stat long ist go kasem long west. 5Bae yufala ranawe gotru long disfala vali long midol long tufala hil ya, disfala vali wea hemi go-go kasem ples long Asal. Ya, bae yufala ranawe kuiktaem olsem wea olketa grani blong yufala bin ranawe long taem blong etkuek long taem blong King Yusaea, hu hemi king blong Jiuda bifoa. Den Yawe God blong mi, bae hemi kam wetem olketa holi enjel blong hem.
6Taem datfala de hemi kam, bae no eni laet, an bae hemi no tukol, an bae no eni aes.#14:6 Long Hibru Baebol, mining blong disfala ves hemi no klia. 7Bae no eni narafala de olsem datfala de. Bae no eni delaet an no eni tudak. Bat long ivining, bae laet hemi kam moa. An Yawe nomoa hemi save hao nao disfala de hemi save kamap.
8Taem datfala de hemi kam, wata wea hemi save givim laef bae hemi ran kamaot from Jerusalem. Haf long hem bae hemi ran godaon long Ded Si, an narafala haf bae hemi ran go long Mediterenian Si. Nomata hemi ren o hemi no ren, bae disfala wata hemi ran olowe nao. Bae hemi nating save drae long enitaem.#Esikiel 47:1; Jon 7:38; Revelesin 22:1.
9Bae Yawe hemi kamap King long disfala wol. Long datfala de, Yawe nomoa hemi God, an bae pipol i kolem hem long wanfala nem nomoa.
10An long evri ples long disfala lan, stat long Geba long not go kasem Rimon long saot, bae hemi kamap levol. Bat Jerusalem bae hemi stap seleva long ples blong hem antap long maonten. Wolston blong hem bae hemi stat long Geit blong Benjamin go long Olo Geit an go kasem Kona Geit. An bae hemi stat long Gadhaos blong Hananel, go kasem ples fo mekem waen blong king. 11Olketa pipol blong ples ya bae i stap gudfala fo evritaem olowe. Bae no enisamting hemi save kam fo spoelem hem. Bae Jerusalem hemi sef.#Revelesin 22:3.
12Hem ya nao disfala ravis sik wea bae Yawe hemi sendem fo kasem evri pipol wea i bin faet agensim Jerusalem. Taem olketa stap laef yet, bodi blong olketa bae hemi gohed fo roten. Olketa ae blong olketa an tang blong olketa bae hemi roten tu.
13Long datfala de, bae Yawe hemi mekem olketa evriwan fo fraet an fo lusim tingting. An bae olketa kasholem fren blong olketa, an trae fo kilim hem dae. 14Olketa pipol blong Jiuda tu bae i faet long Jerusalem. An olketa gudfala samting blong narafala kantri wea i stap raonem Jerusalem olsem olketa gol, an silva, an kaleko wea i plande tumas, bae olketa pipol blong Jerusalem i kolektem evrisamting ya from olketa.
15An semkaen ravis sik tu, bae hemi kasem olketa hos blong olketa wetem hafkas hos, an olketa kamel, an olketa dongki, an olketa narakaen animol blong olketa, wea i stap long olketa ples wea olketa enemi ya i putumap olketa haostent blong olketa long hem.
16Den long evri yia, olketa pipol blong olketa narafala kantri hu bin faet agensim Jerusalem, olketa wea i stap laef yet, bae olketa kam long Jerusalem fo wosipim King Yawe hu hemi garem evri paoa, an fo mekem Bikde fo Stap long Smolfala Lif Haos.#Levitikas 23:39-43. 17Sapos pipol blong eni kantri i les fo kam long Jerusalem fo wosipim King Yawe hu hemi garem evri paoa, bae hemi no save sendem kam ren long kantri blong olketa. 18An sapos pipol blong Ijip i les fo kam mekem Bikde fo Stap long Smolfala Lif Haos, bae hemi no save sendem kam ren long olketa tu. An bae Yawe hemi sendem ravis sik fo kasem olketa, olsem hemi sendem long olketa narafala kantri wea i les fo kam long disfala fist. 19Hem ya nao panis wea bae hemi kasem pipol blong Ijip, an pipol blong olketa narafala kantri wea i les fo kam mekem Bikde fo Stap long Smolfala Lif Haos.
20Long datfala de, olketa bel wea i hang long olketa strap blong olketa hos, bae olketa raetem disfala toktok long olketa olsem, ?Mektambu fo Yawe.? An olketa sospen wea i stap insaet long Tambuhaos, bae i kamap tambu, barava olsem olketa tambu besin wea i stap kolsap long olta.#Eksodas 28:36; 39:30. 21An evri sospen blong pipol long Jerusalem an blong olketa narafala pipol long Jiuda, bae i kamap tambu fo Yawe. Bae olketa pipol save yusim olketa fo kukim olketa tambu mit blong sakrifaes. An long datfala de, olketa bisnisman#14:21 ?bisnisman? Long Hibru langguis, disfala wod hemi sem olsem nem fo olketa pipol blong Kenan. Samfala pipol ting olsem hemi minim wea no eni hiden pipol save kam insaet long Tambuhaos. bae i nating save mekem moa bisnis insaet long Tambuhaos blong Yawe hu hemi garem evri paoa.
Currently Selected:
Sekaraea 14: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.