Sekaraea 12
12
Yawe bae hemi sevem Jerusalem
1Wanfala profesi: Hem ya nao Mesij blong Yawe abaotem Israel. Yawe hu hemi mekem skae an disfala wol, an givim laef long man, hemi tok olsem, 2?Bae mi mekem disfala taon long Jerusalem fo kamap olsem kap wea waen hemi fulap long hem, an olketa narafala kantri wea i stap raonem bae i dring long hem. Bihaen, bae olketa gohed fo wakabaot olsem man wea hemi drang. An taem olketa kam fo raonem Jerusalem fo faet agensim, bae olketa raonem olketa narafala taon tu long Jiuda, fo faet agensim olketa. 3Bat long datfala de, taem evri kantri long disfala wol i joen tugeta fo kam faet agensim Jerusalem, bae mi mekem Jerusalem fo kamap olsem wanfala barava hevi ston. Sapos eniwan long olketa hemi trae fo muvum, bae hemi garekil nogud. 4Long datfala de, bae mi mekem evri hos blong olketa fo fraet an lusim tingting, an olketa man fo ran long olketa hos ya, bae hed blong olketa hemi kamap krangge. Bat bae mi lukaftarem gudfala olketa pipol blong Jiuda, mekem olketa enemi i nating save spoelem olketa. Olketa enemi blong olketa, bae mi mekem evri hos blong olketa fo blaen. 5An taem olketa laen blong Jiuda i lukim samting ya, bae olketa save tok olsem, ?Yawe hu hemi garem evri paoa, hem nomoa hemi mekem olketa pipol blong hem long Jerusalem fo kamap strong olsem.?
6?Long datfala de, olketa lida blong Jiuda bae i olsem aean baket wea hemi fulap long faea an hemi stap insaet long hip faeawud, o olsem stik faea wea hemi laet an hemi bonem olketa gras wea hemi drae fogud. Bae olketa spoelem nogud evri kantri long evri saet. Bat Jerusalem bae hemi stap gudfala nomoa long ples blong hem.
7?Mi Yawe bae mi mekem olketa soldia blong Jiuda fo win fastaem, an bihaen bae mi mekem olketa laen blong Deved an olketa pipol blong Jerusalem fo win. Bae mi duim olsem, mekem biknem blong olketa pipol blong Jerusalem i no save kamap hae moa winim olketa narafala pipol blong Jiuda. 8Long datfala de, bae mi olsem wanfala sil fo gadem olketa wea i stap long Jerusalem. Nomata samfala long olketa i wik fogud, bat bae mi mekem olketa evriwan fo kamap strong olsem King Deved bifoa. An olketa long laen blong King Deved, bae i olsem God long olketa, an olsem Enjel blong mi Yawe hu hemi gohed fo lidim olketa. 9Long datfala de, olketa pipol blong olketa narafala kantri wea i laek fo faet agensim Jerusalem, bae mi spoelem olketa evriwan.?
Olketa blong Israel bae i sore an krae
10Yawe hemi gohed fo tok olsem, ?Bae mi mekem olketa laen blong Deved an olketa pipol blong Jerusalem fo barava garem gudfala tingting, wea olketa save sore long narafala man, an olketa save prea fo mi helpem olketa. Bae olketa lukluk go long mi, disfala man wea olketa spiarem.#Jon 19:37; Revelesin 1:7. An bae olketa sore an krae fo hem, olsem man wea hemi garem wanfala pikinini nomoa an hemi dae, o man wea fasbon pikinini blong hem hemi dae. 11Long datfala de, olketa pipol long Jerusalem bae i krae tumas, olsem wea bifoa, olketa pipol i krae long Hadad-Rimon#12:11 ?Hadad-Rimon? Samfala pipol ting olsem disfala Hadad-Rimon hemi nem blong wanfala vilij long bikfala flat ples long Jesreel, wea taon long Megido hemi kolsap long hem. Olketa ya i ting olsem hem nao ples wea King Josaea hemi dae long faet. Lukim 2 Kings 23:28-30 an 2 Kronikols 35:20-27. Samfala narafala pipol ting olsem nem ya hemi narafala nem blong god Baal, wea olketa pipol blong Kenan bifoa bin biliv olsem hemi gohed fo mekem olketa gaden blong olketa i grou gudfala. Long evri yia, taem olketa lif blong olketa tri i gohed fo foldaon, olketa ya i biliv olsem god ya blong olketa hemi dae, nao olketa krae bikfala fo hem. long flat ples ya kolsap long taon long Megido. 12-14Evri famili long datfala kantri, bae i krae long olketa ples blong olketa. Olketa laen blong King Deved, an laen long san blong hem Natan, an traeb blong Livae, an laen long san blong hem Simei, an olketa narafala famili tu, bae i krae long olketa ples blong olketa. Bae olketa man i krae long wanfala ples, an olketa woman long narafala ples.
Currently Selected:
Sekaraea 12: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.