Sefenaea 1
1
Fas toktok
1Hem ya nao Mesij blong Yawe wea hemi talemaot long Profet Sefenaea, san blong Kusi, long taem wea King Josaea, san blong King Amon, hemi king long Jiuda. Profet ya hemi blong laen blong King Hesekaea. King Hesekaea hemi dadi blong Amaraea, an Amaraea hemi dadi blong Gedalaea, an Gedalaea hemi dadi blong Kusi, an Kusi hemi dadi blong Profet Sefenaea.#1:1 Josaea hemi king long Jiuda stat long 640 B.K. go kasem 609 B.K. Lukim 2 Kings 22:1—23:30; 2 Kronikols 34:1—35:27.
Yawe bae hemi spoelem disfala wol
2Profet Sefenaea hemi talemaot dat Yawe hemi tok olsem, ?Evrisamting long disfala wol, bae mi finisim. 3Olketa pipol, an olketa animol, an olketa bed, an olketa fis, bae mi kilim dae olketa evriwan. An bae mi spoelem finis tu olketa samting wea i mekem olketa nogud man fo sin.
Mi Yawe, an hem nao Mesij blong mi.?
Yawe bae hemi panisim olketa blong Jiuda
4Yawe hemi tok olsem, ?Bae mi agensim olketa pipol blong Jerusalem an olketa pipol blong Jiuda. Bae mi spoelem an kilim dae olketa evriwan hu i wosipim disfala god Baal, an bae mi finisim nem blong olketa prist blong hem mekem no eniwan save tingim olketa ya. 5Bae mi kilim dae olketa pipol hu i goap antap long haos blong olketa fo wosipim san, an mun, an olketa sta. An bae mi spoelem olketa hu i wosipim mi an talem dat olketa tinghevi long mi, bat long semtaem olketa wosipim disfala god ya Milkom.#1:5 ?Milkom? Disfala god hemi god blong laen blong Amon. Samfala man tingse hemi no nem blong wanfala god bat hemi minim ?king blong olketa.? Lukim 1 Kings 11:5; 2 Kings 23:13; Jeremaea 49:1. 6Olketa hu i agensim mi Yawe an les fo falom mi, an olketa hu i no prea long mi, bae mi finisim olketa evriwan.
7?Datfala de wea mi Lod Yawe bae mi jajem pipol, hemi kam kolsap nao, so olketa mas stap kuaet long frant long mi. Mi Yawe mi redi finis fo sakrifaesim olketa pipol blong mi. An mi mektambu long olketa wea mi kolem kam fo mekem sakrifaes ya. 8Long datfala de wea mi Yawe bae mi mekem sakrifaes, bae mi panisim olketa bikman blong king, an olketa san blong hem, an olketa hu i falom kastom blong olketa narafala kantri. 9Bae mi panisim evriwan wea i falom kastom blong wosip blong olketa hiden pipol. An bae mi panisim olketa hu i stil, an kilim man dae, mekem olketa fulumap haos blong masta blong olketa long staka samting.
10?Mi Yawe nao mi talem disfala Mesij long yufala. Long datfala de, bae yufala save herem olketa krae long Fis Geit blong Jerusalem. An long mektu haf blong Jerusalem, bae yufala save herem olketa pipol i krae tumas. An bae yufala herem olketa bikfala noes from olketa samting wea i foldaon long olketa hil. 11An yufala kolsap long maket, taem yufala herem olketa samting ya, bae yufala krae bikfala, bikos olketa bisnisman bae dae.
12?Long datfala taem, bae mi yusim laet fo lukaotem olketa pipol long Jerusalem. Bae mi panisim olketa hu i sidaon nating an tingse olketa stapgud nomoa. Olketa ya i tingse, ?Yawe bae hemi no duim eni gudfala samting o eni nogud samting long yumi.? 13Kaen pipol olsem, bae mi tekemaot evrisamting blong olketa, an spoelem olketa haos blong olketa. Nomata olketa bildim olketa haos, bae olketa no save slip long olketa. An nomata olketa plantem olketa grep long gaden, bae olketa no save dringim waen from hem.?
Bikfala De blong Yawe fo jajem pipol
14Profet Sefenaea hemi tok olsem, ?Bikfala De blong Yawe fo jajem pipol hemi barava kolsap nao, an hemi kam kuiktaem. De ya bae hemi barava nogud tumas. Nomata olketa strongfala soldia, bae olketa singaot bikfala bikos olketa fraet. 15De ya bae hemi de blong kros blong God, an hemi de fo pipol fo garem hadtaem an barava filnogud. De ya bae hemi de blong trabol an evrisamting i bagarap. De ya bae hemi taem blong bikfala tudak an klaod wea hemi blak fogud. 16De ya bae hemi taem fo pipol i herem noes long trampet blong faet. An bae olketa herem noes blong olketa soldia wea i faet agensim olketa taon wea i garem wolston, an agensim olketa soldia antap long olketa gadhaos.?
17Yawe hemi tok olsem, ?Bikos olketa sin agensim mi Yawe, bae mi mekem bikfala trabol fo kasem olketa pipol, an trabol ya bae hemi mekem olketa evriwan fo wakabaot olsem blaen pipol. Blad blong olketa bae hemi kamaot olsem wata nating. An bele blong olketa bae hemi kamaot olsem ravis samting nomoa.?
18Profet Sefenaea hemi tok olsem, ?Long de wea Yawe bae hemi somaot kros blong hem, olketa silva an gol blong olketa pipol, bae i no save sevem olketa. Kros blong hem bae hemi olsem bikfala faea, an bae hemi bonem disfala wol finis. Seknomoa, bae hemi finisim olketa evriwan long disfala wol.?
Currently Selected:
Sefenaea 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.