Habakuk 3
3
Prea blong Profet Habakuk
1Profet Habakuk hemi prea olsem:#3:1 Long Hibru langguis, wanfala sotfala toktok moa hemi stap, bat yumi no save long mining blong hem.
2Lod Yawe.
Mi herem finis nius
abaotem olketa samting wea yu bin duim.
So, mi barava tinghae long yu.
Plis yu duim moa distaem
olketa semkaen samting
wea yu bin duim bifoa.
Nomata yu kros long mifala,
plis yu sore kam nomoa long mifala.
3Holi God hemi kam from Idom,#3:3, 7 Fofala ples ya, Idom, an Paran, an Kusan, an Midian i stap saot long Jiuda.
an from olketa hil long Paran.
Saen long bikfala paoa blong hem
hemi kavarem skae.
An evri pipol long disfala wol
i gohed fo mekhae long hem.
4Taem hemi kam,
hemi gohed fo saen olsem san.
Laetning hemi flas kam from han blong hem,
fo somaot dat hemi garem evri paoa.
5Hemi sendem bikfala sik fo go fastaem long hem,
an tokstrong long dae fo kam bihaen.
6Taem hemi stop,
graon hemi seksek.
Taem hemi luk go long olketa kantri,
evri pipol i fraet an seksek fogud.
Olketa bikfala maonten an hil
i brek long pisis an singdaon nao.
Long wei ya, God bin wakabaot long disfala wol longtaem bifoa.
7Mi lukim dat olketa blong Kusan i fraet,
an olketa blong Midian i seksek fogud.
8Lod Yawe.
?Taem yu bin stopem olketa riva an divaedem si,
waswe, yu bin kros long olketa ya?
!Nomoa nao!
Bat yu bin kam olsem soldia long kaat blong hem fo faet,
fo helpem olketa pipol blong yu fo win.
9Yu bin redi fo pulum bou blong yu,
an redim olketa aro fo obeim yu.
Yu bin mekem olketa riva fo ran bikfala
wea olketa brekem graon.
10Taem olketa maonten bin lukim yu,
olketa seksek fogud.
Long datfala taem, bikfala ren bin kamdaon,
an dipsi bin meknoes tumas,
an bikfala wev bin kamap hae.
11Taem yu bin sut long aro an spia,
wea i saen olsem laetning,
san an mun i no muv.
12Taem yu barava kros,
yu bin maas go akros long disfala wol,
an step long olketa pipol.
13Yu bin kam fo sevem olketa pipol blong yu,
an fo sevem king wea yu bin siusim.
Yu bin step long lida blong olketa ravis pipol,
an spoelem finis olketa pipol blong hem.
14Taem ami blong hem bin kam
olsem saekloun fo spoelem mifala,
olketa bin gohed fo hapi
olsem man hu hemi laekem fo mekem olketa pua pipol safa.
Bat long datfala taem, yu bin sutim disfala lida
long olketa aro blong hem seleva.
15Yu bin step long si
long olketa hos blong yu,
mekem solwata hemi kamap raf fogud.
16Taem mi herem evrisamting ya,
mi fraet fogud.
Bodi blong mi hemi seksek fogud,
an lek blong mi hemi wik tumas,
an mi no save wakabaot stret nao.
Bat bae mi gohed fo stap kuaet,
an weit nomoa fo datfala taem
wea bae God hemi panisim
olketa hu i kam fo faet agensim yumi.
17Nomata sapos yumi stap long taem blong trabol,
olsem wea olketa fig tri no garem frut fo kaikaim,
an olketa grep tri no garem frut fo mekem waen,
an olketa oliv tri no garem frut fo mekem oel,
an olketa gaden no garem kaikai,
an olketa sipsip an buluka i dae evriwan,
18bat bae mi gohed nomoa fo hapi,
bikos Yawe hemi God blong mi,
an hem nao hemi sevem mi.
19Lod Yawe nao hemi mekem mi strong.
An hemi kipim mi sef,
mekem mi no save foldaon,
olsem wea dia save ran
long raf ples saet long maonten.#3:19 Long Hibru langguis, narafala sotfala toktok moa hemi stap wea mining blong hem hemi no klia. Maet hemi minim samting olsem, ?Toktok go long lida blong kuaea: Prea ya hemi fo singim wetem gita.? #2 Samuel 22:34; Sam 18:33.
Currently Selected:
Habakuk 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.