Sefenaea 2
2
Evriwan mas tane kambaek long Yawe
1-2Profet Sefenaea hemi gohed fo tok olsem, ?Yufala pipol blong Jiuda, wea yufala no sem long wanem yufala duim, yufala mas hipap tugeta. !Hipap tugeta nao bifoa de blong kros blong Yawe hemi kam kasem yufala! Yufala mas tingting gudfala, sapos nomoa, kros blong hem bae hemi bonem yufala olsem faea wea hemi bonem drae gras. 3Yufala olketa hambol pipol long disfala lan, yufala hu i obeim Yawe, yufala mas aftarem hem nomoa. Lukaotem stretfala wei, an trae fo kamap hambol nomoa. Long wei olsem, maet yufala stap sef long de wea Yawe hemi somaot kros blong hem.
Yawe bae hemi panisim pipol blong Filistia
4?Taon long Gasa bae hemi emti, an no eniwan bae stap long taon long Askelon. An pipol blong taon long Asdod, olketa bae ranawe long midol long de. An pipol blong taon long Ekron bae olketa lusim taon ya tu. 5!Pipol blong Filistia hu i stap kolsap long solwata, sore tumas long yufala! Yawe hemi talemaot finis Mesij blong hem agensim yufala. Hemi tok olsem, ?Bae mi spoelem yufala finis, go-go no eniwan long yufala hemi laef.? 6Olketa lan blong yufala kolsap long saetsi, bae hemi kamap ples fo pipol hu i lukaftarem sipsip fo kipim olketa sef long naet. 7Samfala pipol blong Jiuda hu i laef yet long datfala taem, olketa nao bae tekova long lan blong yufala. Bae olketa lukaftarem olketa sipsip blong olketa long lan ya, an bae olketa save slip long olketa haos blong yufala long Askelon. Yawe hu hemi God blong olketa, bae hemi lukaftarem olketa, an mekem olketa fo kamap gudfala moa.?#Aesaea 14:29-31; Jeremaea 47:1-7; Esikiel 25:15-17; Joel 3:4-8; Emos 1:6-8; Sekaraea 9:5-7.
Moab an Amon
8-9Hem ya nao mesij blong Yawe hu hemi garem evri paoa, an hu hemi God blong Israel. Hemi tok olsem, ?Mi herem finis wea olketa pipol blong Moab i tokdaonem pipol blong mi, an pipol blong Amon i tokspoelem pipol blong mi. Olketa tokpraod olsem bae olketa tekova long lan blong pipol blong mi. So olsem mi laef, mi promis fo spoelem Moab an Amon. Moab bae hemi kamap olsem Sodom, an Amon bae hemi kamap olsem Gomora bifoa.#Jenesis 19:23-29. Tufala ples ya bae i kamap ples blong solt, an no eni gudfala samting hemi save grou long hem. Olketa ravis gras nomoa bae i kavaremap tufala, an tufala bae stap nogud olowe nao. Bat pipol blong mi wea olketa laef yet, bae olketa nao go tekem evrisamting blong olketa, an bae olketa tekova long lan blong olketa tu.?
10Profet Sefenaea hemi tok olsem, ?Yawe bae hemi panisim olketa pipol blong Moab an Amon, bikos olketa praod an bikhed tumas, an olketa tokspoelem olketa pipol blong Yawe hu hemi garem evri paoa. 11Yawe bae hemi mekem olketa evriwan ya i barava fraet fogud taem hemi spoelem olketa god blong disfala wol. Den olketa pipol blong evri kantri bae i wosipim Yawe long ples blong olketa seleva.#Aesaea 15:1—16:14; 25:10-12; Jeremaea 48:1-47; 49:1-6; Esikiel 21:28-32; 25:1-11; Emos 1:13-15.
Kus an Asiria
12?Olketa pipol blong kantri long Kus#2:12 ?Kus? Kus hemi olfala nem blong eria long saet long saot blong Ijip. tu, bae Yawe hemi kilim olketa evriwan dae long faet.#Aesaea 18:1-7. 13Yawe bae hemi yusim paoa blong hem agensim kantri long Asiria, an bae hemi mekem biktaon long Nineve fo kamap nogud tumas, mekem hem no garem eni wata long hem. 14Ples ya bae hemi kamap ples blong olketa sipsip, an buluka, an olketa narafala animol bae res long hem tu. Olketa aol bae i slip long olketa olfala haos blong taon ya, an sidaon long olketa windo an singaot. Olketa bikfala blak bed bae i sidaon long olketa lada blong olketa haos ya an krae. Olketa gudfala timba blong evri haos long ples ya, bae i kamap nogud. 15Olketa samting ya nao bae kasem taon wea olketa pipol i praod tumas long paoa blong olketa seleva, an tingse olketa stap sef nomoa. Olketa pipol i tingse taon blong olketa hemi nambawan winim eni narafala taon long disfala wol. Bat wea, taon ya bae hemi bagarap finis, an bae hemi kamap ples fo olketa wael animol i slip long hem. Olketa pipol wea i go pas long taon ya, bae olketa sek fogud an toknogud long hem.?#Aesaea 10:5-34; 14:24-27; Nehemaea 1:1—3:19.
Currently Selected:
Sefenaea 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.