Sirak 30
30
Fo lukaftarem pikinini
1Dadi hu hemi lavem pikinini blong hem, hemi save wipim plande taem, mekem hem save tokpraod abaotem hem bihaen. 2Sapos pikinini hemi falom gud advaes, bae hemi save duim gudfala waka, an bihaen, bae dadi blong hem save tokpraod abaotem hem long olketa fren blong hem. 3Man hu hemi advaesim gud pikinini blong hem, bae hemi no filpraod nomoa long hem, bat bae hemi mekem olketa enemi blong hem i joles long hem. 4-5Taem dadi hemi laef yet, hemi hapi tumas fo lukim pikinini blong hem. An taem hemi dae, bae hemi no sore tumas, bikos nomata taem hemi dae finis, pikinini blong hem hemi barava falom wei blong hem. 6Ya, hemi garem wanfala fo sensim olketa nogud samting wea olketa enemi i duim fo hem, an save sensim olketa gud samting wea olketa fren blong hem i duim.
7Bat eniwan hu hemi no wipim san blong hem, bae hem mas peim evri nogud samting wea san blong hem hemi duim. An bae hemi seksek fogud taem hemi herem bikfala singaot. 8Wael hos hemi nating save stap kuaet, an pikinini hu hemi no falom gud advaes hemi semsem olsem tu. 9Sapos yu givim evrisamting wea pikinini blong yu hemi laekem, an laflaf nomoa taem hemi duim eni nogud samting, wanfala de bae hemi mekem yu sore an krae. 10Yu save laf wetem hem distaem, bat wanfala de bae hemi mekem yu krae, an bae yu sore an tit blong yu bae i meknoes. 11No letem hem falom tingting blong hem seleva taem hemi yangfala. An no lukluk nating long wanem hemi duim rong. 12Yu mas wipim hem taem hemi smolfala yet, mekem hem tinghae long paoa blong yu. Bat sapos yu no duim olsem, bae hemi nating save obeim yu an hemi nating save tinghae long yu. An bae hemi mekem yu sore fogud. 13So, yu mas advaesim gud pikinini blong yu an givim hem waka fo duim, nogud hemi meksem long yu.
Fo stap helti
14Hemi moabeta fo yu stap pua an bodi blong yu hemi strong an stap helti, winim sapos yu ris an yu sik nomoa. 15Bodi wea hemi helti, strong an hapi, hemi gud winim gol an plande gudfala samting. 16Ya, hemi tru. No enisamting save mekem yu ris moa o hapi moa winim olketa samting ya. 17Fo dae an stap kuaet nao, hemi moabeta winim fo laef an safa long wanfala bikfala sik. 18Nambawan kaikai hemi nating gud nomoa sapos yu sik tumas an no save kaikaim. Hemi gud nomoa fo ofarem long olketa kaving god. 19Hemi iusles nomoa fo ofarem kaikai go long kaving god, bikos hemi no save fo kaikaim o smelem. Hemi semsem nomoa olsem taem Lod hemi mekem wanfala man fo safa long bikfala sik. 20Hemi lukluk nomoa long kaikai an hemi sore tumas, bikos hemi no save kaikaim. Hemi olsem wanfala man wea olketa aotem finis tufala bol blong hem, hemi stap tugeta wetem wanfala yang gele, bat hemi no save duim nomoa enisamting long hem.
Fo hapi an sore
21No mekem#Eklesiastes 11:9-10. yu seleva sore tumas fo spoelem laef blong yu. 22Taem yu hapi, yu save laef fo longtaem. 23So, yu mas gohed fo hapi an no wari, bikos wari hemi nating save duim eni gud samting fo eniwan. Ya, hemi spoelem finis laef blong plande pipol. 24Bae hemi mekem yu fo kamap olo kuiktaem nomoa. Ya, sapos yu joles an kros, laef blong yu bae hemi sot nomoa. 25Ya, man wetem gudfala wei bae hemi hapi taem hemi kaikaim kaikai blong hem.
Currently Selected:
Sirak 30: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.