Sirak 29
29
Kaonem an sensim
1Sapos#Eksodas 22:25; Levitikas 25:35-38. eni wantok blong yu hemi nidim samting an hemi wande kaon long yu, yu mas hapi fo letem long hem. Sapos yu duim diswan, yu barava falom nao olketa strongfala toktok blong Lod. 2Sapos hemi nidim enisamting, givim long hem. An sapos yu kaonem enisamting, sensim kuiktaem. 3Sapos yu save sensim kaon blong yu kuiktaem, bae pipol i letem kaon fo yu taem yu nidim. 4Plande pipol i lukim kaon olsem samting olketa faendem nomoa, bat olketa meksem long pipol hu i helpem olketa. 5Samfala pipol i save tok naes tumas long yu an mekhae long yu, mekem yu sore long olketa an letem kaon fo olketa. Bat taem fo sensim baek kaon ya, olketa muvum go fo narafala taem, o talem olketa no garem eni seleni yet. Olketa mekem enikaen ravis ekskius nomoa. 6Sapos man hu hemi givim kaon hemi tokstrong fo peimbaek seleni blong hem, bae hemi lake tumas fo tekem haf long hem. Bat sapos nomoa, man hu hemi kaon hemi stilim man hu hemi letem kaon an hemi enemi long hem. An man hu hemi kaon bae givim nomoa olketa ravis toktok an tokspoelem an tokdaonem man ya hu hemi letem kaon. An hemi no save tinghae o talem tengkiu long hem. 7Plande pipol i nating save letem kaon. Diswan hemi hapen, i no bikos olketa i gridi, bat bikos olketa no wandem pipol fo ravem olketa.
Waka blong lav
8Nomata olsem, yu mas tinghevi long olketa hu i pua, an kuiktaem fo helpem olketa. 9Lod nao hemi tokstrong long yumi fo helpem olketa hu i pua. So, no les fo givim wanem olketa nidim. 10Hemi moabeta sapos yu lusim seleni blong yu fo helpem wanfala fren o wantok blong yu, nogud hemi rasta nating nomoa andanit long ston samples. 11Yu mas yusim olketa gud samting blong yu olsem wea Lod i tokstrong long yu fo duim. Diswan nao bae hemi gud winim sapos yu kipim seleni blong yu fo yu seleva nomoa. 12Oltaem, yu mas garem samting fo givim long olketa hu i pua. Sapos olsem, bae yu sef nomoa taem trabol i kasem yu. 13Taem yu duim olsem, bae hemi sevem yu long olketa enemi blong yu, an hemi strong winim strongfala sil o nambawan spia.
Fo helpem olketa hu i kaon
14Gudfala man nao hemi redi fo helpem narawan fo sensim kaon blong hem. Man hu hemi no garem gudfala tingting nomoa hemi save les fo duim diswan. 15An sapos eniwan hemi wiling fo duim diswan fo yu, yu mas no fogetem hem, bikos hemi redi fo lusim gudfala nem blong hem fo yu. 16Samfala nogud pipol i lusim olketa hu i helpem olketa, an diswan hemi mekem olketa ya fo lusim evrisamting wea olketa onam. 17Disfala wei fo sensim kaon blong narawan, hemi spoelem finis plande gud pipol, an mekem olketa fo safa tumas olsem taem komburu hemi hitim wanfala sip long open si. 18Diskaen wei hemi mekem finis plande ris pipol fo lusim ples blong olketa an ranawe go fo stap long narafala kantri. 19Sapos wanfala nogud man hemi tingim hemi save mekem staka seleni long wei fo sensim kaon blong narawan, bae hemi faendem hem seleva long kot. 20So, yu save helpem olketa pipol, bat yu mas lukaot nogud yu mekem bikfala trabol fo yu seleva.
Fo garem hom
21Olketa impoten samting long laef nao: wata, kaikai, kaleko an haos fo stap insaet. 22Nomata yu pua, hemi moabeta fo yu garem haos blong yu seleva. Hemi nogud tumas fo yu go nomoa fo kaikai long fist long olketa haos blong narafala pipol. 23Yu mas hapi nomoa wetem lelebet samting wea yu garem, an no lisin long eniwan hu i tokspoelem hom blong yu o famili blong yu. 24Fo go olobaot long deferen haos, hemi wanfala ravis samting fo laef blong yu. Nomata eniwea yu go, bae yu no toktok. 25Bae yu welkamem olketa pipol, yu redim kaikai an dring fo olketa, bat no eniwan nomoa save talem tengkiu long yu. Ya, bae pipol lukdaon long yu an tok olsem, 26“!Strensa! Kam an redim tebol. Mi wande kaikai nao. Tekem kam kaikai blong mi long hia.” 27An bae hemi tok olsem moa long yu, “!Strensa, yu go! Mi garem wanfala impoten man. Brata blong mi hemi kam an mi nidim rum ya wea yu stap long hem.”
28Tufala had samting wea eniwan save tingim nao, fo raosim man fo goaot long haos an fo singaotem man fo sensim kaon blong hem.
Currently Selected:
Sirak 29: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.