Sirak 17
17
1Bihaen, Lod#Jenesis 1:26-28; 2:7. hemi mekem man long graon,
an fo tane gobaek moa long graon.
2Hemi givim man lelebet taem nomoa fo laef,
bat hemi givim paoa long hem
fo lukaftarem evrisamting long wol.
3Hemi mekem man fo luk olsem hem seleva,
an hemi givim paoa blong hem seleva long man.
4-5Lod hemi mekem evri narafala laef samting
fo fraetem man,
an hemi givim paoa long man fo rulim evri animol an evri bed.
6Hemi givim tang long man, ae an ia tu,
an maen blong hem an gudfala tingting fo hem.
7Hemi#Jenesis 2:17. givim save long man
fo minim olketa samting,
an som hem save long olketa wei wea i gud
an olketa wei wea hemi nogud.
8-9Hemi givim tu hao fo luksave long olketa samting,
an hemi lukim dat evrisamting wea hemi mekem,
i barava gud tumas.
10Diswan nao pipol bae i preisim holi nem blong hem,
an talemaot dat evrisamting wea hemi duim
hemi barava bik tumas.
11Hemi mekem isi fo olketa
garem gudfala tingting,
an hemi givim lo long olketa
fo hemi helpem laef blong olketa.
12Hemi mekem wanfala
agrimen wetem olketa,
an hemi somaot klia strongfala toktok blong hem fo olketa.
13Olketa lukim nao bikfala laet
long paoa blong hem,
an olketa herem nao nambawan voes blong hem.
14Lod hemi wonem olketa
abaotem wei wea hemi no stret,
an hemi tisim olketa fo kaen long narafala pipol.
God nao hemi jaj
15-16Oltaem, Lod hemi save nomoa wanem pipol i duim, an no eniwan save haed long hem. 17-18Lod hemi givim lida fo evri kantri long wol, bat hem nao hemi onam Israel. 19Oltaem, Lod hem lukluk falom wanem pipol i duim, an evrisamting wea olketa duim hemi stap klia nomoa long hem olsem long bikfala delaet. 20-21No eni sin blong olketa hemi haed long hem, hemi save long olketa evriwan. 22Taem yumi givim samting long olketa hu i pua, Lod hemi lukim olsem wanfala ring wea praes blong hem hemi dia tumas. An wei wea man hemi kaen long narafala pipol, hemi gud tumas olsem laef nao. 23Bihaen, bae hemi jajem olketa man nogud, an panisim olketa fo evri nogud samting wea olketa duim. 24Bae Lod hemi letem olketa hu i sore fo sin blong olketa fo gobaek moa long hem. Oltaem hemi strongim tingting blong olketa hu i lusim trast blong olketa.
God hemi kolem pipol fo lusim sin blong olketa
25Lusim#Jeremaea 3:12. sin blong yu an tanem tingting blong yu gobaek moa long Lod. Prea long hol haat blong yu, an bae hemi helpem yu fo garem laef wea hemi gudfala moa. 26Yu kambaek moa long Lod hu hemi hae tumas, an lusim wei blong sin. Yu mas les long evri nogud wei. 27Olketa#Sams 6:5; Aesaea 38:18; Baruk 2:17-18. hu i laef save tengkiu long Lod. ?Waswe, eniwan long olketa man dae save singsing nomoa fo preisim Lod hu hemi hae tumas? 28Man hu hemi laef an stap gudfala save singsing fo preisim Lod, bat olketa hu i dae finis no save talem tengkiu long hem. 29!Lav blong Lod hemi bikfala tumas, an hemi fogivim sin blong olketa hu i tanebaek long hem! 30Wei blong man hemi barava deferen, bikos no eniwan save laef olowe fo preisim Lod. 31No enisamting hemi braet moa winim san, bat taem mun hemi satem san, hemi save dak nomoa. So, hemi isi tumas fo sin hemi kavaremap tingting blong man. 32Lod hemi garem paoa long evri sta long skae, bat man hemi olsem nomoa dast an asis.
Currently Selected:
Sirak 17: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.