Sirak 16
16
God hemi panisim olketa hu i sin
1Hemi nogud fo garem plande pikinini, sapos olketa pikinini i iusles nomoa. Olketa kaen pikinini olsem, i no samting fo filpraod long hem. 2Nomata yu garem plande pikinini, yu mas no filpraod long olketa sapos olketa no tinghae long Lod. 3Yu mas no tingim dat hemi gud tumas fo yu garem plande pikinini, o dat olketa pikinini blong yu bae laef go-go olketa olo. Hemi moabeta fo garem wanfala pikinini hu hemi falom wei blong Lod, winim sapos yu garem plande pikinini hu i no falom wei blong Lod. Hemi moabeta tu fo yu dae taem yu no garem eni pikinini yet, winim taem yu garem plande pikinini hu i no falom wei blong Lod.
4Sapos wanfala waes man hemi stap insaet long taon, bae taon ya save fulap long pipol. Bat sapos ful traeb long taon nao i gohed fo mekem trabol, bae taon ya hemi emti. 5Plande taem mi lukim finis olketa samting olsem, an mi herem finis plande bikfala samting olsem tu. 6Kros blong Lod bae hemi olsem bikfala faea agensim wanfala smolfala grup long olketa man blong sin, o agensim evri pipol long wanfala kantri hu i no obeim hem. 7Hemi#Jenesis 6:4; Waestok 14:6. no fogivim olketa jaean blong bifoa hu i trastem paoa blong olketa seleva an agensim hem. 8Hemi barava agensim praod wei blong olketa pipol wea Lot i stap wetem olketa, an hemi nating sore long olketa. 9Hemi nating sore long pipol blong tufala biktaon ya wea hemi wande spoelem, bikos olketa sin tumas. 10An hemi nating sore tu long siks handred taosen pipol blong Israel hu i bikhed fo agensim hem. 11Nomata wanfala man nomoa hemi bikhed olsem, bae hemi wanfala mirakol tru nao sapos hemi ranawe long panis blong Lod. Lod hemi save sore long man, bat hemi save kros tu. Wei blong hem fo fogivim man hemi bik tumas, an wei blong hem fo kros long man hemi bik tumas tu. 12Ya, panis blong hem hemi strong tumas, an kros blong hem hemi bikfala tumas. Hemi jajem falom wanem man hemi duim. 13No eniwan hu hemi sin save ranawe wetem samting wea hemi stilim, bat Lod bae hemi saotem olketa gud pipol hu i stap strong fo weitem hem. 14-16Ya, bae hemi saotem evri pipol hu i stret, an bae evriwan i garem wanem fitim waka blong olketa.
17Yu mas no tok olsem, “Bae mi haed long Lod. No eniwan long heven bae hemi tingim mi. ?Bae hao nao bae olketa luksave long mi midol long plande pipol olsem? Evrisamting wea Lod hemi mekem i bik tumas, mi olsem samting nating nomoa ya. 18Taem Lod hemi kam, disfala wol an olketa bikfala riva, wetem skae an heven antap, bae i seksek fogud. 19Olketa maonten an olketa samting wea hemi holemap disfala wol bae i seksek tu taem hemi luk go long olketa. 20Long datfala taem, bae Lod hemi no tingim mi. An no eniwan bae hemi wari long wanem mi duim. 21Sapos mi sin an mi no falom wei blong hem, no eniwan bae hemi save. 22Sapos mi duim wanem hemi stret, no eniwan tu bae hemi talem Lod abaotem. ?Hu nao hemi wande weitem hem? Hemi slou tumas fo duim wanem hemi talem bae hemi duim.” 23So man wea hemi no garem gudfala tingting an no garem waes, hem nomoa save tingim olketa samting olsem.
Waes blong God long olketa samting wea hemi mekem
24Pikinini blong mi, yu mas lisin gudfala long mi, an sapos yu duim olsem, bae yu garem save. 25Bae mi tisim yu olketa gudfala toktok wea hemi klia an stret.
26Longtaem bifoa,
taem Lod hemi mekem evrisamting,
hemi putum evrisamting
long barava ples blong olketa.
27Hemi stretem evrisamting
fo stap long ples blong olketa olowe,
an hemi givim oda
mekem olketa stap olsem olowe nao.
No enisamting wea hemi mekem,
save hanggre an taet,
o stop long waka blong hem.
28Evri deferen pat i no save
hipap tugeta,
an olketa herem toktok blong hem.
29Taem Lod hemi mekem finis
evrisamting ya,
hemi luk long wol,
an hemi filimap wetem evri gud samting.
30Hemi filimap disfala wol
long evrikaen laef samting
wea bae olketa dae nomoa,
an gobaek moa long graon.
Currently Selected:
Sirak 16: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.