Sirak 14
14
1Man wea hemi no talem enisamting rong,
hemi fitim fo hemi hapi.
Hemi no nidim fo filnogud,
olsem man hemi duim samting rong.
2An man wea hemi garem klia tingting,
an hemi nating save givap
long trast blong hem long God,
hemi fitim fo hemi hapi tu.
Fo yusim waes long seleni
3Hemi no fitim fo wanfala gridi man fo kamap ris. ?Hao nao seleni save helpem gridi man? 4Sapos yu gohed fo hipimap seleni blong yu an yu no waka long hem, yu hipimap nomoa fo olketa narafala pipol ya. Olketa narafala pipol nao bae i yusim, mekem olketa stap gudfala. 5?Hao nao bae yu save helpem narafala pipol sapos yu les long yu seleva, an les fo stap hapi long seleni blong yu? 6No eniwan hemi nogud tumas olsem man hu hemi les long hem seleva. Ravis wei olsem nao hemi tekem kam panis fo hem seleva. 7Taem man olsem hemi duim samting gud, hemi aksiden nomoa ya. Ravis wei blong hem bae hemi kamaot klia nomoa bihaen. 8Man hu hemi gridi, hemi nogud. Hemi no lukim wanem olketa pipol i nidim. 9Hemi no hapi nomoa long plande samting wea hemi garem. Gridi wei olsem hemi kilim dae laef blong man. 10Samfala pipol tingim olketa seleva tumas, an fo baem kaikai fo haos blong olketa, olketa nating save duim nao.
11Pikinini blong mi, yu mas lukaftarem yu seleva gudfala, an givim gudfala ofaring go long Lod. 12Yu mas tingim dat wanfala de bae yu dae, an yu nating save nomoa long datfala de. 13Bifoa datfala de hemi kam, yu mas kaen long olketa fren blong yu. Yu mas givim olketa gudfala samting wea yu garem. 14No ravem taem blong yu fo hapi long wanfala de, an sapos yu wande duim samting, yu mas gohed an duim nao. 15Long wanfala de, olketa samting wea yu wakahad fo hem, bae olketa divaedem an searem go long narafala pipol. 16So, yu mas kaen long olketa narafala pipol, an mas redi fo tekem wanem pipol i givim long yu. Hemi gud fo yu hapi distaem, bikos bae yu no save hapi long ples blong olketa man dae. 17Bodi blong man bae hemi olo olsem pis kaleko wea hemi roten, bikos lo blong bifoa hemi talem dat yumi mas dae. 18Pipol i olsem olketa lif long tri. Olketa dae lif i foldaon an olketa niuwan i grouap kam. Hemi olsem tu wea yumi mas dae an olketa niuwan i bon kam moa. 19Evrisamting wea man hemi mekem bae hemi roten an finis, an man ya wea hemi mekem bae hemi finis tu.
Waes save mekem man hapi
20Man#Provebs 8:32-35. hu hemi tingim wei blong Waes,
an yusim gudfala tingting blong hem,
man ya, hemi save hapi.
21An man hu hemi lanem olketa wei blong Waes,
an save long olketa samting long hem wea hemi haed,
man ya, hemi save hapi.
22An man hu hemi aftarem Waes,
olsem man hemi aftarem animol fo kilim dae,
man ya, hemi save hapi.
23An man hu hemi luk go tru long windo blong Waes,
an lisin go long doa blong hem,
24an barava stap kolsap long haos blong hem,
man ya, hemi save hapi.
25Sapos yu olsem,
bae yu garem nambawan ples fo stap long hem.
26-27Ya, hemi gud fo yu
fo bildim haos blong yu long ples ya,
an stap sef andanit long olketa brans blong hem,
an stap long sado blong hem long hot blong san.
Currently Selected:
Sirak 14: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.