Sirak 13
13
1Sapos yu tasim ta, bae hemi pas long han blong yu. Hemi olsem tu, sapos yu kaban wetem olketa praod pipol, bae yu kamap olsem olketa. 2No traem fo liftimap wanem hemi hevi tumas fo yu. An no kaban wetem olketa hu i ris winim yu an strong winim yu. Yu no save putum pot wea olketa mekem long graon wetem aeon ketol, bikos bae disfala pot hemi brek taem hemi bangam aean ketol ya. 3Sapos wanfala risman hemi duim samting rong, bae hemi save kavaremap nomoa rong blong hem. Bat sapos hemi duim long wanfala puaman, bae puaman ya nao mas go fo talem sore long hem. 4Risman bae hemi yusim yu fo garem olketa gud samting wea hemi laekem. Bat long taem wea yu nidim hem, bae hemi tanem baeksaet long yu. 5Bae hemi stap wetem yu taem yu garem plande samting, an bae hemi aotem evrisamting long yu. 6Sapos hemi nidim yu, bae hemi smael long yu fo trikim yu long olketa gud toktok blong hem. An bae hemi askem yu olsem, “?Waswe yu nidim enisamting?” 7Bae hemi fidim yu gogo yu fulap fogud, mekem yu filsem. Bat taem hemi tekemaot evrisamting long yu tu o trifala taem finis, bae hemi laf long yu. Bihaen, taem hemi lukim yu, bae hemi no luksave long yu an goawe from yu.
8Yu mas lukaot nogud olketa lidim yu rong. Yu maet hapi long olketa samting, bat seknomoa yu barava sem fogud nao. 9Sapos olketa kolem yu go long haos blong wanfala bikman, yu mas haedem samfala wei blong yu. Sapos olsem, bae hemi save kolem yu plande taem moa bihaen. 10Sapos yu fosim yu seleva long hem, bae hemi raosim yu. An sapos yu stap farawe long hem, bae hemi fogetem yu. 11No trae fo semsem olsem hem, o trastem evrisamting wea hemi talem. Nomata hemi toknaes wetem yu fo longtaem, hemi traem yu nomoa.
12Sapos man hemi no fitim fo yu trastem, hemi nogud tumas. Kuiktaem nomoa bae hemi spoelem yu o torowe yu long prisin 13-14Yu mas haedem olketa tingting blong yu seleva an yu mas keakea, bikos yu wakabaot long ples wea hemi no sef.
15Evrisamting wea hemi laef, hemi kaban wetem semkaen blong hem. Pipol i olsem tu. 16Olsem semkaen animol olketa stap tugeta, so pipol olketa kaban wetem pipol hu i olsem olketa seleva. 17Bikfala wael dog hemi no semsem olsem smolfala sipsip. Pipol i olsem tu, man blong sin hemi no semsem wetem gudfala man. 18Olketa dog long bus i no semsem olsem olketa dog long vilij. Pipol i olsem tu, olketa ris pipol i no semsem wetem olketa pua pipol. 19Olketa ris pipol i gohed fo spoelem olketa pua pipol, olsem wea olketa laeon i gohed fo ronem olketa wael dongki fo kaikaim. 20Olketa praod pipol i gohed nomoa fo tokdaonem pipol hu i daonem olketa seleva, an olketa ris pipol i garem semkaen tingting ya fo olketa pua pipol. 21Taem wanfala risman hemi foldaon, olketa fren blong hem save sapotem hem. Bat sapos wanfala puaman hemi foldaon, olketa fren blong hem bae i lusim hem. 22Sapos wanfala risman hemi tok krangge, plande pipol nao save kavaremap krangge toktok blong hem long enikaen toktok. Bat sapos wanfala puaman hemi duim olsem, evriwan bae i tokspoelem hem. An nomata wanem hemi talem hemi stret nomoa, no eniwan bae lisin long hem. 23Taem wanfala risman hemi tok, evriwan save stap kuaet, an olketa preisim hem go-go kasem long skae nao. Bat sapos wanfala puaman hemi tok, evriwan nomoa save ask olsem, “?Hu nao ya?” An sapos hemi bangam lek blong hem long enisamting, bae olketa pusum hem fo foldaon nogud.
24No enisamting hemi rong fo kamap ris. Hemi gud nomoa sapos yu no raverave o stil fo kamap ris. An no enisamting hemi rong tu fo kamap pua. Olketa nogud pipol nao i tingting olsem. 25Samting insaet long haat blong yu nao hemi mekem fes blong yu fo luk hapi o luk sore. 26Sapos yu filhapi, bae yu luk hapi, bat fo mekem olketa waes toktok, man mas barava tingting had fogud.
Currently Selected:
Sirak 13: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.