Sirak 11
11
1Sapos wanfala puaman hemi waes, hemi stret fo hemi filpraod. An bae evri pipol i tinghae long hem, olsem wanfala man hu hemi garem biknem.
Lukluk blong pipol
2No preisim eniwan
long luknaes blong hem,
an no lukdaon long eniwan hu hemi no luknaes.
3Lukim fastaem olketa hani bi,
olketa smol tumas,
bat olketa mekem hani
wea hemi suit tumas winim evri kaikai.
4No tokpraod abaotem olketa
naes kaleko blong yu,
o tingim yu seleva impoten tumas long ae blong pipol.
Lod nao hemi duim olketa gudfala samting
wea pipol i nating save long bifoa.
5Plande king i lusim paoa blong olketa
go long han blong olketa man nating,
wea no eniwan hemi save long olketa man nating ya bifoa.
6Olketa lida wea pipol
i mekhae long olketa,
pipol tu i meksem long olketa
an daonem biknem blong olketa.
Lukluk gudfala long wanem yu duim an talem
7Faendaot fastaem abaotem man,
bifoa yu talemaot wea man ya hemi rong.
Yu mas tingting gud fastaem bifoa yu tok.
8Yu mas lisin gud fastaem bifoa yu ansa.
An no tok taem narawan hemi tok yet.
9No raoa wetem narawan
abaotem wanem hemi no bisnis blong yu.
No kaban wetem olketa man blong sin
taem olketa jajem narawan.
10Pikinini blong mi,
no duim plande samting wantaem.
Sapos yu trae fo duim plande samting wantaem,
bae yu no fri fo duim eni gudfala samting.
Nomata yu wakahad, bae yu no save finisim
an nomata yu ranawe bae hemi had fo yu ranawe long olketa.
11Sapos wanfala man
hemi traehad tumas
an wakahad,
bat hemi nating kasem nomoa
wanem hemi hadwaka fo hem.
12Narafala man, hemi pua,
an hem no strong fo waka.
Hemi slou fo waka an hemi nidim help.
Lod hemi sore long hem
an tekem hem aot long nogud ples wea hemi stap.
13Taem Lod hemi mekem hem gud moa,
evri pipol i sapraes fogud long hem.
14Evrisamting hemi kam
long Lod,
fo kamap gud o nogud,
fo stap pua o kamap ris,
fo laef o fo dae.
15Lod nao hemi givim waes,
an gudfala tingting, an save long Lo.
Evrisamting ya
hemi kam long hem.
16Stat kam bifoa,
sin an tudak hemi stap finis
wetem olketa hu i sin.
An olketa hu i hapi long ravis samting,
bae hemi stap wetem olketa
go-go kasem taem olketa olo.
17Gif blong Lod hemi stap
wetem olketa hu i stret.
Sapos hemi saetem yu, bae yu kamap gud olowe.
18?Sapos#Sams 49:10; Luk 12:16-21. wanfala man
hemi kamap ris
an kipim evri seleni long hadwaka blong hem,
bat wanem nomoa hemi gud long hem?
19Hemi tok olsem long hem seleva,
“Distaem mi save sidaon
an hapi long evrisamting
wea mi hadwaka long hem.”
Bat hemi nating save nomoa
hao long nao bae hemi laef bifoa hemi dae,
an lusim evrisamting blong hem
fo olketa narafala pipol.
20Yu mas stap strong
long waka blong yu,
gohed long waka blong yu go-go yu olo.
21No joles taem olketa man
blong sin i kamap gud,
stap strong long waka blong yu an trastem Lod.
Hemi isi tumas fo Lod
fo mekem wanfala puaman hemi kamap ris.
22Bae Lod hemi blesim olketa pipol
hu i tinghae long hem,
an bae hemi givim kuiktaem blesing ya long olketa.
23No tingim wanem nao yu nidim,
o watkaen gud samting nao bae hemi kamap fo yu.
24An no tingim tu bae yu
garem evrisamting wea yu nidim,
o no eni nogud samting bae hemi kamap fo yu.
25Taem evrisamting
hemi gohed gudfala,
pipol no save tingim
olketa hadtaem.
An taem evrisamting hemi gohed nogud,
olketa no save tingim olketa gud samting.
26Lod hemi weit nomoa
taem yumi dae
fo saotem o fo panisim.
27Taem yumi safa,
yumi fogetem olketa gudfala taem.
An taem yumi dae,
bae yumi lukim evrisamting wea yumi duim.
28Sapos olsem,
no tingim laef blong man hemi hapi,
bikos evrisamting hemi no soaot go-go kasem taem man hemi dae.
Lukluk gud fo hu nao yu fren wetem
29Yu mas lukluk gud fo watkaen man nao yu kolem kam long haos blong yu, bikos olketa konman save laea long yu. 30Man hu hemi praod save trapem yu go long trabol, bae hemi lukluk gud long yu fo faendemaot wanem nao yu wik long hem. 31Sapos hemi faendem wanfala gudfala samting wea yu duim, bae hemi tanem go long nogud samting. 32Wanfala smol laet blong faea save mekem bikfala faea, an man blong sin hemi weitem nomoa enitaem fo spoelem pipol. 33Lukaot long olketa pipol olsem, bikos olketa ravis plan blong pipol olsem bae save spoelem yu olowe nao. 34Sapos yu tekem kam man wea yu no save, long haos blong yu, bae hemi mekem trabol fo yu an famili blong yu.
Currently Selected:
Sirak 11: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.