Sirak 10
10
Waes lida
1Waes lida save tisim olketa pipol blong hem,
an wei blong hem fo rul hemi stret.
2Evri bikman blong hem
an evri pipol blong hem
bae i gud olsem lida blong olketa tu.
3King hu hemi no garem save,
bae hemi spoelem olketa pipol blong hem.
Bat gavman wea olketa lida blong hem i waes,
bae hemi save stanap strong.
4Lod hemi luksave long
gavman blong disfala wol,
an hemi siusim raet man fo garem paoa long raet taem.
5Gudfala waka blong lida olsem,
hemi stap long han blong Lod,
an Lod nao hemi givim biknem long lida olsem.
Wei fo praod
6No kros long eniwan fo evri smolfala samting wea hemi duim rong. Long praod wei blong yu, no duim enisamting taem yu kros. 7Lod an olketa pipol i les long wei blong praod, an fo jaj long wei wea hemi no stret. 8Taem olketa lida olketa praod tumas, an olketa garem staka seleni, an olketa jaj long wei wea hemi no stret, kantri hemi save lusim paoa, an olketa narafala pipol save kamap an tekova long olketa. 9Yumi olsem dast an asis blong faea nomoa. ?Wanem nomoa yumi garem fo yumi praod long hem? Nomata taem yumi laef yet, bat bodi blong yumi hemi stat fo roten finis. 10Taem yu sik longtaem tumas, yu save mekem tingting blong dokta hemi tudak. Nomata king maet laef tude, bat tumoro hemi save dae nomoa. 11Taem wanfala man hemi dae, hemi onam nomoa olketa wom an bluflae.
12Praod hemi stat taem olketa man i lusim Lod hu hemi mekem olketa. 13Praod hemi olsem wanfala smolfala riva wea sin hemi ran kamaot long hem. An olketa hu i holestrong long praod ya, olketa fulap long evri sin. So, Lod hemi panisim olketa an spoelem olketa long evri nogud samting wea olketa nating save tingim bae hemi hapen long olketa. 14Lod#1 Samuel 2:8; Luk 1:52. hemi daonem olketa king, an hemi putum olketa pipol hu mekem olketa seleva lou fo tekova long olketa. 15Lod hemi aotem olketa bikfala kantri an sensim long olketa smolfala kantri. 16Lod hemi tekova long olketa kingdom an barava spoelem lan blong olketa. 17Hemi spoelem nogud samfala long olketa, an no eniwan save tingim olketa moa. 18Lod hu hemi mekem evrisamting, hemi no minim fo mekem pipol fo praod an fo garem bikfala kros.
Fo mekhae long man
19?Hu nao hemi fitim fo olketa mekhae long hem? Evri pipol nao, bikos olketa i tinghae long Lod. ?Hu nao hemi no fitim fo olketa mekhae long hem? Evri pipol tu, bikos olketa i brekem lo blong Lod. 20-21Pipol mas mekhae long lida blong olketa. Lod hemi mekhae tu long olketa hu i tinghae long hem.
22Sapos olketa ris pipol, wetem olketa pipol wetem biknem, an olketa pua pipol, tinghae long Lod, hemi gud fo olketa filpraod. 23Hemi no stret fo daonem wanfala puaman hu hemi garem save, an hemi no stret tu fo mekhae long wanfala man blong sin. 24Pipol save mekhae long olketa pipol hu i garem paoa an olketa jaj, bat no eniwan long olketa hemi bik moa winim man hu hemi tinghae long Lod. 25Slev hu hemi waes bae garem pipol fo waka fo hem, an sapos olketa ya i garem gudfala tingting, bae olketa no save sem.
Daonem yu seleva an tinghae long yu seleva
26Taem yu duim waka blong yu, no praod fo somaot save blong yu. No putum yu seleva hae taem trabol kasem yu. 27Hemi moabeta fo waka an garem evrisamting wea yu nidim, winim fo goraon an tokhae abaotem yu seleva, bat yu gohed fo dae nomoa long hanggre.
28Pikinini blong mi, yu mas tinghae long yu seleva, bat daonem yu seleva. Yu mas somaot watkaen man nao yu. 29?Hu nao save tinghae long yu sapos yu spoelem yu seleva? ?Hu nao save mekhae long yu sapos yu no tinghae long yu seleva? 30Pipol save mekhae long olketa pua pipol fo gudfala save blong olketa. An pipol save mekhae long olketa risman fo evri gud samting wea olketa garem. 31Sapos olketa mekhae long man taem hemi pua, bae pipol i mekhae moa long hem taem hemi kamap ris. An sapos pipol i no wari nomoa long man taem hemi ris, bae pipol i nating wari long hem nao taem hemi pua.
Currently Selected:
Sirak 10: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.