Sirak 1
1
Fas toktok
Plande bikfala tising fo laef hemi stap insaet long Buk Tambu, long Raeting blong Lo, an Raeting blong olketa Profet, an olketa narafala Raeting. Hemi fitim fo yumi mas preisim olo grani blong yumi long Israel fo olketa gudfala tising an waes toktok. Eniwan hu i ridim olketa holi raeting ya mas no tingim hem seleva nomoa fo save. Sapos hemi tinghevi long olketa raeting ya, hemi mas talemaot long olketa narafala pipol wanem hemi lanem, an hemi mas raetemdaon tu an tisim evri waes toktok wea hemi lanem finis.
Long diswan nao Jisas, hu hemi granfata blong mi, hemi wiling fo ridim olketa holi raeting ya blong yumi. Taem hemi barava savegud long olketa toktok ya, hemi tingting strong fo raetem wanfala buk mekem hem save searem wanem hemi lanem finis long waes an save blong hem. An sapos wanfala hemi tingting strong long waes olsem hem seleva, hemi save ridim disfala buk. Long disfala wei nao bae laef blong hem save falom lo blong God.
Disfala granfata blong mi hemi raetem buk ya fastaem long Hibru langguis, an mi nao mi sensim go long Grik langguis. Mi askem strong long yufala fo ridim an lukluk gud long disfala buk. Yufala mas no kros long mi sapos mi no save sensim gud samfala pat long hem. Hemi tru tumas, taem olketa sensim go long narafala langguis, bae hemi no stret tumas olowe, an mining long wanfala langguis bae hemi no barava sem long narafala langguis. Hemi tru taem olketa sensim toktok long Buk Tambu, an hemi tru tu long disfala buk ya. Nomata olsem, mi traehad tumas fo stretem wanem hemi raetem fastaem.
Taem mi kam long Ijip, King Yuegetis hemi kasem nao mekteti-eit yia wea hemi rulim kantri ya. Taem mi stap long ples ya, mi garem plande taem tumas fo lanem plande waes toktok, an bihaen mi tingim hemi gud fo mi fo sensim disfala buk ya fo go long Grik langguis. Long taem ya, mi wandem tumas fo mi yusim evri save blong mi fo finisim waka ya, mekem hem redi fo evri pipol long evri narafala kantri hu i wandem fo save an wandem fo garem paoa long wei blong laef falom Lo blong Mosis.
Currently Selected:
Sirak 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.