Revelesin 16
16
Las sevenfala panis blong God
1Den mi herem moa wanfala voes long tambuhaos, wea hemi singaot olsem long sevenfala enjel ya, “Sevenfala baol#16:1 “Sevenfala baol” Olketa nogud samting wea hemi kasem wol ya olketa kolsap semsamting wea hemi kasem ples blong Ijip bifoa. Lukim Eksodas 7:14—10:29. wea olketa fulap long kros blong God ya, yufala go kapsaetem antap long wol ya.”
2So#Eksodas 9:10. fas enjel hemi go kapsaetem baol blong hem antap long wol. An olketa pipol hu i garem disfala mak blong wael animol ya an olketa save wosipim kaving blong hem, olketa ravis soa kasem bodi blong olketa, wea olketa filpein tumas long hem.
3Nao mektu enjel hemi go kapsaetem baol blong hem insaet long si. An si hemi kamap blad nao, wea hemi olsem blad blong man dae. An evri laef samting long si, olketa dae nao.
4Den#Eksodas 7:17-21; Sams 78:44. mektri enjel hemi go kapsaetem baol blong hem insaet long olketa riva an olketa springwata. An evriwan ya kamap blad tu. 5An mi herem enjel hu hemi bos ovarem olketa wata ya hemi tok olsem,
“God, yu nao yu holi tumas,
yu stap olowe bifoa
an yu stap distaem tu.
Olketa panis wea yu sendem kam,
olketa stret nomoa.
6Olketa hu i bin kilim dae olketa profet an olketa nara pipol blong yu,
yu givim blad nao fo olketa dringim.
Hem nao stret wei fo peim olketa.”
7Mi herem moa wanfala voes long olta hemi tok olsem,
“!Ya, hemi tru!
God Masta, yu nao garem evri paoa.
Olketa wei blong yu fo jajem olketa pipol,
hemi tru an stret tumas.”
8Den mekfoa enjel hemi go kapsaetem baol blong hem long san. An hemi mekem strong moa paoa blong hem fo bonem olketa pipol. 9Taem hot blong san hemi bonem olketa pipol olsem, olketa gohed fo tokspoelem nem blong God hu hemi garem paoa ovarem olketa bikfala panis ya. An olketa no wari nomoa fo sensim tingting blong olketa an liftimap nem blong God.
10Nao#Eksodas 10:21. mekfaev enjel hemi go kapsaetem baol blong hem antap long ples wea wael animol hemi stap king long hem. An evri ples wea wael animol ya hemi rul ovarem, i kamap tudak nao. An olketa pipol long olketa ples ya i gohed fo baetem tang blong olketa bikos olketa barava filpein long bodi blong olketa. 11An olketa gohed fo tokspoelem God long heven, bikos olketa barava filpein tumas, an olketa garem nogud soa long bodi blong olketa. Bat olketa no wari nomoa fo sensim tingting blong olketa an lusim olketa ravis wei blong olketa.
12Nao#Aesaea 11:15. meksiks enjel hemi go kapsaetem baol blong hem insaet long Yufretis Riva. An bikfala riva ya hemi kamap drae nao. Long wei ya hemi openem rod, mekem olketa king hu i stap kam long ist wetem olketa ami blong olketa, i save wakabaot kam. 13An mi lukim trifala ravis devol wea olketa luk olsem frog. Olketa kamaot long maos blong bikfala snek ya an long maos blong wael animol ya an long maos blong laea profet ya.#16:13 “laea profet ya” Hem nao disfala mektu wael animol wea Jisas hemi tokabaotem long Revelesin 13:11. 14Trifala ravis devol ya, olketa nogud tumas an olketa garem paoa fo mekem enikaen mirakol. Nao trifala devol ya olketa go fo lukim olketa king long evri ples long wol, mekem olketa hipap fo faet long bikfala De blong God hu hemi garem evri paoa.
15(Jisas hemi tok olsem, “!Yufala lisin#Matiu 24:43-44; Luk 12:39-40; Revelesin 3:3. gudfala! !Bae mi kambaek long yufala, olsem man fo stil hemi save kam! Man hu hemi lukaot olowe an hemi lukaftarem gud kaleko blong hem, bae hemi hapi long taem ya. Bikos hemi no neket, an bae hemi no filsem long ae blong olketa pipol.”)
16Den#2 Kings 23:29; Sekaraea 12:11. trifala ravis devol ya olketa mekem olketa king fo hipap long wanfala ples, wea long langguis long Hibru olketa kolem Amagedon.#16:16 “Amagedon” Long langguis long Hibru nem ya hemi minim maonten long Megido. Long bikfala flat eria kolsap long maonten ya plande bikfala woa hemi gohed bifoa. Lukim Jajis 5:19, 2 Kings 23:29, 2 Kronikols 35:22.
17Nao mekseven enjel hemi go kapsaetem baol blong hem long ea. An mi herem wanfala voes long tron insaet long tambuhaos, hemi singaot olsem, “!Hemi finis nao!” 18An#Revelesin 8:5; 11:13, 19. taem ya, bikfala noes hemi kam, an laetning hemi laet, an tanda hemi bosta, an bikfala etkuek hemi sekem wol ya. Disfala etkuek hemi barava bik tumas ya. Stat kam long taem God hemi mekem pipol fo stap long wol, no eni etkuek hemi bikfala olsem. 19Nao#Aesaea 51:17. biktaon long Babilon, hemi brek long trifala haf. An olketa nara taon long evri kantri long wol, olketa tu foldaon nogud long graon. God hemi no fogetem Babilon, so hemi mekem hem fo dringim disfala kap waen, wea hemi olsem ful paoa blong kros blong hem. 20An#Revelesin 6:14. evri aelan an evri maonten tu olketa go lus. 21An#Eksodas 9:23; Revelesin 11:19. olketa bikfala pis aes tu olketa foldaon kam from skae antap long olketa pipol. Olketa pis aes ya olketa hevi olsem fifti kilo. Olketa pipol gohed fo tokspoelem God taem hemi sendem kam olketa pis aes ya, bikos panis ya hemi barava nogud tumas.
Currently Selected:
Revelesin 16: SIDC
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
