Aesaea 3
3
Bae God hemi panisim olketa pipol blong Jerusalem an Jiuda
1 (Profet) !Lisin kam, yufala blong Jerusalem an Jiuda! Lod Yawe hu hemi garem evri paoa, bae hemi tekemaot evrisamting wea yufala nidim fo laef olsem wata an kaikai. 2-3Bae hemi tekemaot tu olketa sif blong ami, wetem olketa strongman fo faet an olketa soldia, an olketa bikman blong gavman, olketa jaj an profet an advaesa, an olketa majik man wetem olketa kleva man, an olketa man hu i save hao fo wakem olketa gudfala samting.
4Yawe hemi tok olsem, “Bae mi mekem olketa yang boe fo kamap sif blong yufala, an olketa smolfala pikinini nomoa fo rul ovarem yufala.” 5An bae yufala evriwan i gohed nomoa fo mekem yufala seleva safa. Bae yufala agensim olketa wantok blong yufala an bae olketa yang pipol blong yufala i no save tinghae long olketa olo. An olketa pipol bae i mekfan nomoa long olketa bikman blong yufala.
6Long taem ya, samfala long yufala bae i siusim wanfala long laen blong yufala fo kamap lida wea bae yufala tok olsem long hem, “Distaem, laef blong yumi hemi barava kamap nogud tumas nao, bat kaleko blong yu hemi gud yet. So yu nao bae yu rul ovarem yumi.” 7Bat bae hemi tok olsem, “!Mi no garem kaleko o eni kaikai long haos blong mi! ?So hao nao bae mi stretem trabol blong yufala ya? Hemi nogud fo yufala siusim mi fo kamap lida blong yufala.”
8Hemi tru nao wea pipol blong Jerusalem wetem evriwan long Jiuda i duim olketa samting wea hemi barava nogud tumas agensim Yawe hu hemi hae tumas. Olketa i olsem pipol wea i drang an i foldaon finis. 9Olketa i barava olsem pipol blong bifoa long Sodom. Man save luksave nomoa long fes blong olketa wea olketa no filsem fo sin long ae blong olketa narafala pipol. !Sore tumas long olketa, bikos olketa mekem bikfala trabol long olketa seleva!
10Yufala talem long olketa pipol hu i falom stretfala wei wea bae Yawe hemi blesim olketa bikos olketa duim olketa gudfala samting. 11!Bat sore tumas long olketa hu i falom ravis wei! Bae Yawe hemi sensimbaek long olketa evri ravis samting wea olketa bin duim.
12Yawe hemi tok olsem, “Distaem olketa pikinini spoelem yufala olketa pipol blong mi, an olketa woman nomoa i bosim yufala. Olketa lida blong yufala i lidim yufala fo falom wei wea hemi no stret.”
13 (Profet) Distaem, Yawe hemi redi fo jajem olketa pipol hu i duim olketa samting wea hemi agensim hem. 14An distaem hemi stat nao fo jajem olketa bikman an olketa lida blong yumi pipol blong hem, wea hemi talemaot olketa samting agensim olketa olsem, “!Olketa! Oltaem nomoa yufala i spoelem olketa pipol blong mi long wei wea yufala gohed nomoa fo fulumapem haos blong yufala wetem olketa samting wea yufala stilim from olketa pua pipol. Hemi olsem wea yufala spoelem olketa plantesin long grep tri blong mi. 15Hemi barava no stret fo yufala spoelem olketa pipol blong mi, an disfala wei wea yufala step long olketa pua pipol, hemi olsem wei wea yufala skuisimaot wata from olketa grep o krasim wit fo mekem flaoa.”
Hem nao mesij blong Lod Yawe hu hemi garem evri paoa.
Toktok fo olketa woman long Jerusalem
16Yawe hemi gohed fo tok olsem, “!Olketa woman blong Jerusalem i barava praod tumas! Olketa wakabaot an liftimap fes blong olketa an olketa suingim bodi blong olketa an gohed fo satae go long olketa man an olketa taengem olketa samting long lek blong olketa fo hemi meknoes, mekem olketa man i lukluk long olketa. 17From diswan, bae mi nao mi panisim olketa, wea bae mi mekem olketa soa fo kamap long hed blong olketa, an bae mi mekem olketa enemi fo aotem kaleko blong olketa, mekem evriwan save lukim olketa taem olketa i neket.”
18-23 (Profet) Long taem ya, bae Yawe hemi tekemaot olketa samting wea olketa werem long hed an long ia an long nous an long nek an long han an long fingga an long lek wea i mekem olketa fo praod tumas. An bae hemi tekemaot tu olketa barava naes kaleko an olketa longfala kaleko fo putum long hed an olketa kaleko wea olketa kavarem long fes blong olketa an olketa nambawan strap blong olketa an olketa paos blong olketa an olketa samting wea olketa werem fo mekem majik an olketa smolfala botol oel wea hemi smel naes tumas.
24Bae olketa no save smel naes moa,
bat bae olketa barava smel nogud tumas.
Bae olketa no save werem olketa nambawan strap,
bat bae olketa enemi i taemapem olketa wetem rop olsem slev.
Bae hea blong olketa no luknaes,
bat bae olketa enemi i resam hea blong olketa.
Bae olketa no save werem olketa barava spesol kaleko blong olketa,
bat bae olketa werem nomoa olketa ravis kaleko.
Bae olketa no save luknaes olsem distaem,
bikos bae olketa enemi i makem bodi blong olketa olsem slev.
25Long taem ya, bae olketa enemi i kilim dae olketa soldia blong Jerusalem long faet. 26So evriwan long taon blong yufala hu i laef yet bae i sore an krae, bikos bikfala taon ya bae hemi kamap olsem wanfala woman wea olketa tekem evrisamting blong hem.
Currently Selected:
Aesaea 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.