Aesaea 2
2
Mesij abaotem Jerusalem an Jiuda
(Maeka 4:1-3)
1Olketa toktok ya, hemi profesi abaotem Jerusalem an Jiuda wea Yawe hemi talem long mi, Aesaea, san blong Amoj.
2 (Profet) !Olketa! Long taem wea bae hemi kam, disfala maonten wea Tambuhaos blong Yawe hemi stap antap long hem, bae hemi kamap hae moa winim evri narafala maonten. An olketa pipol blong evri narafala kantri bae i save kam tugeta long hem.
3An bae olketa ya i tok olsem, “Kam, yumi go antap long maonten blong Yawe hu hemi God blong Jekob. Ya, yumi go wosipim hem long Tambuhaos. An bae Yawe hemi tisim yumi long olketa wei blong hem, nao bae yumi save falom olketa wei ya.” Bae olketa duim diswan bikos oltaem Mesij blong Yawe bae hemi goaot long Jerusalem, an bae hemi gohed fo tisim olketa pipol long olketa wei blong hem.
4An long taem ya, bae hemi stretem raoa long midol long olketa narafala kantri. Bae olketa hamarem olketa naef fo faet an spia blong olketa fo kamap olsem aean fo digim graon an huknaef fo katem olketa grep.#Joel 3:10. Nao olketa pipol long wol bae i no faetem moa olketa long narafala kantri, an no tisim moa olketa yanga fo faet.
5Nao yufala long laen blong Jekob, yufala kam mekem yumi falom laet wea Yawe hemi somaot long yumi.
Bae Yawe hemi daonem man hu hemi praod
6 (Profet) Yawe. Yu nao God blong olketa laen blong Jekob. Bat distaem yu les nao long olketa pipol blong yu bikos olketa falom wei fo mekem majik blong olketa pipol long ist an olketa blong Filistia long west. An olketa falom tu wei blong olketa hiden pipol long olketa narafala kantri.
7Lan blong Israel hemi barava fulap nao long silva an gol.
Lan ya hemi barava fulap tu long olketa hos an olketa kaat fo faet.
8Lan ya hemi barava fulap long olketa laea god,
an olketa pipol i wosipim nomoa olketa god wea olketa seleva nomoa i wakem.
9So bae Yawe hemi mekem olketa filsem fogud an bae hemi daonem olketa nao. !Yawe! !Plis yu no fogivim olketa!
10Bae olketa pipol trae fo ranawe go long kev o digim hol long graon fo haed insaet long hem, bikos olketa fraet fogud long Yawe hu hemi King an hemi garem evri paoa.#2 Tesalonaeka 1:9; Revelesin 6:15. 11Long taem ya, bae Yawe hemi daonem olketa praod pipol, an bae evri pipol i mekhae nomoa long Yawe.
12Long datfala taem tu, Yawe hu hemi garem evri paoa bae hemi daonem olketa pipol hu i praod. 13Bae hemi olsem wea Yawe hemi katemdaon olketa longfala sida tri long lan ya Lebanon an hemi spoelem olketa strongfala ok tri long lan ya Basan. 14Bae hemi olsem wea Yawe hemi daonem olketa maonten an hil long kantri ya. 15An bae hemi olsem wea Yawe hemi brekemdaon olketa strongfala wolston wetem evri gadhaos blong olketa. 16Bae hemi olsem wea Yawe hemi draonem olketa bikfala kago sip, an evri narakaen sip tu. 17-18Long wei ya, bae Yawe hemi daonem olketa praod pipol. Olketa kaving god bae i lus finis, an bae evri pipol i mekhae nomoa long Yawe.
19Taem Yawe hu hemi King an hu hemi garem evri paoa hemi kros an hemi somaot paoa blong hem, olketa pipol i fraet fogud long hem an olketa ranawe go long kev o digim hol long graon fo haed insaet long hem.
20Long taem ya, bae olketa tekem olketa kaving god wea olketa wakem long gol an silva, an torowem go long ples wea olketa rat i stap long hem.
21Long taem ya tu bae olketa fraet an ranawe go fo haed insaet long olketa kev long graon an long maonten bikos Yawe hu hemi King, hemi garem evri paoa, an bae hemi somaot paoa blong hem taem hemi kros.
22Yufala mas no putum trast blong yufala wansaet long olketa pipol, bikos olketa save dae nomoa ya. Olketa i samting nating nomoa an no save helpem yufala.
Currently Selected:
Aesaea 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.