Eklesiastes 12
12
1Taem yu yang yet,
yu mas tingim God hu hemi mekem yu.
Yu mas tingim hem bifoa taem blong olketa trabol hemi kam kasem yu.
Long taem ya, bae yu tok olsem, “Mi nating hapi nao long laef ya.”
2Long taem ya tu, bae yu lukim dat san, an mun, an olketa sta i nating save saen gudfala nao,
an olketa blak klaod blong ren i gohed fo kam nomoa.
3Long datfala taem han blong yu wea hemi strong distaem bae hemi seksek,
an lek blong yu bae hemi kamap wik, an i no strong nao fo wakabaot.
Olketa tit blong yu tu bae i gohed fo foldaon,
an tu-trifala nomoa i stap.
An ae blong yu tu bae hemi kamap nogud,
an yu no save lukluk gud moa long hem.
4Bae yu lelebet iapas, an bae yu nating save herem noes long rod,
o noes wea olketa mekem taem olketa krasim wit fo hemi kamap flaoa.
Bat singsing blong olketa bed nomoa save mekem yu fo wekap.
5Bae yu fraet fo klae goap long olketa hae ples,
an nomata fo wakabaot, bae yu fraet fo duim tu.
Hea blong yu bae hemi kamap waet,
an bae hemi had tumas fo yu go olobaot o duim enisamting nao.
An tingting blong yu fo woman olsem wea yufala save filim distaem taem yu yang yet,
bae hemi lus finis tu.
Long taem olsem, bae yumi dae an godaon insaet long grev,
an bae olketa pipol i falom rod fo sore an krae nomoa fo yumi.
6Long taem olsem, laef blong yumi bae hemi olsem,
Rop long silva hemi brek.
Kontena long gol hemi smas.
Baket long wel hemi brek.
Rop blong baket long wel hemi bagarap.
7Ya, bodi blong yumi bae hemi gobaek moa long graon,
an disfala laef blong yumi bae hemi gobaek moa long God hu hemi bin givim hem long yumi.
8Mi nao Waes Tisa, an mi sei olsem,
“!Laef hemi no fitim tingting blong yumi!
!Evrisamting hemi barava nating fitim tingting blong yumi!”
Las toktok blong Waes Tisa
9Disfala Waes Tisa hemi gohed fo tisim olketa pipol long olketa samting wea hemi save. Hemi save gud long olketa waes toktok, an hemi gohed fo traem wea olketa i tru o nomoa. 10Hemi traehad fo faendem olketa toktok fo helpem yumi, an evri toktok ya wea hemi raetem hemi stret an tru. 11Olketa toktok blong olketa waes man i olsem stik wea man fo lukaftarem sipsip hemi yusim long olketa sipsip blong hem. Ya, olketa waes toktok i olsem nila wea hemi stap strong insaet long stik ya. God hu hemi givim olketa waes toktok ya, hemi lukaftarem yumi gudfala tumas olsem yumi olketa sipsip blong hem. 12So, pikinini blong mi, hemi gud yu lukaot gudfala, an no adem go enisamting moa long olketa.
Fo kolektem an raetem olketa waes toktok olsem,
bae hemi no save finis.
An sapos yu gohed fo stadim olketa tumas,
bae hemi mekem yu barava taet nomoa.
13Yu bin herem evri toktok nao, an las toktok nomoa hemi olsem,
Yumi mas tinghae long God,
an mas obeim toktok blong hem.
Hem nomoa wanem yumi mas duim.
14God bae hemi jajem yumi evriwan falom evri gudfala samting,
an evri nogud samting wea yumi bin duim.
An nomata olketa samting wea yumi duim haed,
bae hemi jajem yumi long hem tu.
Currently Selected:
Eklesiastes 12: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.