Eklesiastes 11
11
Olketa samting wea waes man hemi duim
1Hemi gud fo yu givim go plande samting long narafala pipol,
bikos bihaen bae hemi kambaek long yu.
2Givim olketa samting long plande pipol,
bikos yu no save watkaen trabol nao bae hemi kasem disfala wol.
3Taem wata hemi fulap insaet long klaod,
bae ren mas kam nao.
Taem bikfala tri hemi foldaon,
nomata hem foldaon go long saet long not o long saot,
ples wea hemi foldaon nao hemi stap long hem.
4Sapos yu wari long win,
bae yu no save plantem gaden blong yu.
An sapos yu wari long olketa klaod blong ren,
bae yu no tekemaot kaikai long gaden.
5Yu nating save hao nao pikinini hemi laef insaet long bele blong mami blong hem.
Long sem wei tu, yu nating save long waka blong God hu hemi mekem evrisamting.
6Yu mas plantem kaikai long gaden long moning,
an waka long gaden ivining tu.
Bikos yu no save wanem waka nao bae kamap gudfala.
Maet olketa wea yu plantem long moning nao hemi garem kaikai,
o narawan long ivining, o tufala evriwan.
Toktok fo helpem olketa yanga
7Delaet hemi gudfala samting,
an yumi hapi long fo lukim san.
8Sapos man hemi save laef long plande yia,
letem hemi hapi olowe long olketa yia ya.
Bat hemi mas tingting tu,
plande taem insaet long tudak bae hemi kam.
Evrisamting wea bae hemi kamap,
hemi no fitim tingting blong yumi.
9Olketa yanga, yufala mas hapi taem yufala yang yet.
Taem yufala yang,
yufala mas duim olketa gudfala samting wea hemi save mekem yufala hapi.
Hemi gud fo yufala falom wanem haat blong yufala hemi laekem,
an yufala duim olketa samting wea yufala laek fo duim.
Bat yufala mas tingim dat God bae hemi jajem yufala
falom olketa samting wea yufala tingim an duim.
10Yufala mas no wari,
an yufala mas lusim olketa trabol,
bikos laef blong yanga hemi no fitim tingting blong yumi.
Currently Selected:
Eklesiastes 11: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.