Romans 3
3
1ꞋEt njan nohoodutaskut, di ha Lizwifne, ꞌenne ꞌon nus buba hoonzoo? ꞋInkꞌez di ha buba húztꞌus-un ꞌet huwun ꞌudun yun kꞌut whutꞌenne buba ndo ꞌuhintꞌoh? 2Lhat-un whe buba hoonzoo. Yakꞌusda dughuni butlꞌa ídanꞌai, ꞌi be tsꞌiyanne hubohodoolhꞌeh ha.
3ꞋAlhaꞌ hoontꞌoh, whulohne Lizwifne Yakꞌusda ooghuni ꞌaw hikꞌú nulheꞌustꞌen. ꞋEt nduntꞌóhne gha Yakꞌusda ꞌonghohne Lizwifne bula dutitnih ninzun eh? 4Ntsꞌenꞌa? Gak wheꞌ hoontꞌoh! Dunene tsꞌiyawh whuhutsꞌit ꞌet hoontsꞌi Yakꞌusda ꞌaw lhuwhustsꞌit wheꞌ ꞌuntꞌoh. Lerwe David Yakꞌusda ghun ꞌukꞌu náwhuzguz ndutni,
“Nghuni gha ꞌuyoonne dune ꞌalhaꞌ dini tꞌehontázin.
ꞋUyoonne ndulhyoh ꞌuhutni de,
buchꞌaꞌ talhdoh,” ni.
5Wheni Lizwifne tankꞌus ꞌútsꞌutꞌen de, ꞌet whe ꞌuyoonne dune ꞌaw huwa lhúhoolnaꞌ whe tꞌehonínzun Yakꞌusda tsꞌihꞌun ꞌuntꞌoh. Tankꞌus ꞌútsꞌutꞌen huwa Yakꞌusda neba nahutiyeh de, tsꞌihꞌun lheꞌustꞌen ninzun eh? (ꞋAntsꞌi ꞌoh dune kꞌunꞌa ꞌudusni.) 6Yakꞌusda wheni Lizwifne tsꞌihꞌun unꞌa neba nalhúhusye de, ntsꞌenꞌa suba ndi yun kꞌut dune tsꞌihꞌun unꞌa buba nahooyeh? ꞋAw ꞌuhótꞌeꞌ ꞌaítꞌoh wheꞌ hoontꞌoh! 7Si whustsꞌit huwa Yakꞌusda ooghuni ꞌalhaꞌ ꞌuntꞌoh-i, ꞌi ꞌon nus díztiꞌ suliꞌ de, ꞌet huwa ꞌuyoonne ꞌaw Yakꞌusda lhuwhustsꞌit ꞌet tꞌehontázin. ꞋEt di ha si lubeshi ꞌulhꞌen-un sudutáhnelh? 8ꞋEt hoontsꞌi whulohne dune, nechꞌaz yáhalhduk whe hutni, “Tankꞌus ꞌúhootꞌen butsꞌútni Yakꞌusda díztiꞌ tꞌehonoozeh ha,” ꞌet whe nechꞌaz yáhalhduk. ꞋEt ꞌalha ꞌuhoontꞌoh njan hohontsꞌit-un ꞌet hukwꞌelha Yakꞌusda buba nahutiyeh, bubulh dawhútanelh-un tsꞌihꞌun ꞌuhoontꞌoh.
Ndi yun kꞌut dune ꞌaw tsꞌihꞌun unꞌa ꞌuntꞌohne hooloh
9Wheni Lizwifne ꞌudun yun kꞌut whutꞌenne buba nus sóo tsꞌinzoo ninzun eh? ꞋAw whuz unꞌa lheꞌhóotꞌoh! ꞋUdaꞌ whúnyunistan nahúltꞌoh Lizwif ꞌinkꞌez ꞌudun yun kꞌut whutꞌenne lubeshi ꞌulhꞌenne ꞌuhintꞌoh. ꞋEt huwa Yakꞌusda buba nahutiyeh. 10Daja dusni-un Yakꞌusda be ꞌudustlꞌus kꞌut cha ꞌukꞌu whusguz ꞌet ndutni,
“ꞋAw ndi yun kꞌut ꞌilhoghun
dune tsꞌihꞌun unꞌa ꞌuntꞌóh-un hooloh.
11ꞋAw ꞌilhoghun dune tꞌeooninzun-un hooloh.
ꞋInkꞌez dune huwu dalhóditꞌoh.
12Tsꞌiyanne Yakꞌusda chꞌaz náhulhya. Tsꞌiyanne hintsiꞌ súliꞌ.
ꞋAw ꞌilhoghun dune unzoo-un hooloh.
13Bughuni untsiꞌ. Dune zi ulhjut za bunawhultsun leꞌ hintꞌoh, ni whe ꞌutni bughuni untsiꞌ ni-un.
Huwhutsꞌit-un za ꞌuwhuhulhꞌen.
Khuni hiye yálhduk-i ꞌantsꞌi tlꞌughus lubezo ndultꞌoh.
Whuz unꞌa dughuni be dune hundílhdaih.
14ꞋAhoolhyiz buze hoontsiꞌ ꞌinkꞌez bukꞌehuhayih.
15ꞋAhoolhyiz dune hughan, ꞌet za huba hilhꞌi.
16Ntsꞌoh la nuhúdilh te tsꞌiyaitsuk nintaꞌhulhꞌih, ꞌinkꞌez dune dzoh nuhulhdeh.
17ꞋAw tsꞌihꞌun unꞌa yinka hudilhtsꞌí-un ꞌaw tꞌehonúszun.
18ꞋAw Yakꞌusda hiyé lhniljut chaꞌ hintꞌoh,”
ni whe ꞌutni.
19ꞋAlhaꞌ tꞌetsꞌonínzun Moses be ꞌudustlꞌus hikꞌúneꞌ ꞌutꞌenne ꞌudustlꞌus daja ni la, tsꞌiyawh hikꞌúneꞌ ootꞌen hubaꞌ hoontꞌoh. ꞋEt whula gha tsꞌe tsꞌiyanne Yakꞌusda hibut neníndil de, lubeshi ꞌuhulhꞌen tꞌéhonínzun, ꞌet huwa ꞌaw hoonli ꞌuhudooniꞌ ꞌaítꞌoh. 20Mbene la Moses be ꞌudustlꞌus kꞌúneꞌ ꞌutꞌenne ꞌaw ꞌet huwa lubeshi ꞌuhulhꞌen-un huba gak hoolhtselh ꞌaítꞌoh. Moses be ꞌudustlꞌus ꞌi gha lubeshi ꞌuhulhꞌenne ꞌuhintꞌoh tꞌehonínzun.
Jesus Christ neba ꞌalhaꞌ ꞌuntꞌoh de, nintaꞌtsꞌuntꞌen-un Yakꞌusda neba gak whutilhtselh
21ꞋAwet ꞌandit Moses be ꞌudustlꞌus ooyit, tsꞌiyanne Yakꞌusda nalh tsꞌihꞌun ꞌuhutitꞌelh ꞌet whúbunilhtan. Moses be ꞌudustlꞌus cha ꞌinkꞌez Yakꞌusda be nus hóoꞌenne bubeꞌ ꞌudustlꞌus cha whuz unꞌa ꞌuwhutánelh hutni. 22Yakꞌusda nalh tsꞌihꞌun ꞌuhutitꞌelh, mbene la Jesus Christ ooba ꞌálhaꞌ ꞌuntꞌohne, ꞌenne za tsꞌihꞌun naꞌujane hinli nasdliꞌ. ꞋEt hukwaꞌ huninzun de, Yakꞌusda tsꞌiyanne tsꞌihꞌun unꞌa naꞌbutilelh, Yakꞌusda yun kꞌut dune ꞌalhgoh lhgha úbunilhꞌen ꞌet huwa. 23ꞋEt wheni tsꞌiyawh lubeshi ꞌutsꞌalhꞌen. ꞋEt huwa Yakꞌusda ye diztiꞌ-i ꞌet ndutsꞌóotꞌeꞌ ꞌaitꞌoh. 24Christ, ꞌen Jesus tsꞌutni, ꞌen gha lubeshi chꞌa naneonket. ꞋEt huwa nintaꞌtsꞌuntꞌen-un, Yakꞌusda ye unzoo-i, ꞌi be gak neba whulhtsi. ꞋAntsꞌi negha óoninꞌai leꞌ neinla. 25Yakꞌusda duYeꞌ ndi yun kꞌut whutꞌenne yúbunilhtan Yakꞌusda soo cho butsꞌu naitotꞌen ha. ꞋEt Jesus Christ buzkaiꞌ gha neba ꞌalha ꞌuhoontꞌoh ꞌet whe Yakꞌusda dukꞌeke naneulhtsi. ꞋEt whuz unꞌa dichꞌoh tsꞌihꞌun ꞌuntꞌoh-un, ꞌet whunenilhtan. ꞋUdaꞌ dune lubeshi ꞌuhalhꞌen-un Yakꞌusda buba ꞌun yutilhdil. 26ꞋInkꞌez ꞌaw dzoh nulhúbilhdoh, ndi yun kꞌut whutꞌenne duYeꞌ bugha ínilhti ꞌet whutsꞌun. ꞋEt whe dichꞌoh tsꞌihꞌun ꞌuntꞌoh ꞌet dunábunilhtan. ꞋEt ꞌandit Jesus yuba ꞌalhaꞌ ꞌuntꞌohne tsꞌihꞌun unꞌa Yakꞌusda nintaꞌhuntꞌen-un ꞌet buba gak whulhtsi.
27ꞋAw eh hoonliyaz ꞌóontꞌeꞌ bulh ooghu yatsꞌoolhduk-i hooloh? Soo gak! Ndet dáhoontꞌoh-un ꞌet huwa? ꞋUtꞌen gha tilah? ꞋAwundooh! ꞋEt Jesus Christ neba ꞌalhaꞌ ꞌuntꞌoh-un, ꞌi be ꞌutsꞌóontꞌeꞌ-un gak nawhusliꞌ. 28ꞋEt huwa whutsꞌodulꞌeh, Yakꞌusda buba ꞌalhaꞌ ꞌuntꞌohne, nintaꞌhutꞌih-un buba gak whulhtsi. ꞋAw ꞌon ꞌun Moses be ꞌudustlꞌus hikꞌú nulheꞌoostꞌen hubaꞌ hoontꞌoh. 29Daja nuhzun? Yakꞌusda Lizwifne za buYakꞌusda unli, kꞌus ꞌudun yun kꞌut whutꞌenne, ꞌenne cha tilah buYakꞌusda unli nuhzun eh? ꞋAlhaꞌ ꞌudun yun kꞌut whutꞌenne, ꞌenne cha buYakꞌusda ꞌuntꞌoh. 30Yakꞌusda ꞌilhoghun za unli. ꞋEt huwa Lizwifne ꞌinkꞌez ꞌudun yun kꞌut whutꞌenne buba ꞌalha ꞌuhoontꞌoh de, ꞌet de nintaꞌhuntꞌen-un buba gak whutilhtselh. 31ꞋEt whula gha tsꞌe, wheni Yakꞌusda ooba ꞌalhaꞌ tsꞌintꞌoh tsꞌihꞌun unꞌa naꞌtsꞌuja, ꞌet ndutsꞌíntꞌoh de, Moses be ꞌudustlꞌus oonatsꞌodutilnoh nuhzun eh? ꞋAwundooh! ꞋAwhuz ꞌet dizꞌai. ꞋI cha Yakꞌusda ooghuni ꞌuntꞌoh.
Currently Selected:
Romans 3: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.