Romans 4
4
Abraham Yakꞌusda ooba ꞌalhaꞌ ꞌuntꞌoh ꞌet whe oolubeshi ooba gak nasdliꞌ
1Wheni Lizwifne netsodaꞌ-un Abraham ooghu dája ꞌuzninzun? Yinka indaꞌ huwa ndet suba nahoonꞌai? 2Yinka indaꞌ ꞌet huwa eh Yakꞌusda nintaꞌ ꞌuntꞌen-un yuba gak whulhtsi? ꞋEt ꞌalha ꞌuhoontꞌoh de, Abraham whéꞌ otꞌeꞌ daꞌ, ꞌet hoontsꞌi ꞌaw Yakꞌusda nalh íloh. 3Yakꞌusda ooghuni ꞌukꞌéguz-un ꞌi daja? “Abraham Yakꞌusda ooba ꞌalhaꞌ ꞌuntꞌoh ꞌet huwa tsꞌihꞌun dune unli yúlhni,” ni whe ꞌutni.
4Dune ꞌutꞌen de ꞌaw ye unzoo-i iloh whe ꞌukꞌelha holeꞌ, kꞌus be ꞌutꞌen ba ꞌukꞌelha holeꞌ la, ꞌaw ꞌantsꞌet oogha lhoohooltsꞌulh. 5ꞋEt hoontsꞌi dune Yakꞌusda dája ni la ooba ꞌalha ꞌuhoontꞌoh de, ꞌet de nínta ꞌutꞌíh-un Yakꞌusda yuba gak whulhtsi. Yubaꞌ whutilelh ꞌaw hoonli yuba lheꞌílel ꞌet hoontsꞌi. Whuz unꞌa Yakꞌusda idutánelh tsꞌihꞌun dune inli. 6Lerwe David ꞌen cha ꞌet huwu yalhduk, mbe la Yakꞌusda yúlhni, “Nyun tsꞌihꞌun dune ꞌintꞌoh,” ꞌaw ꞌutꞌen ꞌuyalhꞌen-i, ꞌi gha iloh, ꞌet hoontsꞌi ꞌen ꞌalhaꞌ ꞌukꞌenus hoonzoo-un ooghá whultsꞌut wheꞌ ꞌuntꞌoh. 7Njan ꞌet ndutni,
“Mbe la tankꞌus ꞌítꞌenne bulubeshi buba ꞌún yutilhdilne
ꞌinkꞌez bulubeshi ꞌaw lhistꞌen suliꞌ léꞌuja de,
ꞌenne ꞌukꞌenus hoonzoo-un bugha whultsꞌut.
8Mbe la dune Yakꞌusda ꞌaw lubeshi ꞌulhꞌen-un lhinízun,
ꞌen dune ꞌukꞌenus hoonzoo-un oogha whultsꞌut whe ꞌuntꞌoh,”
ni whe ꞌutni.
9ꞋEt daja nahzun? ꞋEt dune buhúztꞌus whe be hóodatꞌenne, ꞌenne za tilah Yakꞌusda gha ꞌukꞌenus hoonzoo-un bugha whultsꞌut? Kꞌus ndunne lhuhítꞌusne, ꞌenne cha tilah Yakꞌusda gha ꞌukꞌenus hoonzoo-un bugha whultsꞌut? Njan ꞌet dutsꞌútni, Abraham Yakꞌusda daja ni ooba ꞌalha ꞌuhoontꞌoh ꞌet huwa tsꞌihꞌun dune unli yúlhni. 10Nkedaꞌ Yakꞌusda yudániꞌ tsꞌihꞌun dune unli? Hititꞌus whutso tilah kꞌus hukwꞌelhꞌaz tilah? Hititꞌus whutso ꞌet be hóodatꞌen ꞌaw hukwꞌelhꞌaz iloh. 11Abraham Yakꞌusda daja yudániꞌ ꞌet ooba ꞌalha ꞌuhoontꞌoh, ꞌet huwa ꞌutni Yakꞌusda tsꞌihꞌun dune yulhni. Yakꞌusda yudániꞌ hititꞌus-un whutsodaꞌ. Hukwꞌelhꞌaz huyúztꞌus ꞌet whe be hóodatꞌen-un tsꞌihꞌun dune ꞌuntꞌoh. ꞋEt huwa mbe la Yakꞌusda daja ni ooba ꞌalha ꞌuhoontꞌohne, ꞌaw buba lheꞌhítꞌus whe bube hóodatꞌen hoontsꞌi, ꞌenne Abraham butso whudilhdzulh ínleꞌ. ꞋEnne cha Yakꞌusda ubúlhni, tsꞌihꞌun ꞌuntꞌohne. 12ꞋInkꞌez whulohne Lizwifne, ꞌenne cha Abraham butso whudilhdzulh unli. Lizwifne tsꞌiyawh bubuhúztꞌus whe bube hóodatꞌen. ꞋEt hoontsꞌi mbe la Lizwifne Abraham kꞌunꞌa Yakꞌusda ooghuni buba ꞌalhaꞌ ꞌuntꞌohne, ꞌenne za Abraham butso whudilhdzulh-un unli.
13Abraham Yakꞌusda daja yudániꞌ ꞌet ooba ꞌalha ꞌuhoontꞌoh ꞌinkꞌez Yakꞌusda yúlhni tsꞌihꞌun dune unli. ꞋEt whula gha tsꞌe Yakꞌusda Abraham ꞌinkꞌez yukédindene butsꞌú yoozi. ꞋEt ndi butsꞌú yoozi-i gha ndi yun buchꞌeꞌ whutaleh. Ndi butsꞌú yoozi-i ꞌaw Moses be ꞌudustlꞌus gha íloh whe butlꞌa ídanꞌai, ꞌet kꞌus Abraham Yakꞌusda dája yudániꞌ ooba ꞌalhaꞌ yintꞌoh. ꞋEt huwa ndi butsꞌú yoozi-i butlꞌa ídanꞌai. 14Mbene la Moses be ꞌudustlꞌus yukꞌúneꞌ ꞌutꞌenne ꞌaw ꞌet huwa iloh ndi yun buchꞌeꞌ whutaleh. ꞋEt whuz unꞌa za ꞌutsꞌutꞌen de, ꞌet de Yakꞌusda yutsꞌú hoozi-un gak nawhutádleh, ꞌinkꞌez Yakꞌusda ooghuni neba ꞌálhaꞌ hoontꞌoh-un ꞌantsꞌet ꞌuwhutátꞌelh. 15ꞋEt hoontsꞌi ndi Moses be ꞌudustlꞌus ꞌi be dune bulubeshi ghun buba nahutideh. ꞋEt hoontsꞌi dune Moses be ꞌudustlꞌus lhuhuyítꞌi de, ꞌet de Yakꞌusda highuni hidulhyoh neꞌútꞌen de, ꞌaw buba nahoodeh ꞌaítꞌoh.
16ꞋEt huwa Yakꞌusda ye únzoo-i gha highuni dune yílhchoot de, ꞌen Yakꞌusda nalh tsꞌihꞌun dune unli. ꞋEt whe Yakꞌusda dune tsꞌú hoozi-un tsꞌiyanne Abraham yukédindene, ꞌenne buchꞌeꞌ whutaleh. Mbene la Lizwifne Yakꞌusda ooghuni ooba ꞌalhaꞌ ꞌuntꞌohne, ꞌaw ꞌenne za íloh, tsꞌiyanne Abraham kꞌunꞌa Yakꞌusda ooghuni hiyílhchoot de, ꞌalhaꞌ tsꞌiyanne netso whudilhdzulh-un unli. 17Yakꞌusda ooghuni ꞌukꞌéguz-i Yakꞌusda Abraham ndúyúlhni, “Dune lhelhdoh didohne butso whudilhdzulh-un nyuzúsi.” ꞋEt huwa Yakꞌusda Abraham lhelhdoh didohne butso whudilhdzulh-un unli yuba léꞌuntꞌoh. Yakꞌusda yutsꞌú hoozi-un ꞌaw lhuwhúsni ꞌuyulhni, ꞌet hoontsꞌi tsꞌihꞌun unꞌa ꞌuhooja kꞌunꞌa ooba ꞌálhaꞌ hoontꞌoh. Yakꞌusda ꞌen ꞌuntꞌoh ꞌen gha yaidláne cha za huhuna, ꞌinkꞌez ndai la ꞌuyínla-i musai be ꞌuyínla.
18Yakꞌusda yutsꞌú hoozi-un lhane didowhne butso whudilhdzulh-un tileh. ꞋUhóneh ꞌaítꞌoh leꞌ hoontꞌoh, ꞌet hoontsꞌi ooba ꞌalha ꞌuhoontꞌoh ꞌet nduwhútanelh. ꞋEt Yakꞌusda uyúlhni, “Nyukédindene hutildlai,” ꞋEt huwa. 19Tube duneti súliꞌ, ntsꞌenꞌa suba buzkeh holeꞌ? ꞋAnkwꞌus 100 yus kꞌut be suliꞌ. Ooꞌat Sarah ꞌen cha buzkeh whutáleh-un ꞌon ꞌun ha níjan. ꞋEt hoontsꞌi, njan ꞌaw soo cho howu ni lhíloh, Yakꞌusda daja yudániꞌ, ꞌet tube cho ooba ꞌalha ꞌuhoontꞌoh ꞌet huwa. 20Yakꞌusda ndet yutsꞌú hoozi-un ꞌaw ꞌutsꞌun unꞌa lheꞌnízel ꞌinkꞌez ꞌaw nawh ooba lheꞌhóotꞌoh. Yakꞌusda ooba ꞌalhaꞌ ꞌuntꞌoh, ꞌet whe ulhtus suliꞌ, ꞌinkꞌez Yakꞌusda dílhtiꞌ. 21Yakꞌusda ndet yutsꞌú hoozi-un ꞌet ye úlhtus-i be ndutínelh tꞌeoonínzun. ꞋAw nawh lheꞌhóotꞌoh whe ooba ꞌalha ꞌuhoontꞌoh. 22ꞋEt huwa ꞌutni Yakꞌusda, “Tsꞌihꞌun dune inli,” yúlhni. 23Yakꞌusda ooghuni ꞌukꞌéguz-i Yakꞌusda Abraham ndúyulhni, “Tsꞌihꞌun dune inli.” Ndi ꞌaw Abraham za iloh ooba ꞌukꞌéguz, 24wheni cha neba ꞌuntꞌoh. Yakꞌusda Jesus Christ neMoodihti dazsai whe dunaidilhti ꞌet neba ꞌalha ꞌuhoontꞌoh de, ꞌet de Yakꞌusda nedutánelh, “Tsꞌihꞌun dune tsꞌinli.” 25Tankꞌus ꞌútsꞌutꞌen huwa Yakꞌusda Jesus Christ butlꞌa yálhti, ꞌinkꞌez dazsai whe dunaidilhti. ꞋEt huwa nintaꞌtsꞌutꞌih-un Yakꞌusda neba gak whulhtsi.
Currently Selected:
Romans 4: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.