Romans 2
2
Yakꞌusda tsꞌihꞌun unꞌa dune ba nahiyilh
1ꞋEt nyun ndi ꞌudustlꞌus kꞌuyailhduk soo cho dintsꞌo? Kꞌus mbe nohtoh dudulh dune ghu yalhduk-un tankꞌus ꞌúhutꞌen huwun, ꞌet nyunchꞌoh cha ꞌalha tankꞌus ꞌutꞌen. ꞋEt nyunchꞌoh cha khúyanalduk whe ꞌutni. Nyunchꞌoh cha whuz unꞌa za neꞌutꞌen. 2Whunulhꞌen, tꞌetsꞌonínzun, Yakꞌusda dunne tankꞌus unꞌa ꞌutꞌenne de, tsꞌihꞌun unꞌa buba nahutiyeh wheꞌ hoontꞌoh. 3Nyun cha tankꞌus unꞌa ꞌintꞌen ꞌinkꞌez nyulh dune ba nahinyeh de, ꞌet Yakꞌusda whuz unꞌa mba nalhotisyeh ninzun eh? 4Khun tilah, Yakꞌusda lheꞌwhuldzoh ntsꞌun únzoo ꞌinkꞌez ꞌaw nyulhónulhchꞌe. ꞋEt ꞌantsꞌi eh mbaꞌ hoontꞌoh? ꞋAwhuz eh tꞌewhunuzínzun Yakꞌusda ntsꞌun únzoo-i, ꞌi be nyeni nahandunonꞌah hubaꞌ hoontꞌoh?
5ꞋEt hoontsꞌi ꞌaw ndzi nálhodunínꞌal. ꞋEt za ꞌiltsiꞌ. ꞋEt huwa ꞌon nus mba hootátsiꞌ. Yakꞌusda ye hunilchꞌoh-i, ꞌi be tsꞌihꞌun unꞌa dune ba nahuyeh de, 6ꞌet whe ꞌilhone uhli whe nohꞌeꞌutꞌen gha Yakꞌusda nohba ꞌukꞌelha whutilhtselh. 7Whulohne ꞌaw whutsꞌu lhodítni whe tsꞌihꞌun unꞌa ꞌuhutꞌen. ꞋEt nduhútꞌen-un huwun Yakꞌusda budólhtiꞌ, hincha uboolhtselh, ꞌinkꞌez ꞌahoolhyiz dalhótisa ꞌet hitsꞌu húkwaꞌ ninzun. ꞋEt nduntꞌóhne dune Yakꞌusda ꞌilhiz wheni huhutinalh-un bugha whútaꞌalh. 8ꞋEt hoontsꞌi mbene la dune kꞌúwhulhꞌaine didutchꞌoh za dukꞌoh tsꞌe neꞌhutitꞌen hukwaꞌ huninzun. ꞋInkꞌez khuni ꞌalhaꞌ ꞌuntꞌoh-i, ꞌi kꞌunulhéꞌhustꞌen, tankꞌus za ꞌuhitꞌelh. Ndunne Yakꞌusda tube huske whe buba nahutiyeh. 9ꞋEnne whe whunujut whe dzoh notideh. Kꞌus mbe unli whe tankꞌus ꞌuna nduhutꞌen, Lizwif ꞌudechoo ꞌinkꞌez ꞌudun yun whutꞌenne cha. 10ꞋEt hoontsꞌi Lizwif ꞌudechoo ꞌinkꞌez ꞌudun yun kꞌut whutꞌenne butoh tsꞌihꞌun ꞌitꞌelhne, ꞌenne Yakꞌusda budutálhtiꞌ, ꞌinkꞌez hincha butilhtselh, ꞌet whe ꞌaw budzi lhúduntisdoh. 11ꞋEnne hoontsꞌi ꞌet ndúbutilelh. Yakꞌusda ndi yun kꞌut dune tsꞌiyanne ꞌalhgoh lhgha nenilhꞌen.
12ꞋEt huwa mbene la Moses be ꞌudustlꞌus tꞌeinúszunne, lubeshi ꞌuhulhꞌen de, ꞌilhiz wheni dzoh notidoh. Mbene la Moses be ꞌudustlꞌus tꞌeinínzunne, lubeshi ꞌuhulhꞌen de, ꞌukꞌu nusguz-i, ꞌi gha buba nahutideh. 13Mbene la Moses be ꞌudustlꞌus ꞌantsꞌet yoozílhtsꞌaine, ꞌaw Yakꞌusda ba tsꞌihꞌun lheꞌhítꞌoh. ꞋEt hoontsꞌi mbene la Moses be ꞌudustlꞌus hikꞌúneꞌ ꞌustꞌenne, ꞌenne nintaꞌhuntꞌen-un Yakꞌusda buba gak whutilhtselh. 14ꞋUdun yun kꞌut whutꞌenne Moses be ꞌudustlꞌus ꞌaw lhuhuyítꞌel. ꞋEt hoontsꞌi yinka hudilhtsꞌi huwa ndi ꞌudustlꞌus hikꞌúneꞌ ꞌustꞌen de, ꞌantsꞌi tꞌehinínzun buba leꞌ hoontꞌoh. 15ꞋEnne Moses be ꞌudustlꞌus kꞌunꞌa hikꞌúneꞌ ꞌustꞌen de, ꞌantsꞌi budzi kꞌut ꞌukꞌu náwhusguz buba leꞌ hoontꞌoh. ꞋEt whe neyo tsꞌe oogha tꞌetsꞌoninzun-un#2:15 Ndi khuni, “Neyo tsꞌe oogha tꞌetsꞌoninzun-i,” ꞌi hoonli tsꞌihꞌun unꞌa kꞌus tankꞌus ꞌúhoontꞌoh-un, ꞌi gha tꞌetsꞌoninzun tsꞌutni wheꞌ tsꞌutni. buba ꞌálhaꞌ hoontꞌoh. ꞋEt whuz unꞌa ntsꞌenꞌa la dahútꞌen tꞌehonínzun, whuloh te tankꞌus unꞌa ꞌuhoontꞌoh, kꞌus tsꞌihꞌun unꞌa ꞌuhoontꞌoh, ꞌet dudzi yo whe tꞌehonínzun. 16Ndet dzin Yakꞌusda ꞌudun neooninꞌai-i, ntsꞌoh la whuꞌiz whe neꞌhustꞌen, ꞌet Jesus Christ buba nahutiyeh. ꞋEt ndi sghuni unzoo-i, dune be hodusꞌeh-i ꞌet ndutni.
Lizwifne Yakꞌusda ooghuni ꞌaw hikꞌú nulheꞌitꞌel
17Lizwif inli ꞌinkꞌez ndi kꞌooyailhduk de, hoonliyaz nyudutásnelh. Nyun Moses be ꞌudustlꞌus ootꞌa nínintan, ꞌet Yakꞌusda tsꞌu ténadusli dini ꞌet whe duba naꞌinzooꞌ. 18Nyun Yakꞌusda ndet ntsꞌu hukwaꞌ ninzun-un tꞌewhunínzun. Moses be ꞌudustlꞌus huwun nyunilhtan ꞌet whe tankꞌus ꞌuhoontꞌoh ꞌinkꞌez tsꞌihꞌun unꞌa ꞌuhoontꞌoh tꞌewhunínzun. 19ꞋInkꞌez ꞌudun yun kꞌut whutꞌenne hodilhꞌeh ninzun, ꞌet huwa dune hoos̱ꞌenne ndultꞌóhne bula óontun ninzun, ꞌinkꞌez dune tsalhgus yo dilhtsꞌi dultꞌóhne, ꞌenne be hóotꞌen buba usli ninzun. 20ꞋInkꞌez ꞌudun yun kꞌut whutꞌenne tsꞌoodunne whusníne nduhúltꞌoh bubunínzun ꞌet huwa whuz unꞌa hubodolhꞌeh ninzun. Moses be ꞌudustlꞌus intꞌi, ꞌet huwa ꞌi gha tsꞌiyawh tꞌeoonínzin naꞌduníndzun. Ndai la tankꞌus unꞌa ꞌinkꞌez tsꞌihꞌun unꞌa ꞌuntꞌoh-i tꞌeoonínzun naꞌdunínzun. 21ꞋUyoonne hodilhꞌeh dini. Di ha nyunchꞌoh whunálheꞌdunuziltun? Lheꞌdíni, ꞌuyoonne dune ubudíni, “ꞋUdunoohtꞌih junih!” Nyun cha tilah ꞌundunintꞌih? 22ꞋUyoonne cha ndúbudini, “Tsꞌekoo kꞌus dune bulh nintaꞌoohtꞌen junih!” Nyun cha tilah ꞌet dintꞌen? “ꞋUkꞌeltsi tsꞌu dusni,” dini, ꞌet hoontsꞌi ꞌukꞌeltsi tsꞌu ténahududli-un tsꞌe ꞌalhaꞌ eh ꞌaw bulugliz hoonliyaz lhizílhchoot béꞌ tantꞌelh wheni? 23Dune dini Moses be ꞌudustlꞌus daldzooꞌ la, ꞌet hoontsꞌi ooghuni kꞌinyus de, Yakꞌusda ꞌaw lhdílhtiꞌ whéꞌ ꞌintꞌen. ꞋAw eh huwun nuní lhnuzinzut? 24Nohni nohundultꞌohne, ꞌenne bugha ꞌudun yun kꞌut whutꞌenne Yakꞌusda chꞌaz yahalhduk. ꞋEt whuz unꞌa Yakꞌusda be ꞌudustlꞌus kꞌuninyuz.
25ꞋEt hukwa ooka dune inli-i kꞌut nyuhúztꞌus de, ꞌet whe la nye whéhoodatꞌen Lizwif ꞌintꞌoh.#2:25 Tsꞌiyanne tꞌewhunínzun Lizwifne Yakꞌusda ꞌutahábanla duduneꞌ hooleꞌ ha. Rom 4:11. ꞋInkꞌez Moses be ꞌudustlꞌus ookꞌúneꞌ zintꞌen de, nyuhúztꞌus-un mba hóonzoo. ꞋEt hoontsꞌi Moses be ꞌudustlꞌus ꞌaw ookꞌú nulheꞌzintꞌen de, nyuhúztꞌus-un ꞌaw hoonli lhuhóoloh. 26ꞋEt ꞌudun yun kꞌut whutꞌenne ndet la Moses be ꞌudustlꞌus butsꞌu húkwaꞌ ninzun tunéꞌ hutꞌen de, ꞌet ꞌantsꞌi buhúztꞌus leꞌ hoontꞌoh, ꞌet ndulhúbuhilel hoontsꞌi. 27ꞋEt ꞌudun yun kꞌut whutꞌenne ndet la Yakꞌusda butsꞌu húkwaꞌ ninzun tunéꞌ hutꞌen de, ꞌet whe la tsꞌiyanne tꞌehontázin nohni Lizwifne, oohtꞌaz ꞌet hoontsꞌi, lubeshi ꞌulhꞌenne uhli, Moses be ꞌudustlꞌus kꞌunahyuz huwa.
28Mbene la Lizwif unline ꞌinkꞌez buhúztꞌus Moses be ꞌudustlꞌus kꞌunꞌa de, ꞌet nduhúja hoontsꞌi, ꞌaw tsꞌihꞌun Yakꞌusda ooduneꞌne lhuhíloh. 29ꞋEt hoontsꞌi mbene la ndet Moses be ꞌudustlꞌus butsꞌu húkwaꞌ ninzun ꞌoh túneꞌ hustꞌen de, ꞌenne za soo Yakꞌusda ooduneꞌne hinli. ꞋEnne soo Lizwif ꞌuhintꞌoh. Ndoni gha ꞌantsꞌi oodzi kꞌut huyúztꞌus kꞌunꞌa be hóodatꞌen, ꞌaw Moses be ꞌudustlꞌus kꞌunꞌa íloh. ꞋEnne Yakꞌusda budutálhtiꞌ, ꞌaw dune iloh.
Currently Selected:
Romans 2: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.