Mark 1

John dune too be ꞌulhꞌen-un Yakꞌusda ooghuni be yalhduk

1Ndi khuni unzoo-i, khuni ꞌudechoo-i Jesus Christ, Yakꞌusda ooYeꞌ ghun.

2ꞋUdaꞌ Yakꞌusda be nus hooꞌenne, ndi Yakꞌusda ooghuni ghun ukꞌunuhíyuzguz-i, ꞌet njan ndutni,

“‘Soo zílhtsꞌai,

ꞌuyoon khuni sba naꞌá-un ntsó tisꞌalh,

mba lhawhúdutileh ꞌet wheni.’

3ꞋEt ꞌoho keyoh, ꞌaw dune lhuhóotꞌih-un,

dune huyih whe,

‘NeMoodihti whuz de úyalh, ooti ooba lháoodahleh.

Lhutíyalh-un lhtsꞌe whudizꞌa ooba whulhtsi,’” hutni.

4John dune too be ꞌulhꞌen-un, ꞌaw dune lhuhóotꞌih tsꞌe oozya ꞌinkꞌez tubeꞌ budániꞌ, “Lubeshi ꞌulhꞌen-un noheni náhandunoohleh, ꞌinkꞌez too beꞌ ꞌúlhneh, ꞌaw ꞌet de za Yakꞌusda nohlubeshi nohba ꞌún yutilhdulh.” 5ꞋEt whe la tsꞌiyanne Judea whunat whutꞌenne ꞌinkꞌez Jerusalem whutꞌenne cha tehúnindil ꞌinkꞌez John dune too be ꞌulhꞌen-un huyoozílhtsꞌai. ꞋInkꞌez dulubeshi ghun huna huhoolnuk whe ꞌukoh Jordan huwhútni-un toot ꞌet John dune too béꞌ balhꞌen. 6ꞋEt John dune too be ꞌulhꞌen-un khuna-i#1:6 Ndi khuna-i “camel” huyúlhni. gha stlꞌoo-i ye dune unli ꞌinkꞌez ꞌuzus se be tsúdilhꞌoo. Tulkꞌus cho ꞌinkꞌez tsꞌihnatlꞌuz cha ꞌi yaꞌalh inleꞌ. 7ꞋEt ubúlhni, “Dune skꞌélhꞌaz whusatíyalh-un sanus díztiꞌ whe ꞌuntꞌoh. ꞋAw ookechun natlꞌool ooba kꞌunaítísꞌuk ꞌet hoontsꞌi huba soo lhéꞌuzdzooꞌ. 8Too beꞌ nohusꞌen ꞌet hoontsꞌi ndun dune ꞌen Ndoni be too beꞌ nohtilelh ꞌinkꞌez Ndoni nohyé dutiꞌalh.”

Jesus too beꞌ ꞌúlya ꞌinkꞌez netsudúle tankꞌus óoneh-un hukwa yóolhdzih

9ꞋEt saꞌ iloh hukwꞌelhꞌaz Jesus Christ Nazareth#1:9 Nazareth, Galilee ꞌoh whuzꞌai. tsꞌe hainya ꞌinkꞌez ꞌukoh Jordan huwhútni-un toot ꞌet John dune too be ꞌulhꞌen-un Jesus too beꞌ yínla. 10Soo Jesus tooz ha naja ibulh, ndo yakꞌuz dáhaꞌ dankez whutílhꞌen, ꞌinkꞌez Ndoni dutꞌai kꞌunꞌa ndus de Jesus ookꞌé diltsꞌut. 11ꞋEt ꞌuwhútni, “Nyun sYeꞌ inli. Tube nkꞌesiꞌ, ꞌinkꞌez tube nyulh hoonústꞌiꞌ.”

12ꞋEt ꞌahoh Ndoni ꞌen Jesus nꞌun ꞌaw dune lhuhóotꞌih-un tsꞌe whe yálhꞌaꞌ. 13ꞋEt dit whunizyat dzin Jesus ꞌaw dune lhuhóotꞌih-un indaꞌ ꞌinkꞌez Satan tankꞌus óoneh-un hukwa yóolhdzih. Tsꞌantꞌi ꞌi cha ꞌoh ho hoonli. Lizasne whusahándil, ꞌinkꞌez hiba neꞌutꞌen.

Dine lho ha ꞌutꞌenne Jesus, “ꞋAnih,” ubúlhni

14ꞋEt John dune too be ꞌulhꞌen-un, ꞌahúyanꞌai hukwꞌelhꞌaz, Jesus Galilee tsꞌe oozya ꞌinkꞌez bubulh yálhduk Yakꞌusda ookꞌúneꞌ whutꞌen-un, ooghuni ghun. 15ꞋInkꞌez ꞌet ꞌutni, “ꞋAndit ꞌawet whusahónzut. ꞋAwet nilhdukw Yakꞌusda ookꞌúneꞌ whutitꞌen wheꞌ hoontꞌoh. Lubeshi ꞌulhꞌen-un noheni náhandunoohleh, ꞌinkꞌez khuni unzoo-i nohba ꞌalha ootꞌeꞌ ꞌinkꞌez ulhchoot!”

16ꞋEt Jesus bunghun Galilee taba nuya whe nane lho ha ꞌutꞌenne ubanꞌen, Simon ꞌinkꞌez bulhutsin Andrew bulh lhembilh tahúyalhdil lho haꞌ ꞌutꞌenne hinli ꞌet huwa. 17ꞋEt ubúlhni Jesus, “Sunihꞌus, dune ha ꞌoohtꞌén-un nohooselh si.” 18ꞋAho dulembil hila ditni ꞌinkꞌez hikꞌoh tsꞌe ootꞌen ha huyuntizꞌaz.

19ꞋOn ꞌunyaz ha hándil ꞌet ꞌuyoonne nane lhulhutsinke James ꞌinkꞌez John bulh Zebedee ooyeꞌke ꞌubutilhꞌen dutsꞌi bet dulembil naꞌhulhꞌen. 20Soo Jesus ꞌubutilhꞌen ibulh, “ꞋAnih,” ubúlhni. ꞋEt ꞌawet Zebedee ooyeꞌke Jesus bulh whe hánꞌaz. Zebedee ꞌinkꞌez yuba ꞌutꞌenne cha ꞌawet tsꞌi bet húdilhtsꞌi whe bughu whe hánꞌaz.

Dune ntsiꞌ-i ooyudínda-un

21Keyoh Capernaum#1:21 Capernaum Galilee ꞌoh whuzꞌai. huwhútni-un whuz hoozdil. ꞋOm bun dzin Lizwif nahulyis dzin, ꞌet Jesus Lizwif bulugliz bughu danínya ꞌinkꞌez whe whúbondunilhꞌeꞌ. 22Dune yudántsꞌone tube buba hooncha, soo oobaꞌ hoontꞌóh-un kꞌunꞌa whe dune whubodulhꞌeh, ꞌaw Moses be ꞌudustlꞌus ꞌukꞌu nunáguzne bukꞌunꞌa iloh ꞌutni. 23ꞋEt ꞌilhoghun dune butoh usda-un, ntsiꞌ-i nududeh-i kꞌúneꞌ ꞌutꞌen-un, ꞌaldzul whe ꞌutni, 24“Jesus Nazareth whutꞌen-un ndet netsꞌú hukwaꞌ ninzun? Gak netalhtselh ha whusaínya? Mbe inli tꞌenyunúszun, nyun Yakꞌusda ba lubeshi ooghu hooloh-un ꞌintꞌoh.”

25ꞋEt Jesus hukwa yudaniꞌ whe uyúlhni, “Tꞌeduzinih whe ooyáhanaindaih!” 26ꞋEt ntsiꞌ-i nudúdeh-i ndun dune yuka ootilhdzut, ꞌalhdzul, ꞌinkꞌez yuyáhanaja.

27Tsꞌiyanne buba hooncha kꞌet ꞌet ꞌulhodútni, “Dantꞌóh-i ghuni ꞌuntꞌoh, whutsodaꞌ lhtsꞌodústsꞌo-un ꞌet whuneoodulhꞌeh? Ooghuni be whúnujut kꞌet ntsiꞌ-i nudúdeh-i hoontsꞌi hikꞌúneꞌ ꞌutꞌen.” 28ꞋAhoh Galilee keyoh whuti whunat whutꞌenne Jesus huyulh ꞌúdantsꞌo.

Jesus lhane dune undudáne soo náꞌbulhꞌen

29Lizwif lugliz tenáhundil whe Simon ꞌinkꞌez Andrew buyoh tsꞌe dahunindil, James ꞌinkꞌez John hiyulh naꞌaz. 30Simon oobiz lili kꞌut sulhti. Ooyustꞌe nulwus-i be únduda. Jesus whuz oozya ibulh hidániꞌ. 31ꞋEt yughu ninya ꞌinkꞌez yula tꞌaz do yilhchoot. ꞋAhoh tsꞌeke soo ꞌúja ꞌinkꞌez bugha náꞌuntꞌai.

32Hulhgha sa yó whinꞌai hukwꞌelhꞌaz, ndudáne ꞌinkꞌez mbene la ntsiꞌ-i nudúdeh-i kꞌúneꞌ ꞌutꞌenne cha Jesus ghu bonínla. 33ꞋInkꞌez tsꞌiyanne keyoh whutꞌenne dati ꞌílhuhózdil. 34Lhawh didowh dada be undudáne, ꞌenne Jesus soo náꞌbalhꞌen ꞌinkꞌez ntsiꞌ-i nudúdeh-i kꞌúneꞌ ꞌutꞌenne, ꞌenne cha dune yé ha nabunanyoot. Ntsiꞌ-i nudúdeh-i ꞌaw yahoolhduk-un butlꞌa lhúhooꞌal tꞌehinínzun ꞌet huwa.

Keyoh Galilee huwhútni-un, ꞌet Jesus Yakꞌusda ooghuni be yálhduk

35ꞋOm bun bundada ꞌawhuz lhuyulhkoh daꞌ Jesus dudinya ꞌinkꞌez ꞌaz whenya. ꞋEt nyo keyoh whuchꞌa suya, disoh tsꞌe oozya. ꞋEt tenadudli. 36Simon ꞌinkꞌez dukꞌekene te Jesus hikunuta. 37Nahayilhti whe ꞌet ꞌuhuyúlhni, “Tsꞌiyanne nkunúta.”

38ꞋEt Jesus ꞌubulhni, “ꞋUtsꞌun keyoh tsꞌe cha uztoodilh dune bulh yátisduk ꞌet huba whusásya.” 39Galilee ndulcho nukéhudizde lugliz totsuk bubulh yálhduk ꞌinkꞌez ntsiꞌ-i nudúdeh-i dune ye ha nábunuyukw.

Ooka whulhjút-un, Jesus soo náꞌyinla

40ꞋIlhoghun dune, ooká whulhjut-un, leprosy huyulhni, Jesus ghu ninya, dugwutsi bé nenínya ꞌinkꞌez yutsꞌu tédudli dulaꞌ ooneh ha. “Nyun hukwaꞌ ninzun de, be ilhtus-i ꞌintꞌi-i, ꞌi be sunáꞌilhdeh,” yulhni.

41Jesus yugha téꞌninzin yutsꞌú nudilhni ꞌinkꞌez yutꞌaíznai. “Hukwaꞌ nuszun soo naꞌíntneh,” yulhni. 42ꞋAho dune ulhjut-un soo náꞌuja ꞌinkꞌez bunaꞌide.

43Jesus khuniti be yulh yálhduk ꞌinkꞌez ꞌaho whenáyalhꞌaꞌ. 44Dune natisja whe ꞌet Jesus ꞌuyulhni, “Soo zilhtsꞌai, ꞌuyoonne dóniꞌ junih! Inyalh tsꞌe lubret ꞌen ootsꞌínyalh ꞌinkꞌez nyunoolhꞌen. ꞋEt ꞌantsꞌíya soo naꞌínja hukwꞌélha ndet la Moses ooghuni kꞌunꞌa lubret ntsꞌu húkwaꞌ ꞌutni-un, ꞌi oogha íonꞌalh. ꞋEt tsꞌiyanne whúntalhtun soo naꞌínja.” 45ꞋEt hoontsꞌi dune whenája ꞌinkꞌez tsꞌiyanne dániꞌ ꞌon nus huweꞌ yalhduk kꞌet Jesus ꞌaw keyoh dune tunóyaꞌ ꞌaitꞌoh. ꞋInka nꞌawh dune lhuhóotꞌi ꞌoh dune unli. Lhelhtsꞌiz de whutꞌenne whuz highu lhkꞌesúdil.

Currently Selected:

Mark 1: crx

Highlight

Copy

Compare