Mark 2
2
Dune délhdusni-un Jesus soo náꞌyinla
1ꞋEt hukwꞌelhꞌaz whutizútyaz whe Jesus keyoh Capernaum tsꞌe naoosja. Tsꞌiyanne whulh ꞌúhuduztsꞌai ndet yoh usda. 2ꞋAhoh dune ꞌilhuhozdil. Whuz dune lhane ꞌalhgoh daníndil kꞌet ꞌaw whuzꞌái-un hooloh, dati ꞌi bulh whudizbun. ꞋEt Jesus Yakꞌusda ooghuni ghun ubulh yálhduk. 3Yalhduk whe dine dune, ꞌilhoghun dune délhdusni-un Jesus tsꞌun híyoozkai. 4Whuz dune lhai kꞌet ꞌaw Jesus híyénghun neóodilh ꞌaitꞌoh. ꞋInka ndo bun kꞌihinílhti ꞌinkꞌez ndet la Jesus ꞌuntꞌoh-un, whuz dune délhdusni-un ndus de yukꞌusti-i, ꞌi bulh hukwꞌu huyankai. 5ꞋEt Jesus dalcho-i be hitꞌa nínintan tꞌeoonínzun ꞌet huwa dune délhdusni-un ꞌulhni, “Yeꞌ nlubeshi mba hooloh suliꞌ.”
6Whulohne Moses be ꞌudustlꞌus ꞌukꞌu náguzne, ꞌet hudilhtsꞌi ꞌinkꞌez ꞌuhinínzun, 7“Di ha ndun dune Yakꞌusda chꞌaz yalhduk? Mbe ꞌutinelh lubeshi untilhdulh? Yakꞌusda za lubeshi nꞌun tulhdilh whe ꞌuntꞌoh.”
8ꞋEt hoontsꞌi Jesus duyughi be daja huninzun tꞌewhunínzun ꞌet ꞌahoh ꞌubulhni, “Dáhoontꞌoh huwa ꞌoh te nuní nahzut? 9Ndet ꞌukꞌenus huwa lhúhoolnaꞌ ndun dune délhdusni-un ꞌudutásnelh, ‘Nlubeshi mba nꞌun tisdil,’ kꞌus ‘Dudinyaih ꞌinkꞌez ninya?’ 10ꞋEt la tꞌeoonohzin Yinka Dune Yeꞌ, ꞌen ndi yun kꞌut ye úlhtus ꞌi be lubeshi nꞌun tulhdilh-un whe ꞌuntꞌoh.” ꞋInka ndun dune délhdusni-un ꞌulhni, 11“Nyudúsni, dudinyaih, ookwꞌusinti-i ilhchoot ꞌinkꞌez nyoh tsꞌe naíndalh.” 12ꞋAho dunadija, yukꞌusti-i yilhchoot ꞌinkꞌez tsꞌiyanne nalh whenája. Tsꞌiyawh buba hooncha ꞌinkꞌez Yakꞌusda hidálhtiꞌ ꞌinkꞌez ꞌuhútni, “ꞋAw whutsodaꞌ nduhoontꞌoh-un lhtsꞌuhoos̱ꞌen.”
Jesus Levi, “ꞋAnih,” yúlhni
13Jesus doo cha za taba tsꞌe naóosja. ꞋIlhozdílne highu nindil whe ꞌet whubodulhꞌeh. 14Jesus ꞌoh whuya uyalh whe Alphaeus ooyeꞌ Levi, Capernaum whenkuti huwunli ha sooniya nálhdzooh-un, ꞌen Jesus yutilhꞌen ꞌet uyúlhni, “Sunanyalh.” Levi dudinya ꞌinkꞌez yukꞌoh tsꞌe ootꞌen ha yuntizya.
15Hukwꞌelhꞌaz Levi ooyoh lhanne sooniya nalhdzóohne ꞌinkꞌez lubeshi ꞌulhꞌenne, Jesus yugha hodulꞌehne cha ꞌet bula naꞌutꞌalh. 16ꞋEt Moses beꞌ ꞌudustlꞌus ꞌukꞌu nunáguzne ꞌinkꞌez Pharisee didowhne, Jesus hinilhꞌen lubeshi ꞌulhꞌenne, ꞌinkꞌez sooniya nalhdzóohne bula naꞌutꞌalh. Phariseene Jesus yugha hodulꞌehne hubuhoodulhkut, “Dáhoontꞌoh huwa nduntꞌóhne bula ꞌaꞌalh?”
17Jesus budántsꞌo ꞌinkꞌez ꞌubulhni, “Soo ꞌúntꞌohne ꞌaw yoo be duyun-un ha lheꞌhunízun, mbene la ndudáne za yoo be dúyun-un kaꞌ huninzun. Tsꞌihꞌun ꞌuntꞌohne buba whusálhusyal, lubeshi ꞌulhꞌénne lhtꞌanahunoodilh bubudutásnelh ꞌet wheni whusásya.”
Dune soo huhooni-un hukwa hoodulhkut
18John dune too be ꞌulhꞌen-un yugha hodulꞌehne ꞌinkꞌez Phariseene bugha hodulꞌehne cha soo húhoonih whe Jesus highu nindil ꞌinkꞌez ꞌuhuyúlhni, “ꞋEt dáhoontꞌoh huwa John dune too be ꞌulhꞌen-un yugha hodulꞌehne ꞌinkꞌez Pharisee bugha hodulꞌehne soo húhoonih ꞌet hoontsꞌi nyun ngha hodulꞌehne, ꞌenne gak?”
19Jesus ubúlhni, “ꞋAndit ꞌat ꞌutꞌi-un bughu nusdílne soo húhoonih la nahzun eh? Dune ooꞌat whuzdliꞌ-un, butoh usda de, ꞌaw nduhóoneh ꞌaitꞌoh. 20ꞋEt hoontsꞌi whusaóotiltsꞌulh dune ꞌat utꞌí-un bughu nayitálchulh. ꞋEt dzin whusahóoltsꞌut de, ꞌoh de soo húhootanih.”
21“ꞋAw ꞌilhoghun naih ꞌandidi-i naih jut be naoolhkut ꞌaitꞌoh. ꞋEt ndúja de, naih ꞌandidi-i be nalhkut-i, naih jut nalhkut-i bulh ha naitichꞌulh ꞌinkꞌez ꞌon nus hoontsiꞌ tileh. 22ꞋInkꞌez ꞌaw ꞌilhoghun tsꞌekoo tooꞌ, ꞌawhuz ꞌutꞌen-i, ꞌuzus ꞌujut-i be húyoolhdzeh ꞌaitꞌoh. ꞋEt nduhúyinla de tsꞌekoo tooꞌ zus ꞌujut-i ookꞌotáltulh ꞌinkꞌez nankiltꞌoh tsꞌekoo tooꞌ ꞌinkꞌez oozus bulh nintaꞌtitꞌelh. Tsꞌekoo tooꞌ ꞌawhuz ꞌutꞌen-i ꞌuzus ꞌandidi-i be óoldzeh hubaꞌ hoontꞌoh.”
Nahulyis dzin hukwa hoodulhkut
23ꞋEt doo cha nahulyis dzin ꞌuhoontꞌoh whe, Jesus ꞌinkꞌez yugha hodulꞌehne tubulh tlꞌo kꞌut ꞌoh whuya hidulh whe, tlꞌo maiꞌ hoonuyin. 24ꞋEt Phariseene Jesus ꞌuhuyúlhni, “Nilhꞌen dáhoontꞌoh huwa ngha hodulꞌehne natsꞌulyis dzin ꞌet ꞌuhutꞌen? ꞋAw nduhóotꞌen huba lheꞌhootꞌoh.”
25Jesus ubúlhni, “ꞋAw lakw hukwꞌu yalhúlhdih David dája ꞌoh daꞌ, yooꞌalh-i hooloh whe yulh ꞌútꞌenne te buye ꞌíltsꞌul whe nduja: 26Yakꞌusda ooyoh ꞌet danínya ꞌinkꞌez lhes Yakꞌusda gha tꞌaih-i, ꞌi yuꞌalh ꞌinkꞌez yulh ꞌutꞌenne cha huyanꞌal. Lubretne ꞌaw ꞌenne za huyooꞌalh hubaꞌ hoontꞌoh, ꞌet hoontsꞌi David ꞌinkꞌez yulh ꞌutꞌenne cha nduhuja. ꞋOh daꞌ Abiathar ꞌen lubretne bumoodih unli wheꞌ hooja.”
27ꞋEt Jesus ubúlhni, “Nahulyis dzin dune whe sooꞌ hootꞌeꞌ ha ꞌoohoolya, ꞌinkꞌez dune, ꞌaw nahulyis dzin huba lheꞌhílnel. 28ꞋEt huwa Yinka Dune Yeꞌ, nahulyis dzin ꞌet hoontsꞌi whuMoodihti unli.”
Currently Selected:
Mark 2: crx
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
