Matthew 27

Jesus Pilate but nehinilhti

1ꞋOm bun bundadaꞌ lubret bumoodihne, tsꞌiyawh, dune tso whudilhdzulhne cha, Jesus hichꞌaz ditni whe howu yahalhduk hituzilhghelh hukwa. 2ꞋEt Jesus hiyulhghel ꞌinkꞌez yun kꞌut whumoodih, Pontius Pilate huyulhni, hitsꞌu ha yoolhti.

Judas senáꞌusguz

3ꞋEt mbe whutlꞌa yálhti-un, Judas huyúlhni-un, ꞌawet Jesus datitsah huba ooba nahisda whe, ꞌet tꞌeoonanzin whe tube unija. ꞋInkꞌez tat whunizyai sooniya silver huyulhni, lubret bumoodihne ꞌinkꞌez dune ꞌutso whudilhdzulhne cha, buba whusanáyandzai. 4ꞋEnne ꞌúbulhni, “Ndun dune ninta lheꞌustꞌí-un, ꞌen whutlꞌásti ꞌet whe nintaꞌnustꞌen.” ꞋEt ꞌuhuyúlhni, “Wheni neba lheꞌhóotꞌoh. Nyunchꞌoh za mbaꞌ hoontꞌoh!”

5Ndi tat whunizyai silver tsꞌutni-i sooniya lugliz whucho yun bubut nayántsut, ꞌinkꞌez ꞌaz whe naja ꞌinkꞌez senáꞌusguz.

6ꞋEt lubret bumoodihne ndi sooniya silver tsꞌutni-i, ꞌi huyilhchoot ꞌinkꞌez ꞌuhutni, “Dune ꞌuzkaiꞌ be oket ꞌuntꞌoh. ꞋEt huwa ꞌaw Yakꞌusda ba be ꞌúzdla-i be tsꞌoodzaih ꞌaitꞌoh.” 7ꞋEt dichꞌoh howu yahalhduk. ꞋInkꞌez mbe la lhez oosaꞌ ꞌulhꞌen-un, sooniya ꞌi be ꞌen yun hiyónket. ꞋI kꞌut ꞌutsꞌun whutꞌenne, ꞌahule ꞌet wheni. 8ꞋEt huwa ꞌandit dzin whutsꞌun ndi yun booziꞌ ꞌi ꞌuskaiꞌ yun huyulhni. 9ꞋEt whuz unꞌa ꞌoh daꞌ nus hooꞌen-un Jeremiah daja ni ꞌet whunilhchoh ꞌoh túneꞌ whustꞌen whe lhaóoduja whe njan ndutni, “Ndi sooniya silver tsꞌutni, tat whunizyai ꞌet ꞌultsuk huyilhchoot. ꞋEt ꞌultsuk whe hiyolhto, Israel ootsꞌu haindene, buba kꞌelha huyulhtsi. 10ꞋInkꞌez lhez oosaꞌ ꞌulhꞌen-un, ooyun hiyónket. Whuz unꞌa Moodihti sudaniꞌ hukwꞌunꞌa.”

Jesus Pilate yubut usyin

11ꞋEt ꞌawet Jesus yun moodih ꞌen yubut usyin. ꞋEt yun moodih yoodulhkut, “Nyun eh ꞌintꞌoh Lizwif bulerwe inli?” Jesus ꞌuyulhni, “A, ꞌalha dini.”

12ꞋInkꞌez Lizwif bumoodihne ꞌinkꞌez dune ꞌutso whudilhdzulhne cha, hikꞌehoꞌalh hukwaꞌ hutꞌen. ꞋEt hoontsꞌi ꞌaw hoonli lheꞌdínel. 13ꞋEt Pilate yoodulhkut, “ꞋAw eh lhubuduzíntsꞌo lheꞌwhultsuk-un whe nchꞌaz yáhalhduk?” 14ꞋEt hoontsꞌi ꞌaw ꞌilho khuni be hoontsꞌi daja lhdinel. ꞋEt whe yun kꞌut whumoodih tube ooba hooncha.

Pilate Barabbas buba yula naditni

15ꞋAwet nawhudizulh totsuk lizwif butus lhuseya ꞌet whunahulnih, ꞌet whutoh yun moodih mbe ꞌadinꞌai-un ꞌilhoghun hikaꞌ ninzun-un, tsꞌiyanne butsꞌu lanadutitnih. Whuz unꞌa bukꞌoh tsꞌe ꞌuhoontꞌoh. 16ꞋIlhoghun ꞌadinꞌai-un, Barabbas huyulhni, tsꞌiyanne tꞌehinínzun. 17ꞋEt huwa tsꞌiyawh ꞌilhunahosdil whe Pilate uboodulhkut, “Mbe nohba oola nadutistnih hukwaꞌ nahzun, Barabbas kꞌus Jesus, Christ huyulhni?” 18Tꞌeooninzun ꞌoonih gha butlꞌa ha yalhti.

19ꞋEt Pilate dune ba nahidilh-i, kwꞌutsꞌuzda kꞌusda whe ooꞌat khuni yutsꞌó tlꞌa inꞌai, ꞌet ndúyulhni, “Ndun dune ꞌen tsꞌihꞌun ꞌuntꞌoh-un. Hoonliyaz ꞌonleh junih! ꞌalha ꞌandit dzin ꞌen oogha huwu nusústi ꞌet whe dzoh nusúszut.”

20ꞋEt hoontsꞌi lubret bumoodihne ꞌinkꞌez ꞌutso whudilhdzulhne cha, ꞌilhunaoodilhne ba hunintꞌi whuz unꞌa ꞌuhóoneh ha, Pilate Barabbas yula nadootni ꞌinkꞌez Jesus hooloh huyoolhtselh ha.

21ꞋEt yun moodih uboodulhkut, “Ndunne nane, kꞌus mbe nohba oola nadutisnih hukwaꞌ nahzun?” “Barabbas,” hutni.

22ꞋEt Pilate ndúbulhni, “Ndun doꞌ, Jesus, Christ huyúlhni-un, ꞌen datísdlelh?” ꞋIlhunaoosdilne ꞌuhúyulhni, “Tulalhgus kéꞌ hiyolhtelh!”

23Yun moodih ꞌet ndutni, “Di ha? Ndet whe nintaꞌantꞌen?” ꞌubulhni. ꞋEt hoontsꞌi sulꞌehúdilya, “Tulalhgus kéꞌ hiyolhtelh!” hutni.

24ꞋEt Pilate tꞌewhunínzun ꞌaw hoonli ꞌuhooleh ꞌaitꞌoh. ꞋIlhunaoosdilne ꞌawet lhtahotátꞌalh leꞌ hoontꞌoh. ꞋIlhozdilne bubut too be lanaꞌilde ꞌinkꞌez ubúlhni, “Ndun tsꞌihꞌun dune buzkaiꞌ ootꞌa óosnalh hukwa lheꞌnúszun. Nohnichꞌoh nohba ꞌuhoontꞌoh.”

25Tsꞌiyanne dune ꞌet ꞌuhutni, “Wheni tsꞌiyawh neuzkeh tubulh buzkaiꞌ whutaleh-un, ꞌet nekꞌéholtsꞌit!”

26ꞋEt la Barabbas buba yula naditni ꞌinkꞌez Jesus yolhtsus. ꞋEt hukwꞌelhꞌaz butlꞌa yálhti tulalhgus kꞌehíyolhtelh ha.

Lhuganne Jesus highu núwhulhya

27ꞋEt ꞌawet yun moodih lhuganne ubutꞌine, ꞌenne Jesus huyilhchoot ꞌinkꞌez duyoh tsꞌe whe húyalhti, ꞌi Praetorium huwhútni. ꞋEt tsꞌiyawh lhuganne Jesus higha óosguz. 28ꞋEt hinaih hitsꞌu húnuhuyulhchꞌul ꞌinkꞌez luglok dulkꞌun-i hitꞌuháyulhchooz. 29Whus cho nahinílhjaz-i, hitsi nehídanꞌai. ꞋInkꞌez tlꞌoghazilh nailhni tsꞌe hila kꞌehídantan. Lerwe kꞌunꞌa yotꞌeꞌ ha hitlꞌa hídantan. Hibut nachánuldulh ꞌinkꞌez highudloh. ꞋInkꞌez “Hadih! Lizwif bulerwe!” huyúlhni. 30Highá dizoh, ꞌinkꞌez tlꞌoghazilh be hitsi oonulhtꞌa. 31Highudloh-un ꞌetsul ꞌuhudija whe luglok highun náhuyílhchoot. Dichꞌoh oonaih be náhuyalhti ꞌinkꞌez tulalhgus kꞌehuyítalhtelh tsꞌe hítilhti.

32ꞋAwet Jesus tehínilhti whe ꞌilhoghun dune Cyrene whutꞌen-un ꞌuntꞌoh, Simon huyulhni, hidudizdil whe ndi Jesus ootulalhgus ooba idantelh huyúlhni. 33ꞋEt Golgotha tsꞌuwhútni-un whuz hoozdil. Ndi khuni ꞌutsin tsꞌun nizꞌai ni whe ꞌutni. 34ꞋEt tsꞌekoo tooꞌ duninkꞌoz-i ꞌinkꞌez yoo, gall tsꞌutni, hitadínla, ꞌi yootnaiꞌ hukwaꞌ huyinla. ꞋEt hoontsꞌi yunawhúzdlih ꞌinkꞌez ꞌaw yootnaiꞌ hukwa lheꞌnízun. 35ꞋEt tulalhgus ꞌuhidunilhtꞌo hukwꞌelhꞌaz hinaih higha ꞌáinli. Dahuja-un ꞌet ꞌoh daꞌ nus hooꞌen-un ntsꞌenꞌa ꞌudaniꞌ, ꞌet tsꞌiyawh hukwꞌunꞌa ꞌuhooja. Ndiz unꞌa njan dudaniꞌ,

“Snaih lhtahúyulya.

ꞋInkꞌez ooloh higha ꞌainli.”

36ꞋEt ꞌawet nátlꞌaꞌhudiltsꞌiꞌ ꞌinkꞌez highunli. 37Ootsi ꞌan dus tsꞌe dzihtelyaz hahidunilhtꞌo. ꞋInkꞌez hikꞌehoonꞌai-un ꞌet ꞌukꞌehuhoonguz. ꞋEt ndutni:

NDUN JESUS ꞋUNTꞋOH LIZWIFNE BULERWE

38Nane ꞌundunutꞌihne, hiyulh tulalhgus kꞌebuhilhti. ꞋIlhoghun nailhni tsꞌe, ꞌinkꞌez ꞌilhoghun ꞌintlꞌus tsꞌe. 39Mbene ꞌoh whuya whedilhne nondunulꞌus ꞌinkꞌez hichꞌaz ditni whe yahalhduk. 40ꞋEt ꞌuhuyúlhni, “Nyun ꞌintꞌoh lugliz whucho nanaóodutanlelh ꞌinkꞌez tat dzin naꞌwhutanlelh dini! Nyunchꞌoh ꞌududílyih! Yakꞌusda ooYeꞌ inli de, tulalhgus ookꞌut nanaíndaih!”

41ꞋEt lubret bumoodihne, ꞌenne cha whuz unꞌa za highudloh. Moses be ꞌudustlꞌus ꞌukꞌu nunáguzne, ꞌinkꞌez dune ꞌutso whudilhdzulhne cha, whuz unꞌa za ꞌuhutni njan duhutni, 42“ꞋUyoonne ulhyis ꞌet hoontsꞌi dichꞌoh ꞌaw ꞌududoolyih ꞌaitꞌoh. Israel ootsꞌu haindene, bulerwe unli de, tulalhgus yukꞌut nanaóojaꞌ ooleꞌ daꞌ. ꞋEt de la neba ꞌalha ootꞌeꞌ. 43Yakꞌusda tꞌanínintan. ꞋEt huwa Yakꞌusda yukaꞌ ninzun de, ꞌandit ꞌaho daꞌ yoolhyih. Njan ndutni inleꞌ Yakꞌusda ooYeꞌ ꞌustꞌoh.” 44Ndunne ꞌundunutꞌihne yuzih tulalhgus kꞌusulhtine, ꞌenne cha whuz unꞌa za highudloh.

Jesus ye khuna-i yula ditni

45Dzetniz hukwꞌelhꞌaz 3:00 atꞌen ꞌinkꞌez hulhgha 6:00 atꞌen ꞌet whutsꞌun yun kꞌut ndúwhulcho whe tsahólhgus suliꞌ. 46ꞋEt 6:00 atꞌen Jesus tube cho kaꞌ dija whe, “Eli, Eli, lama sabachthani?” Ndi khuni, “SYakꞌusda, SYakꞌusda di ha sla dantnih,” ni whe ꞌutni.

47Whulohne dune ꞌet núdilhyane hidántsꞌo whe ꞌuhutni, “Ah! Elijah ha hayih whe ꞌutni!”

48ꞋEt ꞌaho ꞌilhoghun whusalgai, ꞌinkꞌez duchun oolaꞌdulꞌoo-i tsꞌekoo tooꞌ duninkꞌoz-i ye tunayuzsi ꞌinkꞌez ndo Jesus yuze yunaóonulhtsul. 49ꞋOnghohne “Kꞌat ootsꞌú ha lhozahꞌai! Elijah yughu ninya ꞌinkꞌez tilah yoolhyih.”

50Doo cha za Jesus tube cho ꞌudíja ꞌinkꞌez duyughi yula ditni.

51Khuntsul lugliz whucho dutai-i hukwa dímbal-i lhulcho lhkꞌenchꞌul. Yun cha núhisnai, ꞌinkꞌez tse cho lhtsꞌe dunizkat. 52Tsꞌun kꞌut dune ꞌadinla-un dáhanaꞌdankat. ꞋInkꞌez lhane Yakꞌusda oochꞌeꞌne nahunistez inleꞌ, dunahudidil. 53ꞋInkꞌez tse be tsa kꞌet ha náhidil, ꞌinkꞌez keyoh Jerusalem tsꞌe whehandil. ꞋEt lhane nalhtsꞌet bube hóodiltsai, ꞌet whe whúbunilhtan. Jesus nakhitnaꞌ hukwꞌelhꞌaz lhanne hubanꞌen.

54ꞋEt ndun lhuganne bumoodih, ꞌinkꞌez yulh ꞌutꞌenne, Jesus yughunline, yun núkhisnai ꞌinkꞌez ntsꞌoh te neꞌwhustꞌen-un, ꞌet honalhꞌen whe tube whe húnilhjoot ꞌinkꞌez ꞌuhutni, “ꞋAlhaꞌ ꞌazih ndun dune, Yakꞌusda ooYeꞌ ꞌuntꞌoh.”

55Tsꞌekoo cha ꞌet nuhúdilhya whe yoo ꞌaz de whutsꞌun honilhꞌen. Galilee tsꞌu haindilne ꞌuhutꞌen. ꞋEnne Jesus huyuwhusanándilne ꞌinkꞌez hiba neꞌústꞌenne ꞌuhintꞌoh. 56ꞋEnne butoh Mary Magdala whutꞌen-un cha ꞌutꞌen, ꞌinkꞌez Mary James ꞌinkꞌez Joses ꞌenne buloo, ꞌen cha ꞌutꞌen, ꞌinkꞌez Zebedee ooyeꞌke ꞌenne buloo cha, ꞌutꞌen.

Joseph Jesus ꞌayalhti

57ꞋEt hulhgha suliꞌ whe ꞌilhoghun Arimathea whutꞌen-un, dune hoonzooꞌ ꞌuntꞌoh-un, Joseph huyulhni. ꞋEn cha Jesus yugha hodulꞌeh-un ꞌilhoghun suliꞌ. 58ꞋEn Pilate tsꞌu whinya, ꞌinkꞌez Jesus oozi yutsꞌu yuka ꞌutni dutlꞌa yóolhtelh ha. ꞋEt Pilate ꞌubulhni, “Jesus oozi ndun dune ootlꞌa yúlhtih.” 59Joseph Jesus oozi ndus de ha náyalhti ꞌinkꞌez naih diztiꞌ-i, ꞌaw lhditsun, ꞌi yugha íyozduz. 60ꞋInkꞌez dichꞌoh ootse be tsa kꞌet ꞌandit ꞌuhoonla, ꞌet whambez tsꞌe ꞌet neínilhti. Tse cho whudanádanꞌai ꞌinkꞌez whenája. 61Mary Magdala whutꞌen-un, ꞌen cha ꞌet usda. Tsa kꞌet whanchꞌaz, ꞌuyoon Mary cha ꞌet usda.

Jesus ꞌayalhti-un, tse kꞌut whudunáꞌhudalhdze

62ꞋEt dzenis whuti ꞌet wheni lhazdutneh-un dzin ꞌuhoontꞌoh. ꞋOm bun dzin lubret bumoodihne ꞌinkꞌez Phariseene cha, tsꞌiyawh Pilate tsꞌu whehandil. 63ꞋEt ꞌuhúyulhni, “Nemoodih ndun nenanꞌa-un ꞌawhuz khuna whe daja neúlhni la, ꞌet whunatsꞌilnih ‘Tat dzin inleꞌ de dunádutásdalh,’ ni. 64ꞋEt whe nghuni ubudóniꞌ tsa kꞌet daꞌ dutaꞌalh whulh tat dzin whutsꞌun. ꞋAw ndúlhinel de yugha hodulꞌehne ꞌulhdzis whusahándil ꞌinkꞌez tilah hizi hidunootꞌih. ꞋInkꞌez la tsꞌiyanne hudóniꞌ yaidlane butoh dunadija whé ꞌuntꞌoh. ꞋEt whe la ꞌudekꞌez whutsꞌit-i, ꞌudechoo-i anus ꞌultsiꞌ whutáleh,” huyulhni.

65ꞋEt Pilate ndúbulhni, “Nohni cha huwunline ahtꞌi whe ꞌahtꞌoh. Nahdulh ꞌinkꞌez nohnichꞌoh soo dutsꞌo cho whe dánaꞌ dihꞌaih!” 66ꞋEt whe hándil ꞌinkꞌez tse kꞌut whudunáꞌhudilhdze. ꞋI be dutsꞌo cho whuzdliꞌ ꞌinkꞌez huwunline ꞌet nehúninla.

Currently Selected:

Matthew 27: crx

Highlight

Copy

Compare